ಸಂಕಷ್ಟ, ಬಿಕ್ಕಟ್ಟು, ದುಃಖ ಬಂದೆರಗಿದಾಗ ಮನುಷ್ಯನಿಗೆ ಗೋಚರಿಸುವ ಪರಿಹಾರ ಮಾರ್ಗವಾದರೂ ಯಾವುದು? ಒಂದೋ ಅಧ್ಯಾತ್ಮದ ತತ್ತ್ವಗಳತ್ತ ಹೊರಳಿ ಉತ್ತರ ಕಂಡುಕೊಳ್ಳುವುದು ಇಲ್ಲವೆ ಆತ್ಮಾವಲೋಕನ ಮಾಡಿಕೊಂಡು, ಸಮಾಧಾನ ಪಟ್ಟುಕೊಳ್ಳುವುದು. ಆತ್ಮಾವಲೋಕನ ಮಾಡಿಕೊಳ್ಳುವ ಸಂದರ್ಭಗಳು ಆಗಾಗ ಒದಗಿ ಬರುತ್ತವೆಯಾದರೂ, ನಾವೇ ಏನಾದರೂ ನೆಪ ಮಾಡಿಕೊಂಡು ಅಂಥ ಸನ್ನಿವೇಶಗಳಿಂದ ತಪ್ಪಿಸಿಕೊಳ್ಳಲು ಯತ್ನಿಸುತ್ತೇವೆ. ಎಷ್ಟೋ ಬಾರಿ ದಿನನಿತ್ಯದ ಪ್ರಸಂಗಗಳು ಅಥವಾ ಕೆಲ ಘಟನೆಗಳೇ ಮರೆಯಲಾರದ ಜೀವನಪಾಠ ಕಲಿಸಿ ಬಿಡುತ್ತವೆ. ಮುಖ್ಯವಾಗಿ, ಮಕ್ಕಳ ಲಾಲನೆಪಾಲನೆ ವಿಷಯದಲ್ಲಿ ಎಷ್ಟು ಜಾಗ್ರತೆ ವಹಿಸಿದರೂ ಕಡಿಮೆಯೇ. ಅದರಲ್ಲೂ, ಮಕ್ಕಳು ಪಾಲಕರ ನಡವಳಿಕೆಯನ್ನು ಗಮನಿಸುತ್ತ ಹಾಗೇ ಬೆಳೆಯುತ್ತಾರೆ ಎಂಬ ಮಾತು ಅಕ್ಷರಶಃ ನಿಜ. ಪಾಲಕರ ಜೀವನ ಮತ್ತು ಅವರ ಜೀವನದಲ್ಲಿನ ಘಟನೆಗಳು ಮಕ್ಕಳ ಮೇಲೆ ಪ್ರಭಾವ ಬೀರುತ್ತವೆ. ಆದರ್ಶ, ಮೌಲ್ಯ, ಪ್ರಾಮಾಣಿಕತೆ ಬಗ್ಗೆ ಹೇಳುತ್ತಲೇ ಮಕ್ಕಳ ವ್ಯಕ್ತಿತ್ವ ವಿಕಸನವಾಗುವಂತೆ ನೋಡಿಕೊಳ್ಳಬೇಕು.
