ಆಹಾರದಲ್ಲಿ ದೇಸಿ ಗೋವಿನ ಹಾಲು, ಬೆಣ್ಣೆ, ತುಪ್ಪ, ಕ್ಷೀರೋತ್ಪನ್ನಗಳು, ಎಮ್ಮೆಯ ತುಪ್ಪ, ಸಾಸಿವೆಎಣ್ಣೆ, ತೆಂಗಿನೆಣ್ಣೆ, ಮಾಕ್ಷಿಕ, ಕ್ಷೌದ್ರವೆಂಬ ಜೇನುತುಪ್ಪಗಳು, ಸಾವಯವ ದ್ರಾಕ್ಷಿ, ಮಾವಿನಹಣ್ಣು, ಹೇರಳೆಕಾಯಿ, ಬಾಳೆಹಣ್ಣು, ಸಿಹಿಹಾಲೆ ಸೊಪ್ಪು, ನುಗ್ಗೆಸೊಪ್ಪು, ಹೊನಗೊನ್ನೆ ಸೊಪ್ಪು, ಕೊಮ್ಮೆಗಿಡದ ಸೊಪ್ಪು, ಹಾಗಲಕಾಯಿ, ಕೆಂಪಕ್ಕಿ, ಗೋಧಿ, ಹೆಸರುಕಾಳು, ಎಳ್ಳು, ಸೈಂಧವ ಲವಣಗಳೆಲ್ಲ ಕಣ್ಣುಗಳಿಗೆ ಬಲ ತುಂಬುವ ಹಿತಕರ ಆಹಾರದ್ರವ್ಯಗಳು. ಬಜೆ, ಲವಂಗ, ಅರಿಶಿಣ, ಹಿಂಗು, ಬೆಳ್ಳುಳ್ಳಿ, ಕಾಳುಮೆಣಸು, ಶುಂಠಿ, ಹಿಪ್ಪಲಿ, ಜಾಯಿಕಾಯಿ, ಪಚ್ಚೆಕರ್ಪರ, ಬೆಟ್ಟದ ನೆಲ್ಲಿಕಾಯಿ, ಲಾವಂಚ, ಭೃಂಗರಾಜ, ಅಮೃತಬಳ್ಳಿ, ಜಾಜಿಮಲ್ಲಿಗೆ, ಕಹಿಬೇವು, ಯಷ್ಟಿಮಧು, ತುಳಸಿ, ಪಾರಿಜಾತ, ಹೊಂಗೆಮರ, ನೆಕ್ಕಿಗಿಡ, ನಿರ್ಮಲೀಮರ, ಲೋದ್ರ, ನೆಲಗುಳ್ಳ, ಪಲಾಶ, ಗುಗ್ಗುಲು, ಪ್ರಿಯಂಗು, ಹರಳು, ಉತ್ತರಣೆ, ತಾವರೆ, ಅತ್ತಿ, ಬನ್ನಿಮರ, ಆಲದಮರ, ಗರಿಕೆ, ಬಿಲ್ವಪತ್ರೆ, ಎಕ್ಕೆಗಿಡ, ಶ್ರೀಗಂಧ ಹಾಗೂ ತ್ರಿಫಲಾಚೂರ್ಣಗಳೆಲ್ಲ ನೇತ್ರಗಳಿಗೆ ಶಕ್ತಿ ಕೊಡುವ ಔಷಧೀಯ ದ್ರವ್ಯಗಳು. ಯೋಗಾಸನಗಳಲ್ಲಿ ಮತ್ಸ್ಯಾಸನ, ಜ್ಯೋತಿ ತ್ರಾಟಕ, ಶೀರ್ಷಾಸನಗಳು ನೇತ್ರರಕ್ಷಣೆಗೆ ನೆರವಾಗುತ್ತವೆ. ಹೊನಗೊನ್ನೆ ಸೊಪ್ಪಿಗೆ ಮೀನುಸೊಪ್ಪು ಎಂದೂ ಹೆಸರಿದೆ. ನೀರಿನೊಳಗಿದ್ದೂ ಕಣ್ಣಿನಿಂದ ಚೆನ್ನಾಗಿ ನೋಡುವ ಸಾಮರ್ಥ್ಯವುಳ್ಳ ಮೀನಿಗೆ ಇರುವಂತಹ ಕಣ್ಣಿನ ಶಕ್ತಿ ನೀಡಬಲ್ಲ ಸಸ್ಯವೆಂಬ ಅರ್ಥದಲ್ಲಿ ಈ ಹೆಸರು ಬಂದಿರುವುದು ವಿಶೇಷ!
