ಹಲ್ಲಿನ ಜೋಡಣೆಯು ಸಾಮಾನ್ಯವಾಗಿರದೆ ವಕ್ರವಾಗಲು ಹಲವು ಕಾರಣಗಳಿವೆ. ಅತೀ ಸಾಮಾನ್ಯ ಕಾರಣಗಳೆಂದರೆ - ಬಾಯಿಯಲ್ಲಿ ಉಸಿರಾಡುವುದು, ಅನಿಯಮಿತವಾಗಿ ಬೆರಳನ್ನು ಚೀಪುವುದು, ಅವಧಿಗೂ ಮುನ್ನ ಹಾಲುಹಲ್ಲುಗಳನ್ನು ಕಳೆದುಕೊಳ್ಳುವುದು ಅಥವಾ ಬೀಳದೆ ಇರುವುದು ಮತ್ತು ಕೆಲವು ಸಂದರ್ಭಗಳಲ್ಲಿ ಇದು ಆನುವಂಶಿಯ ಕೂಡ ಆಗಿರುತ್ತದೆ. ವಕ್ರದಂತ ಚಿಕಿತ್ಸೆಯನ್ನು ಪ್ರಾರಂಭಿಸಲು ಯಾವುದೇ ವಯಸ್ಸು ಸೂಕ್ತವಾಗಿದ್ದು 8-14ನೇ ವಯಸ್ಸಿನಲ್ಲಿ ಹೆಚ್ಚು ಪರಿಣಾಮಕಾರಿಯಾಗಿರುತ್ತದೆ. ಏಳನೇ ವಯಸ್ಸಿನಲ್ಲಿಯೇ ಒಮ್ಮೆ ಪರಿಶೀಲಿಸುವುದು ಉತ್ತಮ. ಇದರಿಂದಾಗಿ ಮಗುವಿನ ಬೆಳವಣಿಗೆಯಲ್ಲಿ ಸಹಜವಾಗಿ ಆಗುವ ಬದಲಾವಣೆಗಳನ್ನು ಉಪಯೋಗಿಸಿಕೊಂಡು ಚಿಕಿತ್ಸೆ ನೀಡಬಹುದು.
