ಡೆಂಟಲ್​ ಕೇರ್​: ನಿದ್ರೆಯಲ್ಲಿ ಹಲ್ಲು ಕಡಿಯುವಿರಾ?

ನೀವು ರಾತ್ರಿ ವೇಳೆ ಹಲ್ಲುಗಳನ್ನು ಕಚ್ಚುತ್ತೀರಾ? ಇದನ್ನು bruxism / night grinding ಎಂದು ಕರೆಯುತ್ತಾರೆ. ಕೆಲವರು ರಾತ್ರಿ ನಿದ್ರೆಯಲ್ಲಿ ಅರಿವಿಲ್ಲದೆ ಹಲ್ಲುಗಳನ್ನು ಕಡಿದರೆ (night bruxism), ಮತ್ತೆ ಕೆಲವರು ದಿನದ ಸಮಯದಲ್ಲಿ (awake bruxism) ಹಲ್ಲು ಕಡಿಯುತ್ತಾರೆ. ಇದಕ್ಕೆ ಹಲವಾರು ಕಾರಣಗಳಿವೆ. ಸಾಮಾನ್ಯವಾಗಿ ಮಾನಸಿಕ ಒತ್ತಡ, ಆತಂಕ, ಭಯ, ಕೋಪ, ಒತ್ತಡದಿಂದ ಕೂಡಿದ ಜೀವನಶೈಲಿ ಇವುಗಳಿಂದ ಇರಬಹುದು. ಕೆಲವು ಔಷಧಗಳ ಅಡ್ಡ ಪರಿಣಾಮದಿಂದಲೂ ಉಂಟಾಗಬಹುದು. ಇದು ಅನುವಂಶಿಯ ಕೂಡ. ಮಕ್ಕಳಲ್ಲಿ ಜಂತುಹುಳುಗಳಿಂದ ಕೂಡ ಹಲ್ಲು ಕಚ್ಚುವ ಸಾಧ್ಯತೆ ಇರುತ್ತದೆ (intestinal parasitic infection).

ಇದರ ಚಿಕಿತ್ಸಾಕ್ರಮಗಳನ್ನು ನೋಡೋಣ. ಈಗಾಗಲೇ ಹಾನಿಗೊಳಗಾಗಿರುವ ಹಲ್ಲುಗಳನ್ನು ಸರಿಪಡಿಸುವುದು ಮತ್ತು ಮತ್ತಷ್ಟು ಹಾನಿಗೊಳಗಾಗದಂತೆ ಮುಂದಿನ ಚಿಕಿತ್ಸಾಕ್ರಮಗಳನ್ನು ಯೋಜಿಸುವುದು ಮುಖ್ಯ. ಮೊದಲಿಗೆ ಈ ಸಮಸ್ಯೆಯ ಮೂಲ ಕಾರಣಗಳನ್ನು ಅರಿತುಕೊಳ್ಳಬೇಕು. ಒತ್ತಡದಿಂದ ಕೂಡಿದ ಜೀವನಶೈಲಿ, ಆತಂಕದಿಂದ ಉಂಟಾಗಿದೆ ಎಂದಾದರೆ ಅದನ್ನು ನಿಯಂತ್ರಿಸಲು ಪ್ರಯತ್ನಿಸಬೇಕು. ಯೋಗ, ಧ್ಯಾನ, ವಾಕಿಂಗ್, ಸಾಕಷ್ಟು ನಿದ್ರೆ ಮುಂತಾದ ಒತ್ತಡ ನಿವಾರಣಾ ತಂತ್ರಗಳನ್ನು ಅಭ್ಯಾಸ ಮಾಡುವುದು ಇದರ ನಿವಾರಣೆಗೆ ಸಹಾಯ ಮಾಡುತ್ತದೆ. ದಂತವೈದ್ಯರು ಹಲ್ಲುಗಳಿಗೆ night guard ಅಥವಾ splintಗಳನ್ನು ಬಳಸಲು ಸೂಚಿಸುತ್ತಾರೆ. ಇದರಿಂದ ಮುಂದಾಗುವ ಹಾನಿಯನ್ನು ನಿಯಂತ್ರಿಸಬಹುದು.