"ತಲೆ ಬೋಳಿಸಿದರೆ ದಟ್ಟ ಕೂದಲು ಬರುತ್ತೆ" ಇದೊಂದು ಅಪ್ಪಟ ಸುಳ್ಳು! ಚರ್ಮರೋಗ ತಜ್ಞರು ಹೇಳುವ ಆ ಅಸಲಿ ಸತ್ಯವೇನು ಗೊತ್ತಾ? Hair Care Myths

ಕೂದಲನ್ನು ಕತ್ತರಿಸಿದ ನಂತರ ಕೆಲವು ದಿನಗಳ ಬಳಿಕ ಮತ್ತೆ ಬೆಳೆಯುವ ಕೂದಲು ಮೊದಲಿಗಿಂತ ಸ್ವಲ್ಪ ಒರಟಾಗಿ ಅಥವಾ ಗಾಢವಾಗಿ ಕಾಣುತ್ತದೆ. ಇದು ಯಾವುದೇ ಮಾಂತ್ರಿಕ ಪರಿಣಾಮದಿಂದಲ್ಲ, ಬದಲಾಗಿ ಒಂದು ಕಾರಣದಿಂದ.

ನೀವು ರೇಜರ್‌ನಿಂದ ನಿಮ್ಮ ಕೂದಲನ್ನು ಕತ್ತರಿಸಿದಾಗ, ಕೂದಲಿನ ತುದಿಗಳು ಚಪ್ಪಟೆಯಾಗಿ ಮತ್ತು ಮೊಂಡಾಗಿ ಕತ್ತರಿಸಲ್ಪಡುತ್ತವೆ. ಉದ್ದ ಕೂದಲಿನ ತುದಿಗಳು ನೈಸರ್ಗಿಕವಾಗಿ ನುಣ್ಣಗೆ ಮತ್ತು ನಯವಾಗಿರುತ್ತವೆ. ಆದರೆ, ಕತ್ತರಿಸಿದ ಕೂದಲಿನ ತುದಿಗಳು ತೀಕ್ಣವಾಗಿರುತ್ತದೆ. ಇದು ಸ್ಪರ್ಶಕ್ಕೆ ಒರಟಾಗಿ ಅನುಭವವನ್ನುಂಟು ಮಾಡುತ್ತದೆ. ಹಾಗಾಗಿ ಕೂದಲಿನ ತುದಿಗಳು ದಪ್ಪವಾಗಿ ಗೋಚರಿಸುತ್ತದೆ.

ಕೂದಲಿನ ಬೆಳವಣಿಗೆ ನೆತ್ತಿಯ ಮೇಲ್ಮೈಯಲ್ಲಿ ಅಲ್ಲ, ಬದಲಾಗಿ ಚರ್ಮದೊಳಗಿನ ಆಳವಾದ ಕೂದಲು ಕಿರುಚೀಲಗಳಲ್ಲಿ ಸಂಭವಿಸುತ್ತದೆ ಎಂದು ಸಂಶೋಧನೆ ತಿಳಿಸುತ್ತದೆ. ಶೇವಿಂಗ್ ಮಾಡುವುದರಿಂದ ಚರ್ಮದ ಮೇಲ್ಮೈಗಿಂತ ಮೇಲಿನ ಕೂದಲನ್ನು ಮಾತ್ರ ತೆಗೆದುಹಾಕುತ್ತದೆ. ಕೂದಲು ಬೆಳೆಯುವ ಚರ್ಮದ ಆಳವಾದ ಕಿರುಚೀಲಗಳನ್ನು ರೇಜರ್ ತಲುಪಲು ಸಾಧ್ಯವಿಲ್ಲ. ಆದ್ದರಿಂದ, ಶೇವಿಂಗ್ ಕೂದಲಿನ ಬೆಳವಣಿಗೆಯ ದಪ್ಪ ಅಥವಾ ವೇಗವನ್ನು ಬದಲಾಯಿಸುವುದಿಲ್ಲ. ನಿಮ್ಮ ನಿಜವಾದ ಕೂದಲಿನ ವಿನ್ಯಾಸವು ನಿಮ್ಮ ತಳಿಶಾಸ್ತ್ರ, ಆಹಾರ ಪದ್ಧತಿ, ಒತ್ತಡದ ಮಟ್ಟ ಮತ್ತು ಹಾರ್ಮೋನುಗಳ ಆರೋಗ್ಯವನ್ನು ಅವಲಂಬಿಸಿರುತ್ತದೆ.

ಕೆಲವೊಮ್ಮೆ, ಹೊಸದಾಗಿ ಬೆಳೆಯುವ ಕೂದಲು ಮೊದಲಿಗಿಂತ ಕಪ್ಪಾಗಿ ಕಾಣುತ್ತದೆ. ಏಕೆಂದರೆ ನಾವು ದೀರ್ಘಕಾಲದಿಂದ ಇಟ್ಟುಕೊಂಡಿರುವ ಕೂದಲು ಸೂರ್ಯನ ಬೆಳಕು, ಧೂಳು, ಮಾಲಿನ್ಯ ಮತ್ತು ಶಾಂಪೂವಿನಂತಹ ಉತ್ಪನ್ನಗಳಿಗೆ ಒಡ್ಡಿಕೊಳ್ಳುವುದರಿಂದ ಹಗುರವಾಗುತ್ತದೆ. ಆದಾಗ್ಯೂ, ನೀವು ನಿಮ್ಮ ಕೂದಲನ್ನು ಕತ್ತರಿಸುವುದರಿಂದ ಹೊಸ ಕೂದಲು ತಾಜಾವಾಗಿರುತ್ತದೆ ಜೊತೆಗೆ ಬಾಹ್ಯ ಅಂಶಗಳಿಗೆ ಒಳಗೊಂಡಿರುವುದಿಲ್ಲ. ಈ ಕೂದಲುಗಳು ತಾಜಾ, ಹಾನಿಯಾಗದ ಮತ್ತು ಗಾಢ ಬಣ್ಣದಲ್ಲಿರುತ್ತವೆ, ಕೂದಲು ದಪ್ಪ ಮತ್ತು ದಟ್ಟವಾಗಿದೆ ಎಂಬ ಭ್ರಮೆಯನ್ನು ಸೃಷ್ಟಿಸುತ್ತದೆ.

ತಜ್ಞರ ಪ್ರಕಾರ, ನೀವು ಕೂದಲು ಉದುರುವಿಕೆ ಅಥವಾ ಕೂದಲು ತೆಳುವಾಗುವುದರೊಂದಿಗೆ ಹೋರಾಡುತ್ತಿದ್ದರೆ ಇದಕ್ಕೆ ಕೂದಲನ್ನು ಕತ್ತರಿಸುವುದು ಪರಿಹಾರವಲ್ಲ ಎಂದು ಸಲಹೆ ನೀಡುತ್ತಾರೆ. ಇದು ಕೂದಲಿನ ಬೆಳವಣಿಗೆಯನ್ನು ಉತ್ತೇಜಿಸುವುದಿಲ್ಲ. ಬದಲಾಗಿ ಇದು ನೆತ್ತಿಯ ಕಿರಿಕಿರಿ, ಕಡಿತ ಅಥವಾ ಕೂದಲು ಉದುರುವಿಕೆಗೆ ಕಾರಣವಾಗಬಹುದು. ನಿಮ್ಮ ಕೂದಲಿನ ಆರೋಗ್ಯವನ್ನು ನಿಜವಾಗಿಯೂ ಸುಧಾರಿಸಲು ನೀವೇನಾದರೂ ಬಯಸಿದರೆ, ನಿಮ್ಮ ಆಹಾರದಲ್ಲಿ ಪ್ರೋಟೀನ್ ಹೆಚ್ಚಿಸಿ, ಒತ್ತಡವನ್ನು ಕಡಿಮೆ ಮಾಡಿ ಮತ್ತು ಚರ್ಮರೋಗ ವೈದ್ಯರನ್ನು ಸಂಪರ್ಕಿಸಿ (ಏಜೆನ್ಸೀಸ್).