ಔಷಧೀಯ ಗುಣಗಳ ಆಗರ ನುಗ್ಗೆಕಾಯಿ

ಸಾಮಾನ್ಯವಾಗಿ ಎಲ್ಲರಿಗೂ ನುಗ್ಗೆಯ ಬಗ್ಗೆ ಗೊತ್ತಿರುತ್ತದೆ. ಅಡುಗೆಯಲ್ಲಿ ನುಗ್ಗೆಕಾಯಿ ಬಳಸಿದರೂ ನುಗ್ಗೆಸೊಪ್ಪಿನ ಬಳಕೆ ಕಡಿಮೆ. ಬಹುತೇಕ ಹಳ್ಳಿಗಳಲ್ಲಿ ನುಗ್ಗೆಮರವವನ್ನು ಕಾಣಬಹುದು. ವಿಟಮಿನ್ ಮಾತ್ರೆಗಳಿಗಿಂತ ಹೆಚ್ಚಿನ ಪೋಷಕಾಂಶಗಳನ್ನು ಹೊಂದಿರುವುದು ನುಗ್ಗೆಸೊಪ್ಪು.

ನಿಂಬೆ, ಕಿತ್ತಳೆಹಣ್ಣುಗಳಿಗಿಂತ ಏಳು ಪಟ್ಟು ಅಧಿಕ ಸಿ ವಿಟಮಿನ್ ನುಗ್ಗೆಸೊಪ್ಪಿನಲ್ಲಿದೆ. ಕ್ಯಾರೆಟ್​ಗಿಂತ ನಾಲ್ಕು ಪಟ್ಟು ಅಧಿಕ ಪ್ರಮಾಣದಲ್ಲಿ ಎ ಜೀವಸತ್ವವಿದೆ. ಹಾಲಿನಲ್ಲಿರುವ ಕ್ಯಾಲ್ಸಿಯಂಗಿಂತ ನಾಲ್ಕು ಪಟ್ಟು ಅಧಿಕ ಕ್ಯಾಲ್ಸಿಯಂ ಇದೆ. ಪಾಲಕ್ ಸೊಪ್ಪಿಗಿಂತ ಆರು ಪಟ್ಟು ಅಧಿಕ ಕಬ್ಬಿಣದ ಅಂಶ, ಮೊಟ್ಟೆಯ ಬಿಳಿ ಭಾಗಕ್ಕಿಂತ ಎರಡು ಪಟ್ಟು ಅಧಿಕ ಪ್ರೋಟೀನ್, ಬಾಳೆಹಣ್ಣಿಗಿಂತ ಮೂರು ಪಟ್ಟು ಅಧಿಕ ಪೊಟ್ಯಾಷಿಯಂ ಜೀವಸತ್ವಗಳು ನುಗ್ಗೆಸೊಪ್ಪಿನಲ್ಲಿವೆ.

ನುಗ್ಗೆಮರದ ಸೊಪ್ಪು, ಹೂವು, ಕಾಯಿ ಎಲ್ಲವೂ ಒಂದಲ್ಲ ಒಂದು ರೀತಿ ಪ್ರಯೋಜನಕಾರಿ. ಇದನ್ನು ಸಾಂಬಾರ್, ಸೂಪ್, ಪಲ್ಯ ಅಥವಾ ಜ್ಯೂಸ್ ಮಾಡಿಯೂ ಸೇವಿಸಬಹುದು.

• ಮೂತ್ರದಲ್ಲಿನ ಕಲ್ಲು ನಿವಾರಣೆಗೆ ನುಗ್ಗೆಸೊಪ್ಪಿನ ಜ್ಯೂಸ್ ಸಹಾಯ ಮಾಡುತ್ತದೆ.
• ಆಹಾರದಲ್ಲಿ ನಿಯತವಾಗಿ ನುಗ್ಗೆಯನ್ನು ಬಳಸುವುದರಿಂದ ಜಂತುಹುಳುಗಳನ್ನು ನಿಯಂತ್ರಿಸಬಹುದು.
• ನುಗ್ಗೆಸೊಪ್ಪಿನ ರಸದಲ್ಲಿ ಕಾಳುಮೆಣಸನ್ನು ಅರೆದು, ತಲೆಗೆ ಹಚ್ಚುವುದರಿಂದ ತಲೆನೋವು ನಿವಾರಣೆಯಾಗುತ್ತದೆ.
• ದೇಹದಲ್ಲಿ ಕೆಂಪು ರಕ್ತಕಣಗಳನ್ನು ಹೆಚ್ಚಿಸುವ ಕಬ್ಬಿಣದಂಶವನ್ನು ನುಗ್ಗೆಸೊಪ್ಪು ಹೊಂದಿದ್ದು, ಇದು ರಕ್ತಹೀನತೆಯನ್ನು ನಿವಾರಿಸುತ್ತದೆ.
• ವಾರಕ್ಕೊಮ್ಮೆಯಾದರೂ ನುಗ್ಗೆಸೊಪ್ಪನ್ನು ಆಹಾರದ ರೂಪದಲ್ಲಿ ಬಳಸುವುದರಿಂದ ಹೃದಯರೋಗದ ಸಮಸ್ಯೆಯನ್ನು ದೂರವಿಡಬಹುದು.
• ನುಗ್ಗೆಸೊಪ್ಪನ್ನು ಕಿವುಚಿದ ನೀರನ್ನು ತಲೆಗೆ ಹಾಕಿಕೊಂಡು ಅರ್ಧ ಗಂಟೆಯ ನಂತರ ತಲೆಸ್ನಾನ ಮಾಡುವುದರಿಂದ ಕೂದಲಿನ ಸಮಸ್ಯೆ ದೂರವಾಗುತ್ತದೆ.
• ದೇಹದಲ್ಲಿ ಕೆಟ್ಟ ಕೊಲೆಸ್ಟ್ರಾಲ್ ಅಂಶವನ್ನು ಕಡಿಮೆ ಮಾಡುವಲ್ಲಿ ನುಗ್ಗೆಸೊಪ್ಪು ಪ್ರಯೋಜನಕಾರಿ. ಇದರ ಬಳಕೆಯಿಂದ ದೇಹದ ತೂಕವನ್ನು ಕಡಿಮೆ ಮಾಡಿಕೊಳ್ಳಬಹುದು.
• ದೇಹದಲ್ಲಿ ಇನ್ಸುಲಿನ್ ಪ್ರಮಾಣವನ್ನು ಹೆಚ್ಚಿಸುವ ನುಗ್ಗೆಸೊಪ್ಪನ್ನು ದೈನಂದಿನ ಆಹಾರದಲ್ಲಿ ಅಳವಡಿಸಿಕೊಳ್ಳುವುದರಿಂದ ಮಧುಮೇಹವನ್ನು ನಿಯಂತ್ರಣದಲ್ಲಿರಿಸಬಹುದು.
• ನುಗ್ಗೆಸೊಪ್ಪಿಗೆ ಸ್ವಲ್ಪ ನಿಂಬೆರಸ ಸೇರಿಸಿ, ಅರೆದು, ಮುಖಕ್ಕೆ ಹಚ್ಚಿ ನಂತರ ತಣ್ಣೀರಿನಲ್ಲಿ ಮುಖ ತೊಳೆಯುವುದರಿಂದ ಮೊಡವೆಗಳು ನಿವಾರಣೆಯಾಗುತ್ತವೆ.