ಏಕೆಂದರೆ ಇದನ್ನು ಬೇಲಿಗೆ ಸಾಲಾಗಿ ನೆಡುತ್ತಾರೆ. ದನ, ಕುರಿ ಮುಂತಾದ ಯಾವ ಪ್ರಾಣಿಯೂ ಇದನ್ನು ಸೇವಿಸದೇ ಇರುವುದು ಇದಕ್ಕೆ ಕಾರಣವಿರಬಹುದು. ಆಯುರ್ವೆದದ ಗ್ರಂಥಕಾರರು ಇದು ವಾಂತಿ, ಚರ್ಮದ ಕಾಯಿಲೆಗಳು, ಅತಿಯಾದ ಬಾಯಾರಿಕೆ, ರಕ್ತಸ್ರಾವ, ಹೃದಯಕ್ಕೆ ಸಂಬಂಧಪಟ್ಟ ಸಮಸ್ಯೆಗಳು, ಕಫ, ಕೆಮ್ಮು, ಅಸ್ತಮಾ, ಅಲರ್ಜಿ ಮುಂತಾದ ಶ್ವಾಸಕ್ಕೆ ಸಂಬಂಧಪಟ್ಟ ಸಮಸ್ಯೆಗಳು, ಜೊತೆಗೆ ಮಧುಮೇಹ ಮತ್ತು ಕಾಮಾಲೆಯಂತಹ ಸಮಸ್ಯೆಗಳಲ್ಲಿ ಕೂಡ ಅನುಕೂಲಕರ ಎಂದು ಹೇಳಿದ್ದಾರೆ. ಇದರ ಸೇವನೆಯಿಂದ ಮೂತ್ರಪ್ರವೃತ್ತಿ ಚೆನ್ನಾಗಿ ಆಗುತ್ತದೆ. ಇಂದು ನಾವು ಮುಖ್ಯವಾಗಿ ಕಫ, ಕೆಮ್ಮು, ಅಸ್ತಮಾದ ಸಮಸ್ಯೆಗಳಲ್ಲಿ ಇದರ ಬಳಕೆಯನ್ನು ಹೇಗೆ ಮಾಡಿಕೊಳ್ಳಬಹುದು ಎಂಬುದನ್ನು ತಿಳಿದುಕೊಳ್ಳೋಣ. ನಿರಂತರವಾಗಿ ಅಥವಾ ಪದೇ ಪದೇ ಕಫ, ಕೆಮ್ಮು ಮುಂತಾದ ಸಮಸ್ಯೆಗಳನ್ನು ಅನುಭವಿಸುತ್ತಿರುವವರು ಆಡುಸೋಗೆ ಸೊಪ್ಪಿನ ಒಂದಷ್ಟು ಎಲೆಗಳನ್ನು ತಂದು ಉಗಿಯಲ್ಲಿ ಬೇಯಿಸಿ ನಂತರ ಜಜ್ಜಿ ರಸವನ್ನು ಹಿಂಡಬೇಕು. ಎರಡು ಚಮಚ ಹಿಂಡಿದ ರಸಕ್ಕೆ ಒಂದು ಚಮಚ ಜೇನುತುಪ್ಪ, ಎರಡ್ಮೂರು ಚಿಟಿಕೆ ಹಿಪ್ಪಲಿ ಪುಡಿಯನ್ನು ಹಾಕಿ ಬೆಳಿಗ್ಗೆ ಖಾಲಿ ಹೊಟ್ಟೆಯಲ್ಲಿ ಸೇವಿಸಿದರೆ ನಿಧಾನವಾಗಿ ಕಫಕ್ಕೆ ಸಂಬಂಧಪಟ್ಟ ತೊಂದರೆಗಳು ನಿವಾರಣೆಯಾಗುತ್ತವೆ. ಅಸ್ತಮಾ ಕೂಡಾ ಚೆನ್ನಾಗಿ ಹತೋಟಿಯಲ್ಲಿರಲು ಸಾಧ್ಯವಾಗುತ್ತದೆ. ಹೆಚ್ಚಿನ ಪ್ರಮಾಣದಲ್ಲಿ ಸೇವಿಸಿದರೆ ವಾಂತಿಯಾಗುವ ಸಾಧ್ಯತೆ ಹೆಚ್ಚು; ಹಾಗೆ ವಾಂತಿಯಾದಾಗ ಕಫ ಹೋದರೆ ಸಮಸ್ಯೆಗಳಲ್ಲಿ ಎಷ್ಟೋ ನಿರಾಳವಾಗುತ್ತದೆ. ಆದರೆ ಹಾಗೆ ಅಷ್ಟೊಂದು ಪ್ರಮಾಣದಲ್ಲಿ ಸೇವಿಸುವ ಮೊದಲು ವೈದ್ಯರ ಸಲಹೆ ಪಡೆದುಕೊಳ್ಳುವುದು ಅನಿವಾರ್ಯ. ಉಗಿಯಲ್ಲಿ ಬೇಯಿಸುವುದು ಕಷ್ಟವಾದರೆ ಸ್ವಲ್ಪ ನೀರು ಹಾಕಿ ಜಜ್ಜಿ ಕೂಡಾ ರಸವನ್ನು ತೆಗೆಯಬಹುದು. ಆದರೆ ಉಗಿಯಲ್ಲಿ ಬೇಯಿಸಿಯೇ ತೆಗೆಯುವುದು ಹೆಚ್ಚು ಒಳ್ಳೆಯದು.
