ಸಾಂಕ್ರಾಮಿಕದ ಸಮಯದಲ್ಲಿ ದಂತಚಿಕಿತ್ಸೆ ಪಡೆಯುವುದು ಸುರಕ್ಷಿತವೆ? ಹೇಗೆ? ಇಂಥ ಸಂದರ್ಭದಲ್ಲಿ ಹಲ್ಲಿನ ಸಮಸ್ಯೆ ಬಂದರೆ ಏನು ಮಾಡುವುದು? ಯಾವಾಗ ತುರ್ತು ಎಂದು ಪರಿಗಣಿಸಬೇಕು? ದಂತವೈದ್ಯರನ್ನು ಭೇಟಿ ಮಾಡುವುದು ಸೂಕ್ತವೇ? ಭೇಟಿಗೂ ಮುನ್ನ ಯಾವೆಲ್ಲ ಸುರಕ್ಷತಾ ಕ್ರಮಗಳನ್ನು ಅನುಸರಿಸಬೇಕು? ಹೀಗೆ ಹಲವು ಪ್ರಶ್ನೆಗಳು ಹಾಗೂ ಅನುಮಾನಗಳು ನಿಮ್ಮನ್ನು ಕಾಡುತ್ತಿರಬಹುದು. ಅವುಗಳ ಬಗ್ಗೆ ತಿಳಿದುಕೊಳ್ಳುವ ಪ್ರಯತ್ನ ಮಾಡೋಣ. ಹಲ್ಲುನೋವು ಅಥವಾ ಹಲ್ಲಿಗೆ ಸಂಬಂಧಿಸಿದ ಸಮಸ್ಯೆ ಬಂದಾಗ ಮೊದಲು ಫೋನ್ ಮೂಲಕ ವೈದ್ಯರನ್ನು ಸಂರ್ಪಸಿ ಸಲಹೆ ಪಡೆದು ನಂತರ ಚಿಕಿತ್ಸಾಲಯಕ್ಕೆ ಹೋಗುವುದು ಸೂಕ್ತ. ತುರ್ತಲ್ಲದ ಅಂದರೆ ನಿಯಮಿತವಾಗಿ ಮಾಡಿಸಿಕೊಳ್ಳುವ ದಂತ ತಪಾಸಣೆ, ಸೌಂದರ್ಯವರ್ಧಕ ಚಿಕಿತ್ಸೆಗಳು, ಹಲ್ಲುಗಳನ್ನು ಶುಚಿಗೊಳಿಸುವುದು, ದಂತಪಂಕ್ತಿಗಳ ಬದಲಾವಣೆ ಇದ್ದಲ್ಲಿ ಮುಂದೂಡುವುದೇ ಸೂಕ್ತ.
