‘ಸರ್ವೆ ಭವಂತು ಸುಖಿನಃ ಸರ್ವೆ ಸಂತು ನಿರಾಮಯಾಃ | ಸರ್ವೆ ಭದ್ರಾಣಿ ಪಶ್ಯಂತು ಮಾ ಕಶ್ಚಿತ್ ದುಃಖ ಭಾಗ್ಭವೇತ್’ || (ಸಮಸ್ತರೂ ಸುಖ-ಸಂತೋಷದಿಂದಿರಲಿ, ಸಮಸ್ತ ಜನರೂ ಆರೋಗ್ಯದಿಂದಿರಲಿ, ಸಮಸ್ತ ಜನರಿಗೆ ಸನ್ಮಂಗಲಕರವಾಗಿರುವುದರ ಅರಿವುಂಟಾಗಲಿ, ಯಾರೂ ಸಹ ದುಃಖಗಳಿಗೆ ಸಿಲುಕದಿರಲಿ.), ‘ಪರೋಪಕಾರಃ ಪುಣ್ಯಾಯ ಪಾಪಾಯ ಪರಪೀಡನಂ |’ (ಪರೋಪಕಾರವೇ ಪುಣ್ಯ, ಪರಪೀಡನೆಯೇ ಪಾಪ.) ಇತ್ಯಾದಿ ಉದಾತ್ತ ಆದರ್ಶಗಳನ್ನು ಜಗತ್ತಿಗೆ ಸಾರಿ ಹೇಳಿದ ಭಾರತೀಯರು ಅದನ್ನು ತಮ್ಮ ಬದುಕಿನ ರೀತಿಯಾಗಿಯೂ ಮಾಡಿಕೊಂಡವರು. ಇದನ್ನು ಅನುಷ್ಠಾನಗೊಳಿಸಲು ಶರೀರ ಸದೃಢವಾಗಿಯೂ, ಮನಸ್ಸು ಸ್ವಸ್ಥವಾಗಿಯೂ ಇರುವುದು ಅತ್ಯಗತ್ಯ. ‘ಆರೋಗ್ಯಂ ಭಾಸ್ಕರಾತ್ ಇಚ್ಛೇತ್’ ಎಂಬಂತೆ ಆರೋಗ್ಯರಕ್ಷಣೆ ಮತ್ತು ಸ್ವಾಸ್ಥ್ಯ ಸಂವರ್ಧನೆಗೆ ಸೂರ್ಯನ ಅನುಗ್ರಹ ಆವಶ್ಯಕ. ಇದನ್ನು ಪಡೆಯಲು ನಮ್ಮ ಹಿರಿಯರು ಕಂಡುಕೊಂಡ ಸರಳ ಸಾಧನಾಮಾರ್ಗವೇ ಸೂರ್ಯನಮಸ್ಕಾರ, ಸೂರ್ಯೋಪಾಸನೆ, ಸೂರ್ಯಸ್ನಾನ, ಸೂರ್ಯಯಜ್ಞ ಮುಂತಾದವು. ವಿಷ್ಣು ಅಲಂಕಾರಪ್ರಿಯ, ಶಿವ ಅಭಿಷೇಕಪ್ರಿಯ. ಹಾಗೆಯೇ ಸೂರ್ಯನು ನಮಸ್ಕಾರಪ್ರಿಯ.
