ಬೈರುತ್​ ಸ್ಫೋಟಕ್ಕೆ ಸರ್ಕಾರವೂ ಪತನ; ಸಂಪುಟ ಸಭೆ ಬಳಿಕ ಎಲ್ಲ ಸಚಿವರ ರಾಜೀನಾಮೆ

ಬೈರುತ್​: ಲೆಬನಾನ್​ ರಾಜಧಾನಿಯಲ್ಲಿ ಸಂಭವಿಸಿದ ಭೀಕರ ಅಮೋನಿಯಂ ನೈಟ್ರೇಟ್​ ಸ್ಫೋಟದ ಬಳಿಕ ಹೆಚ್ಚಾದ ಜನರ ಆಕ್ರೋಶಕ್ಕೆ ಸರ್ಕಾರವೇ ಪತನವಾಗಿದೆ.

ಸಂಪುಟ ಸಭೆ ಬಳಿಕ ಪ್ರಧಾನಿ ಹಸನ್​ ದಯಾಬ್​ ಎಲ್ಲ ಸಚಿವರ ರಾಜೀನಾಮೆಗಳನ್ನು ರಾಷ್ಟ್ರಾಧ್ಯಕ್ಷರಿಗೆ ಸಲ್ಲಿಸಿದ್ದಾರೆ ಎಂದು ಆರೋಗ್ಯ ಸಚಿವ ಹಮದ್​ ಸುದ್ದಿಗಾರರಿಗೆ ತಿಳಿಸಿದ್ದಾರೆ.

ಸ್ಫೋಟದ ಬಳಿಕ ಜನರು ಬೀದಿಗಿಳಿದು ಪ್ರತಿಭಟನೆ ನಡೆಸುತ್ತಿದ್ದಾರೆ. ಸರ್ಕಾರದ ವಿರುದ್ಧ ಜನರ ಆಕ್ರೋಶ ಹೆಚ್ಚಾಗಿದೆ. ಹೀಗಾಗಿ ಬಹಳಷ್ಟು ಸಚಿವರು ರಾಜೀನಾಮೆ ನೀಡುವ ಅಥವಾ ಅಧಿಕಾರ ತ್ಯಜಿಸುವ ಇಚ್ಛೆ ವ್ಯಕ್ತಪಡಿಸಿದ್ದರು. ಈ ಕಾರಣಕ್ಕಾಗಿಯೇ ಸಚಿವ ಸಂಪುಟವೇ ರಾಜೀನಾಮೆ ಸಲ್ಲಿಸಿದೆ ಎಂದು ಅವರು ಹೇಳಿದ್ದಾರೆ.

ಇದನ್ನೂ ಓದಿ; ಪ್ರತಿದಾಳಿಗೆ ಅಣುಶಕ್ತಿಯನ್ನೇ ಬಳಸ್ತೀವಿ; ರಷ್ಯಾ ಸೇನೆ ನೀಡಿದೆ ಎಚ್ಚರಿಕೆ 

ಸ್ಫೋಟದ ಬಳಿಕ ದೇಶದಲ್ಲಿ ಸರ್ಕಾರದ ವಿರುದ್ಧ ಪ್ರತಿಭಟನೆಯ ಹೊಸ ಅಲೆಯೇ ಶುರುವಾಗಿದೆ. 2013ರಲ್ಲಿ ಸಂಗ್ರಹಿಸಿಡಲಾಗಿದ್ದ ಅಮೋನಿಯಂ ನೈಟ್ರೇಟ್​ನಿಂದ ಅಪಾಯ ಕಾದಿದೆ ಎಂದು ಹಲವು ಎಚ್ಚರಿಕೆಗಳನ್ನು ನೀಡಿದ್ದರೂ ಸರ್ಕಾರ ನಿರ್ಲಕ್ಷ್ಯ ವಹಿಸಿತ್ತು ಎಂಬುದು ಜನರ ಆಕ್ರೋಶಕ್ಕೆ ಕಾರಣವಾಗಿದೆ.

ಜನರು ಸಂಸತ್ ಬಳಿಯೇ ಪ್ರತಿಭಟನೆ ನಡೆಸಿದ್ದರು. ಕಲ್ಲುತೂರಾಟ, ದೊಂಬಿ, ಬೆಂಕಿ ಹಚ್ಚುವುದು ಮೊದಲಾದ ದುಷ್ಕೃತ್ಯಗಳಲ್ಲಿ ತೊಡಗಿದ್ದಾರೆ. ಆಗಸ್ಟ್​ 4ರಂದು ಸಂಭವಿಸಿದ ಸ್ಫೋಟದಲ್ಲಿ ಈವರೆಗೆ 160 ಜನರು ಮೃತಪಟ್ಟಿದ್ದರೆ, 6000 ಜನರು ಗಾಯಗೊಂಡಿದ್ದಾರೆ. ಅಂದಾಜು ಮೂರು ಲಕ್ಷ ಮನೆಗಳಿಗೆ ಹಾನಿಯಾಗಿದೆ ಎಂದು ಅಂದಾಜಿಸಲಾಗಿದೆ.

https://www.vijayavani.net/after-explosion-lebanon-has-grain-that-is-not-enough-for-a-month/