ಕುಕರ್ ಸ್ಪೇನಿಯಲ್ ತಳಿಯ ನಾಯಿಗೆ ಪೇಸ್​ಮೇಕರ್ ಸರ್ಜರಿ: ಭಾರತದಲ್ಲಿ ಇದೇ ಮೊದಲು ಪಶುವೈದ್ಯಕೀಯ ಪರಿಣತರು

ನವದೆಹಲಿ: ಭಾರತದ ಪಶುವೈದ್ಯಕೀಯ ಕ್ಷೇತ್ರಕ್ಕೆ ಸಂಬಂಧಿಸಿದ ಮಹತ್ವದ ಬೆಳವಣಿಗೆಯಲ್ಲಿ, ಏಳೂವರೆ ವರ್ಷದ ಕುಕರ್​ ಸಸ್ಪೇನಿಯಲ್ ತಳಿಯ ನಾಯಿಗೆ ಪೇಸ್​ಮೇಕರ್ ಇಂಪ್ಲಾಂಟ್​ ಸರ್ಜರಿಯನ್ನು ಯಶಸ್ವಿಯಾಗಿ ನೆರವೇರಿಸಲಾಗಿದೆ. ಭಾರತದಲ್ಲಿ ಪಶುವೈದ್ಯಕೀಯ ಕ್ಷೇತ್ರದಲ್ಲಿ ಇಂಥದ್ದೊಂದು ಸರ್ಜರಿ ಇದೇ ಮೊದಲು ಎಂದು ಪಶುವೈದ್ಯಕೀಯ ಪರಿಣತರು ಹೇಳಿದ್ದಾರೆ.

ಗುರುಗ್ರಾಮದ ಬುಲ್​ಬುಲ್ ಕುಮಾರ್ ಮತ್ತು ಆಕೆಯ ಮಗ ಮನು ಅವರು ಸಾಕಿದ ನಸು ಚಿನ್ನದ ಬಣ್ಣದ ಹೆಣ್ನು ನಾಯಿ ಖುಷಿ.ಇದಕ್ಕೇ ಹೃದಯದ ಸಮಸ್ಯೆ ಕಾಣಿಸಿಕೊಂಡದ್ದು.ಗ್ರೇಟರ್ ಕೈಲಾಶ್ 1ರ ಮ್ಯಾಕ್ಸ್​ ವೆಟ್ಸ್​ ಹಾಸ್ಪಿಟಲ್​ಗೆ ಖುಷಿಯನ್ನು ಕರೆತಂದಿದ್ದ ಅವರು, ವೈದ್ಯರ ಸಲಹೆಯಂತೆ ಪೇಸ್​ಮೇಕರ್ ಸರ್ಜರಿಗೆ ಒಳಪಡಿಸಿದರು. ಒಂದೂವರೆ ಗಂಟೆ ಕಾಲ ಸರ್ಜರಿ ನಡೆಯಿತು. ಇದಕ್ಕಾಗಿ ಪೀಡಿಯಾಟ್ರಿಕ್ ಪೇಸ್​ಮೇಕರನ್ನು ವಿದೇಶದಿಂದ ತರಿಸಲಾಗಿತ್ತು. ಡಾ.ಭಾನುದೇವ್ ಶರ್ಮಾ, ಡಾ.ಕುನಾಲ್ ದೇವ್ ಶರ್ಮಾ ಅವರನ್ನು ಒಳಗೊಂಡ ತಂಡ ಈ ಸರ್ಜರಿಯನ್ನು ನೆರವೇರಿಸಿತ್ತು.ಸರ್ಜರಿ ಯಶಸ್ವಿಯಾಗಿದ್ದು, ಖುಷಿ ಕ್ಷೇಮವಾಗಿದೆ ಎಂದು ಮನು ಹೇಳಿಕೊಂಡಿದ್ದಾರೆ.

ಸರ್ಜರಿಗೆ ಒಳಗಾಗುವ ಮೊದಲು ಅದರ ಹೃದಯ ಬಡಿತ ನಾರ್ಮಲ್ ಆಗಿ ಇರಬೇಕಾಗಿದ್ದ 60-120ರಿಂದ ಪ್ರತಿ ನಿಮಿಷಕ್ಕೆ 20 ಬಡಿತ ಕಡಿಮೆ ಆಗುತ್ತಿತ್ತು.ಕಳೆದ ವರ್ಷ ಇದೇ ನಾಯಿಗೆ ಕಿವಿಗೆ ಸಂಬಂಧಿಸಿದ ಸರ್ಜರಿಯನ್ನೂ ನೆರವೇರಿಸಲಾಗಿತ್ತು. ಆ ಸಂದರ್ಭದಲ್ಲಿ ಅದು ಅರಿವು ತಪ್ಪಿ ಬಿದ್ದಿತ್ತು.ಆಗ ಹೇಗೋ ಅದರ ಆರೋಗ್ಯವನ್ನು ಸುಧಾರಿಸಲಾಗಿತ್ತು. ತರುವಾಯ ಅದರ ಆರೋಗ್ಯ ತಪಾಸಣೆ ನಡೆಸಿದ ವೇಳೆ ಹೃದಯ ಸಮಸ್ಯೆ ಬಹಿರಂಗವಾಗಿತ್ತು.ಕೂಡಲೇ ಅಗತ್ಯಕ್ರಮಗಳನ್ನು ತೆಗೆದುಕೊಂಡು ಡಿಸೆಂಬರ್ 15ರಂದು ಈ ಪೇಸ್​ಮೇಕರ್ ಇಂಪ್ಲಾಂಟ್ ಸರ್ಜರಿ ನೆರವೇರಿಸಲಾಯಿತು ಎಂದು ಸರ್ಜನ್​ ಹೇಳಿದ್ದಾರೆ.(ಏಜೆನ್ಸೀಸ್)