ಮೂತ್ರಪಿಂಡ ಕಲ್ಲುಗಳ ನಿರ್ವಹಣೆಗೆ ಅನೇಕ ಪಥ್ಯಾಹಾರಗಳು ಅನುಕೂಲ ಮಾಡುತ್ತವೆ. ಹುರುಳಿ, ಹೆಸರುಕಾಳು, ಬೇಳೆ, ಹಳೆಯ ಅಕ್ಕಿ, ಗೋಧಿ, ಜವೆಗೋಧಿ, ಬಾರ್ಲಿ, ಮುಳ್ಳು ಹರಿವೆಸೊಪ್ಪು, ಚೆನ್ನಾಗಿ ಬಲಿತಿರುವ ಹಳೆಯ ಬೂದಕುಂಬಳಕಾಯಿ, ಸುಟ್ಟಬಾರ್ಲಿ, ಕಲ್ಲಂಗಡಿಹಣ್ಣು, ಬಾಳೆಹಣ್ಣು, ನಿಂಬೆಹಣ್ಣು, ಕ್ಯಾರೆಟ್, ಅನಾನಸು, ಎಳೆನೀರು, ಹಳೆಯಬೆಲ್ಲ, ಕಬ್ಬಿನ ಹಾಲು, ಶುಂಠಿ, ಯಥೇಚ್ಛ ನೀರು ಸೇವನೆ ಅನುಕೂಲಕಾರಿ. ಹೊಟ್ಟೆಯಲ್ಲಿ ಉರಿ ಉಂಟುಮಾಡುವ ಆಹಾರ ವಸ್ತುಗಳು, ಹುಳಿ, ಒಗರು ರುಚಿಯ ಆಹಾರ ಪದಾರ್ಥಗಳು, ಜೀರ್ಣಕ್ಕೆ ಕಷ್ಟಕರವಾದ ಗುರು ಆಹಾರ ವ್ಯಂಜನಗಳು, ಒಣಗುಣ ಪಡೆದುಕೊಂಡ ಜಂಕ್ ಆಹಾರ, ಟೊಮ್ಯಾಟೋ, ಬದನೆಕಾಯಿ, ಹೂಕೋಸು, ಬೀನ್ಸ್, ಗೋಡಂಬಿ, ದ್ರಾಕ್ಷಿ, ಹಾಲು, ಹಾಲಿನ ಉತ್ಪನ್ನಗಳು, ಆಯುರ್ವೆದ ವಿವರಿಸಿದ ಹದಿನೆಂಟು ವಿಧವಾದ ವಿರುದ್ಧಾಹಾರಗಳು, ಮೂತ್ರಪ್ರವಾಹವನ್ನು ಕಡಿಮೆಗೊಳಿಸುವ ಜಂಬುನೇರಳೆ, ಬೇಲದಹಣ್ಣು, ಖರ್ಜೂರ, ಕಮಲದ ದಂಟು, ಕಮಲದ ಬೇರು, ಪಿಷ್ಟಾನ್ನ, ಪಾಲಕ್, ಹಸಿರು ಸೊಪ್ಪಿನ ತರಕಾರಿಗಳು, ಸೋಯಾಬೀನ್, ಕರಿಮೆಣಸು, ಎಳ್ಳು, ಬೀಟ್ರೂಟ್, ಬೆಂಡೆಕಾಯಿ, ಸಿಹಿಗೆಣಸು, ಚಹಾ ಸೇವನೆ, ಚಾಕೊಲೇಟ್, ಮೀನು, ಮಾಂಸಾಹಾರ, ತರಕಾರಿಯ ಬೀಜಗಳು, ಉಪ್ಪು, ಸಕ್ಕರೆ, ವಿಟಮಿನ್ ಸಿ, ವಿಟಮಿನ್ ಡಿ, ಕ್ಯಾಲ್ಸಿಯಂ, ಪ್ರೊಟೀನ್ ಅಂಶಗಳುಳ್ಳ ಪೂರಕ ಆಹಾರಗಳು- ಇವುಗಳನ್ನೆಲ್ಲಾ ಕಡಿಮೆ ಸೇವಿಸಿದಷ್ಟು ಮೂತ್ರಕಲ್ಲುಗಳಿಗೆ ಬೇಗನೆ ವಿದಾಯ ಹೇಳಬಹುದು. ಆಯುರ್ವೆದದಲ್ಲಿ ಮೂತ್ರಕಲ್ಲಿನಿಂದ ಶಾಶ್ವತ ಮುಕ್ತಿಗೆ ಹೇಳಿರುವ ಚಿಕಿತ್ಸೆಗಳು ಕುತೂಹಲಕಾರಿಯಾಗಿದ್ದು ತಿಳಿದುಕೊಳ್ಳಬೇಕಿದೆ.
