ಅದೊಂದು ಕಚೇರಿ. ಅಲ್ಲಿನ ಕೆಲಸಗಾರ ಕಚೇರಿಯ ಎಲ್ಲಾ ಕೆಲಸಗಳಲ್ಲಿ ಸಕ್ರಿಯವಾಗಿ ತೊಡಗಿಕೊಂಡಿರುತ್ತಿದ್ದ. ಮೇಲಧಿಕಾರಿ ಹೇಳಿದ್ದನ್ನು ವಿಧೇಯತೆಯಿಂದ ಪಾಲಿಸುತ್ತಿದ್ದ. ಆ ಮೇಲಧಿಕಾರಿ ಮಾತ್ರ ಈತನನ್ನು ಪ್ರಶಂಸಿಸುವುದನ್ನು ಬಿಟ್ಟು ಸದಾ ನಿಂದಿಸುತ್ತಿದ್ದರು. ಇದರಿಂದ ಬೇಸತ್ತ ಕೆಲಸಗಾರ ಕ್ರಮೇಣ ಉತ್ಸಾಹ ಕಳೆದುಕೊಂಡ. ತಾನು ಅತಿಯಾಗಿ ಗೌರವಿಸುವ ಅಧಿಕಾರಿ ಒಂದು ದಿನವೂ ತನ್ನೊಡನೆ ಆತ್ಮೀಯವಾಗಿ ನಡೆದುಕೊಳ್ಳುತ್ತಿಲ್ಲವಲ್ಲ ಎನ್ನುವ ಕೊರಗು ಅವನಲ್ಲಿ ಮನೆಮಾಡಿತು. ಒಬ್ಬ ಸಂತರ ಬಳಿ ಹೋಗಿ ಅಳಲನ್ನು ತೋಡಿಕೊಂಡ. ಸಂತರು ಅವನನ್ನು ಆಶ್ರಮದ ಗೋಶಾಲೆಗೆ ಕರೆದುಕೊಂಡು ಹೋದರು. ಅಲ್ಲಿರುವ ಹತ್ತಾರು ದನಕರುಗಳಿಗೆ ಮೇವು ನೀಡುತ್ತಾ ಹೋದರು. ಸಂತರನ್ನು ಕಂಡು ಜಿಗಿದು ಕುಣಿದ ಹಸುಕರುಗಳು ಮೇವು ತಿಂದು, ನಂತರ ಸಂತರ ಕೈಯನ್ನು ನೆಕ್ಕುತ್ತ ಪ್ರೀತಿಯನ್ನು ವ್ಯಕ್ತಪಡಿಸಿದವು. ಹಾಗೆ ಮುಂದುವರಿದು ಸಂತರು ಒಂದು ಹೋರಿಯ ಬಳಿ ಬಂದರು.
