‘ಸೂರ್ಯಮಂಡಲವು ರೋಗಗಳನ್ನು ನಾಶ ಮಾಡುವುದರಲ್ಲಿ ಅತ್ಯಂತ ಸಮರ್ಥವಾಗಿದೆ. ಋಕ್, ಯಜುಸ್, ಸಾಮ ಎಂಬ ಮೂರು ವೇದಗಳಲ್ಲಿಯೂ ಸೂರ್ಯಮಂಡಲವು ಅತ್ಯಂತ ಶ್ರೇಷ್ಠವಾಗಿ ಗಾನ ಮಾಡಲ್ಪಟ್ಟಿದೆ. ಸೂರ್ಯಮಂಡಲವು ಭೂಃ, ಭುವಃ, ಸುವಃ ಎಂಬ ಮೂರು ಲೋಕಗಳನ್ನೂ ಬೆಳಗುತ್ತಿದೆ. ಅತ್ಯಂತ ಪವಿತ್ರವೂ ಪ್ರಾರ್ಥನೀಯವೂ ಆದ ಆ ಸೂರ್ಯಮಂಡಲವು ನನ್ನನ್ನು ಪವಿತ್ರಗೊಳಿಸಲಿ’ ಎಂಬುದು ಈ ಶ್ಲೋಕದ ಅರ್ಥವಾಗಿದೆ. ಪ್ರತಿದಿನದ ಸಂಧ್ಯೋಪಾಸನೆಯೂ ಸೂರ್ಯೋಪಾಸನೆಯೇ ಆಗಿದೆ. ಇದು ಗಾಯತ್ರಿಯ ಉಪಾಸನೆಯೂ ಆಗಿದೆ. ದೀರ್ಘಾಯುಸ್ಸು, ಶುದ್ಧವಾದ ಪ್ರಜ್ಞೆ, ಕೀರ್ತಿ, ಬ್ರಹ್ಮವರ್ಚಸ್ಸುಗಳನ್ನು ಪಡೆಯಲು ಗಾಯತ್ರಿಯ ಉಪಾಸನೆಯು ಏಕಮಾತ್ರ ಕಾರಣವಾಗಿದೆ. ಮೂರು ಸಂಧ್ಯಾಕಾಲಗಳಲ್ಲಿಯೂ ಪ್ರಾಣಾಯಾಮ ಮತ್ತು ಸಮಾಧಿಯ ಮೂಲಕವಾಗಿ ಸವಿತೃ ಭಗವಂತನ ವರೇಣ್ಯವಾದ ತೇಜಸ್ಸನ್ನು ಧ್ಯಾನ ಮಾಡುತ್ತ ಗಾಯತ್ರಿ ಮಂತ್ರಜಪವನ್ನು ಮಾಡಬೇಕು. ಹೀಗೆ ಗಾಯತ್ರಿ ಜಪದ ಮೂಲಕವಾಗಿ ಸೂರ್ಯ ಭಗವಂತನ ಉಪಾಸನೆ ನಡೆಯುತ್ತದೆ.
