ಕಪ್ಪು ಶಿಲೀಂಧ್ರ ಹೊಂದಿರುವ ಈರುಳ್ಳಿಯನ್ನು ಎಸೆಯಬೇಕೆ? ಎಂಬ ಪ್ರಶ್ನೆಗೆ ಇಲ್ಲಿದೆ ಉತ್ತರ! Black Fungus Onions

ಡಾ. ನಂದಿತಾ ಅಯ್ಯರ್ ತಮ್ಮ ಎಕ್ಸ್​ ಖಾತೆಯಲ್ಲಿ ಕಪ್ಪು ಶಿಲೀಂಧ್ರವನ್ನು ಹೊಂದದೆ ಇರುವಂತಹ ಈರುಳ್ಳಿಯನ್ನು ಪಡೆಯುವ ಏಕೈಕ ಮಾರ್ಗವೆಂದರೆ, ತರಕಾರಿ ಮಾರುಕಟ್ಟೆಗೆ ಚಾಕು ತೆಗೆದುಕೊಂಡು ಹೋಗಿ, ಸಿಪ್ಪೆ ಸುಲಿದು, ಗುಣಮಟ್ಟವನ್ನು ಪರಿಶೀಲಿಸಿ ನಂತರ ಖರೀದಿಸಬೇಕು. ನಾನು ಪ್ರತಿಯೊಂದು ಅಪ್ಲಿಕೇಶನ್​ಗಳಲ್ಲೂ ಖರೀದಿಸಿದ್ದೇನೆ. ಆದರೆ, ಕಪ್ಪು ಕಲೆಗಳಿಲ್ಲದ ಈರುಳ್ಳಿಯನ್ನು ಎಂದಿಗೂ ನೋಡಿಲ್ಲ ಎಂದು ಬರೆದು ಪೋಸ್ಟ್ ಮಾಡಿದ್ದಾರೆ.

ಅನೇಕ X ಬಳಕೆದಾರರು "ಸ್ವಚ್ಛ" ಈರುಳ್ಳಿಯನ್ನು ಹುಡುಕುವಲ್ಲಿ ವಿಫಲರಾಗಿದ್ದಾರೆ. ಕೆಲವರು ವಿತರಣಾ ಅಪ್ಲಿಕೇಶನ್‌ಗಳನ್ನು ಬಳಸುವ ಬದಲಿಗೆ ಸ್ಥಳೀಯ ಮಾರುಕಟ್ಟೆಗೆ ಹೋಗಿ ಖರೀದಿಸುವಂತೆ ಸಲಹೆ ನೀಡಿದರು. ಕೆಲವರು ಈ ಸಮಸ್ಯೆ ಹೊಸದೇನಲ್ಲ. ಇತ್ತೀಚಿನ ದಿನಗಳಲ್ಲಿ ಹೆಚ್ಚು ಹೆಚ್ಚು ಈರುಳ್ಳಿಗಳು ಈ ಕಪ್ಪು ಶಿಲೀಂಧ್ರವನ್ನು ಹೊಂದಿರುವುದು ಕಂಡುಬರುತ್ತದೆ ಎಂದು ತಿಳಿಸಿದ್ದಾರೆ.

ಡಾ. ನಂದಿತಾ ಅಯ್ಯರ್ ಸೂಚಿಸಿದಂತೆ, ಕಪ್ಪು ವಸ್ತು ಈರುಳ್ಳಿಯ ಹೊರ ಪದರದಲ್ಲಿದ್ದರೆ ಮಾತ್ರ ಸೇವಿಸಬೇಕು. ಆ ಶಿಲೀಂಧ್ರವನ್ನು ತೊಡೆದುಹಾಕಲು ಎಚ್ಚರಿಕೆಯಿಂದ ಸುಲಿಯಬೇಕು. ಕಪ್ಪು ಪದರ ಹೋಗುವವರೆಗೂ ತೆಗೆದು ಚೆನ್ನಾಗಿ ಬೇಯಿಸಬೇಕು. ಆದಾಗ್ಯೂ, ಕಪ್ಪು ವಸ್ತುವು ಹೆಚ್ಚಿನ ಪದರಗಳಲ್ಲಿ ಕಂಡುಬಂದರೆ, ಶುದ್ಧವಾದ ನೀರಿನಿಂದ ತೊಳೆದು ಅದು ಹೋಗುವವರೆಗೂ ಸ್ವಚ್ಛವಾಗಿ ಸಿಪ್ಪೆಯನ್ನು ತೆಗೆಯಬೇಕು. ಇಲ್ಲದಿದ್ದರೆ ಈ ಶಿಲೀಂಧ್ರಗಳು ಕೆಲವೊಮ್ಮೆ ಆರೋಗ್ಯದಲ್ಲಿ ವಿಷವನ್ನು ಉತ್ಪತ್ತಿ ಮಾಡುತ್ತವೆ ಎಂದು ಹೇಳಿದ್ದಾರೆ.

ಕಪ್ಪು ಶಿಲೀಂಧ್ರವಿರುವ ಯಾವುದೇ ಈರುಳ್ಳಿಯನ್ನು ಕತ್ತರಿಸಿದ ನಂತರ ನಿಮ್ಮ ಕೈ ಮತ್ತು ಚಾಕುವನ್ನು ಸೋಪಿನಿಂದ ಚೆನ್ನಾಗಿ ತೊಳೆಯಬೇಕು. ಏಕೆಂದರೆ, ಕಪ್ಪು ಶಿಲೀಂಧ್ರಗಳು ನಿಮ್ಮ ದೇಹಕ್ಕೆ ತಲುಪಿ ಕಲುಷಿತಗೊಳಿಸಬಹುದು. ಹಾಗೆಯೇ ತಂದಂತಹ ಈರುಳ್ಳಿಗಳು ಹಾಳಾಗದಂತೆ ತಡೆಯಲು ಜಾಲರಿಯ ಬುಟ್ಟಿ ಅಥವಾ ಮುಚ್ಚಿದ ಪೆಟ್ಟಿಗೆಗಳಲ್ಲಿ ಸಂಗ್ರಹಿಸುವುದು ಉತ್ತಮ ಎಂದು ಸಲಹೆ ನೀಡಿದ್ದಾರೆ (ಏಜೆನ್ಸೀಸ್​).