ಗೂಡು ಬರಿದಾಗುವ ಆತಂಕಕ್ಕೆ ವಾಸ್ತವ ಅರಿಯುವುದೇ ಮದ್ದು

ಅದೊಂದು ಸುಂದರ ಕೂಡು ಕುಟುಂಬ. ಮನೆಯಲ್ಲಿ ಎಲ್ಲವೂ ಇತ್ತು. ಈ ಮನೆಯ ಯಜಮಾನರಿಗೆ ಒಬ್ಬನೇ ಮಗ. ತಂದೆ ತೀರಾ ಹೇಳಿಕೊಳ್ಳುವಂತಹ ಆರ್ಥಿಕ ಹಿನ್ನೆಲೆಯಿಂದ ಬಂದವರಲ್ಲ. ಮಿಡಲ್ ಕ್ಲಾಸ್ ಫ್ಯಾಮಿಲಿ. ಇದ್ದುದರಲ್ಲೇ ಮಗನಿಗೆ ಉತ್ತಮ ಶಿಕ್ಷಣ ಕೊಡಿಸಿದ ನೆಮ್ಮದಿ ಆ ಪಾಲಕರದು. ಅದಕ್ಕೆ ಪೂರಕವಾಗಿ ಮಗನೂ ಉತ್ತಮವಾಗಿ ಓದಿದ. ಒಳ್ಳೆಯ ಫಲಿತಾಂಶದೊಂದಿಗೆ ತೇರ್ಗಡೆ ಹೊಂದಿ ಒಳ್ಳೆಯ ಕೆಲಸವನ್ನೂ ಪಡೆದ. ಹೆತ್ತವರ ಬದುಕಿಗೆ ಸಾರ್ಥಕತೆ ತಂದುಕೊಟ್ಟ. ಮನೆ ಮಂದಿ ಎಲ್ಲ ಸಂತಸ ಗೊಂಡರು. ಇದಾದ ಕೆಲ ದಿನಗಳ ನಂತರ ಒಳ್ಳೆಯ ಸಂಬಂಧ ಹುಡುಕಿ ಮಗನಿಗೆ ಮದುವೆಯನ್ನೂ ಮಾಡಿದರು. ಸೊಸೆಯೂ ಅಷ್ಟೇ ಉತ್ತಮ ಗುಣದವಳು ಸಿಕ್ಕಳು. ಇದೇ ಸಂತಸದಲ್ಲಿ ದಿನಗಳು ಸಾಗಹತ್ತಿದವು. ಆಗ ಎಲ್ಲವೂ ಸರಿ ಇತ್ತು. ಮುಂದೊಂದು ದಿನ ಮಗನಿಗೆ ಉದ್ಯೋಗ ನಿಮಿತ್ತ ವಿದೇಶಕ್ಕೆ ಹೋಗುವ ಅನಿವಾರ್ಯತೆ ಎದುರಾಯಿತು. ಇದು ಒಂದೆಡೆ ಸಂತಸ, ಅಭಿಮಾನ ಮೂಡಿಸಿದರೆ ಇನ್ನೊಂದೆಡೆ ಮಗನನ್ನು ಬಿಟ್ಟು ಇರಬೇಕೆನ್ನುವ ವಿರಹ ವೇದನೆಯಿಂದ ಮಾನಸಿಕ ಖಿನ್ನತೆಗೆ ಕಾರಣವಾಯಿತು.

ಏನಿದಕ್ಕೆ ಮದ್ದು?: ಬದಲಾದ ಸನ್ನಿವೇಶದಲ್ಲಿ ಇಂದು ಇದ್ದಲ್ಲಿಯೇ ಉದ್ಯೋಗ ಅಥವಾ ವ್ಯವಹಾರ ಅನೇಕರಿಗೆ ಮಾಡಲಿಕ್ಕಾಗಲಿಕ್ಕಿಲ್ಲ. ಆ ನಂತರ ಈಗಿನ ಜನಾಂಗದ ಮಕ್ಕಳ ಅಭಿರುಚಿ ಭಿನ್ನವಾಗಿರುತ್ತದೆ. ಮಹಾತ್ವಾಕಾಂಕ್ಷೆ ಉಳ್ಳವರಾಗಿರುತ್ತಾರೆ. ಏನೋ ಒಂದು ಮಹತ್ಸಾಧನೆಯ ಕನಸು ಕಂಡಿರುತ್ತಾರೆ. ಅದಕ್ಕೆಂದು ವಿದೇಶ, ಪರ ರಾಜ್ಯ ವಲಸೆ ಅನಿವಾರ್ಯವಾಗುತ್ತದೆ. ಈ ಅನಿವಾರ್ಯತೆ ಮತ್ತು ಅದರಲ್ಲಿ ಮಕ್ಕಳ ಕನಸು ನನಸಾಗುವುದನ್ನು ಪಾಲಕರು ಯೋಚಿಸಬೇಕು. ಇಂದಿನ ಯುವಕರು ಅಪ್ಪ ನೆಟ್ಟ ಆಲದಮರದ ಕೆಳಗೆ ಇರಲು ಆಗಲಿಕ್ಕಿಲ್ಲ. ಹೊಸತನ್ನು ಬಯಸುತ್ತಾರೆ. ತಮ್ಮ ಮಕ್ಕಳ ಈ ಹೊಸ ಯತ್ನಕ್ಕೆ ಪಾಲಕರಾದವರು ಪೋ›ತ್ಸಾಹಿಸಬೇಕು. ಆತ ಭೌತಿಕವಾಗಿ ದೂರವಾದರೂ ಒಂದು ಸಾಧನೆಯ ಕನಸು ಹೊತ್ತು ಹೋಗಿದ್ದಾನೆ ಎಂದು ಹೆಮ್ಮೆ ಪಡಬೇಕು. ನಕಾರಾತ್ಮಕ ಚಿಂತನೆಗೆ ಅವಕಾಶ ಕೊಡಬಾರದು. ಒಂದು ವೇಳೆ ಖಿನ್ನತೆ, ಬೇಸರ, ದುಃಖ ಎನಿಸಿದರೆ ಕೂಡಲೇ ಮನೋವೈದ್ಯರನ್ನು ಸಂರ್ಪಸಿ ಸಲಹೆ ಪಡೆಯಿರಿ.

ಮಕ್ಕಳು ದೂರವಾದಾಗ ಸಮಯ ಕಳೆಯಲು ನೂರೆಂಟು ದಾರಿಗಳಿವೆ. ಸ್ನೇಹಿತರೊಡನೆ ಪ್ರವಾಸ ಮಾಡಿ. ಸಮಾಜಮುಖಿ ವ್ಯಕ್ತಿತ್ವ ಬೆಳೆಸಿಕೊಳ್ಳಿ. ಸಂಘಜೀವಿಯಾಗಿ. ಕ್ರಿಯಾಶೀಲತೆ ತನ್ನಿಂದ ತಾನೇ ಬರುತ್ತದೆ. ಆಗ ಏಕಾಂಗಿತನದ ಸಮಸ್ಯೆ ಉದ್ಭವಿಸುವುದೇ ಇಲ್ಲ. ಓದಿನ ಹವ್ಯಾಸ ಇರಲಿ. ಹೊಸ ಸ್ಥಳ, ಹೊಸತನ್ನು ನೋಡುವ ತುಡಿತವಿರಲಿ. ನೆರೆ ಹೊರೆಯವರೊಡನೆ ಬೆರೆತು ಬಾಳಿ. ಬದುಕಿನ ವಾಸ್ತವ ಅರಿತು ಬಾಳಿ. ಹೇಗೆ ಪಕ್ಷಿಗಳಿಗೆ ರೆಕ್ಕೆ ಪುಕ್ಕಗಳು

ಬರುತ್ತಿದ್ದಂತೆ ಗೂಡು ತೊರೆದು ಹಾರಿಹೋಗುತ್ತವೆಯೋ ಹಾಗೇ ಮಕ್ಕಳು ಸಹ ಅನಿವಾರ್ಯ ಕಾರ್ಯಗಳಿಂದ ಮನೆ ತೊರೆಯುತ್ತಾರೆ. ಇದರಿಂದ ಪಾಲಕರಾದವರು ಬೇಸರ ಮಾಡಿಕೊಳ್ಳದೇ ಮನಸ್ಸಿನಲ್ಲೇ ತುಂಬಿದ ಗೂಡಿನ ಪರಿಕಲ್ಪನೆ ಮಾಡಿಕೊಂಡು ಜೀವನ ರಥ ಸಾಗಿಸಬೇಕು. ಇದುವೇ ನಿತ್ಯ ಸತ್ಯ.