ನವದೆಹಲಿ: ಕರೊನಾ ಪರೀಕ್ಷೆಗಾಗಿ ‘ಫೆಲುಡಾ ಪೇಪರ್ ಸ್ಟ್ರಿಪ್’ ಪರೀಕ್ಷೆಯನ್ನು ಮುಂದಿನ ಕೆಲವು ವಾರಗಳಲ್ಲಿ ಭಾರತದಲ್ಲಿ ಬಿಡುಗಡೆ ಮಾಡಲಾಗುತ್ತದೆ ಎಂದು ಕೇಂದ್ರ ಆರೋಗ್ಯ ಸಚಿವ ಡಾ.ಹರ್ಷವರ್ಧನ್ ಹೇಳಿದ್ದಾರೆ. ಫೆಲುಡಾ ಪೇಪರ್ ಸ್ಟ್ರಿಪ್ ಪರೀಕ್ಷೆಯು ಶೇಕಡ 98 ನಿಖರತೆಯನ್ನು ತೋರಿಸಿದೆ. ವಿವಿಧ ಖಾಸಗಿ ಪ್ರಯೋಗಾಲಯಗಳಲ್ಲಿ ನಡೆಸಿದ ಫೆಲುಡಾ ಪರೀಕ್ಷೆಯಲ್ಲಿ ಸುಮಾರು 2 ಸಾವಿರ ಮಂದಿ ಭಾಗಿಯಾಗಿದ್ದು, ಶೇ. 98 ಫಲಿತಾಂಶ ನಿಖರವಾಗಿದೆ. ಇದು ಅತ್ಯಂತ ವೇಗ ಹಾಗೂ ಕಡಿಮೆ ಬೆಲೆಯ ಪರೀಕ್ಷೆ ಎಂದು ಹರ್ಷವರ್ಧನ್ ತಿಳಿಸಿದ್ದಾರೆ. ಸಿಎಸ್ಐಆರ್- ಐಜಿಐಬಿ ಅಭಿವೃದ್ಧಿಪಡಿಸಿದ್ದು, ವಾಣಿಜ್ಯ ಬಳಕೆಗೆ ಔಷಧ ನಿಯಂತ್ರಣ ಮಹಾನಿರ್ದೇಶನಾಲಯ (ಡಿಜಿಸಿಎ) ಅನುಮೋದನೆ ನೀಡಿದೆ.
