ಹಾಗಿದ್ದರೆ ಯಾವ ಆಹಾರ ವಸ್ತು ಯಾವ ರೀತಿ ಕಾರ್ಯವೆಸಗುತ್ತದೆ ಎಂದು ತಿಳಿಯುವುದಾದರೂ ಹೇಗೆಂಬ ಚಿಂತೆ ಮಾಡಬೇಕಾಗಿಲ್ಲ. ಕಾಲಮಾನ, ಋತುವಿನ ಗುಣ, ದೇಹದ ಪ್ರಕೃತಿ, ಶರೀರದ ಅಂಗಗಳ ಮೇಲೆ ಅದರ ಪರಿಣಾಮ, ಶರೀರದಲ್ಲಾದ ರೋಗದ ಸ್ಥಿತಿಗತಿ, ಆಹಾರ ದ್ರವ್ಯದ ಬೆಳವಣಿಗೆಯ ಹಂತ, ಬೆಳೆದ ಪ್ರದೇಶ, ಉಪಯೋಗದ ಸ್ವರೂಪ ಮುಂತಾದ ಅನೇಕ ಅಂಶಗಳನ್ನು ಅವಲಂಬಿಸಿ ಪ್ರಕ್ರಿಯೆಗಳು ನಡೆಯುತ್ತವೆ ಎಂಬುದಾಗಿ ಆಯುರ್ವೆದ ಹೇಳಿದ್ದು ಇವೆಲ್ಲವನ್ನೂ ಎಳೆಎಳೆಯಾಗಿ ಬಿಡಿಸಿ ಸ್ಪಷ್ಟವಾಕ್ಯಗಳಲ್ಲಿ ಬಿತ್ತರಿಸಿದೆ. ಸಾಂಕ್ರಾಮಿಕ ರೋಗ ಹರಡುತ್ತಿರುವ ಸಂದರ್ಭದಲ್ಲಿ ಆಹಾರ ಪದ್ಧತಿಯ ಸಮಗ್ರ ಪರಿಷ್ಕರಣೆ ಹಾಗೂ ಅನುಷ್ಠಾನದಿಂದ ರೋಗವನ್ನು ತಡೆಯುವುದು, ನಿಯಂತ್ರಿಸುವುದು, ಪರಿಹರಿಸುವುದು ಮೂರೂ ಸಾಧ್ಯವಾಗುತ್ತದೆ.
