ಚಿತ್ರೀಕರಣ ನಿಲ್ಲಿಸಿದ ಮೊದಲ ಐದಾರು ದಿನಗಳ ಕಾಲ ಬಹಳ ಖುಷಿಯಾಗಿದ್ದರಂತೆ ಪದ್ಮಜಾ ರಾವ್. ‘ಮಕ್ಕಳಿಗೆ ಬೇಸಿಗೆ ರಜೆ ಬಂದಾಗ ಖುಷಿಯಾಗಿರುತ್ತಾರಲ್ಲ, ನಾನೂ ಖುಷಿಯಾಗಿದ್ದೆ. ಬೆಳಿಗ್ಗೆ ಬೇಗ ಏಳುವ ಹಾಗಿಲ್ಲ, ಶೂಟಿಂಗ್ಗೆ ಹೋಗುವ ಹಾಗಿಲ್ಲ ಎಂದು ಒಂದಿಷ್ಟು ದಿನ ಎಂಜಾಯ್ ಮಾಡಿದೆ. ಮೂರ್ನಾಲ್ಕು ವಾರಗಳ ಕಾಲ ಲಾಕ್ಡೌನ್ ಮುಂದುವರೆದಾಗ ಭಯ ಶುರುವಾಯ್ತು. ಸುಮ್ಮನೆ ಕೂತು ಸಾಕಾಯ್ತು. ಎಷ್ಟು ದಿನ ಅಂತ ಮುಂದೇನು ಎಂದು ಹೆದರುತ್ತಾ ಕೂರೋದು? ಅದರಿಂದ ಆಚೆ ಬರಲೇ ಬೇಕು. ಹಾಗಾಗಿ ‘ಒಂದು ಗಿಫ್ಟ್ನ ಕಥೆ’ ಎಂಬ ಕಿರುಚಿತ್ರ ಮಾಡಿದೆ’ ಎಂದು ನೆನಪಿಸಿಕೊಳ್ಳುತ್ತಾರೆ ಪದ್ಮಜಾ ರಾವ್. ‘ಒಂದು ಗಿಫ್ಟ್ನ ಕಥೆ’, ಪದ್ಮಜಾ ನಿರ್ದೇಶಿಸಿದ ಒಂದು ಕಿರುಚಿತ್ರ. ಲಾಕ್ಡೌನ್ ಸಮಯದಲ್ಲಿ ಸಂಪೂರ್ಣ ಮನೆಯಲ್ಲೇ ಕೂತು ಮಾಡಿದ ಚಿತ್ರ ಅದು. ‘ಕಿರುಚಿತ್ರ ಮಾಡಿದ ನಾಲ್ಕು ವಾರಗಳಿವೆಯಲ್ಲ, ನನ್ನ ಲೈಫ್ನಲ್ಲೇ ಮರೆಯುವುದಕ್ಕೆ ಸಾಧ್ಯವಿಲ್ಲ. ಚಿತ್ರಗಳಲ್ಲಿ ನಾನು ಪೋಷಕ ಪಾತ್ರಗಳಲ್ಲೇ ಹೆಚ್ಚು ಕಾಣಿಸಿಕೊಳ್ಳುತ್ತೇನೆ. ಆದರೆ, ಈ ಚಿತ್ರ ಮಾಡುವಾಗ ನಾನೇ ಹೀರೋ, ನಾನೇ ಹೀರೋಯಿನ್ ಎಂಬ ಭಾವನೆ ನನ್ನಲ್ಲಿತ್ತು. ಅಷ್ಟೊಂದು ಸಂತೋಷವಾಗಿದ್ದ ನನಗೆ, ಕ್ರಮೇಣ ಸಿನಿಮಾ ಮುಗಿಯುತ್ತಿದ್ದಂತೆ, ಮತ್ತೆ ಭಯ ಶುರುವಾಯ್ತು. ಖಾಲಿ ಕೂರೋದು ಒಂದು ಕಡೆಯಾದರೆ, ಬ್ಯಾಂಕ್ ಬ್ಯಾಲೆನ್ಸ್ ಸಹ ಕಡಿಮೆಯಾಗುತ್ತಿದೆ’ ಎನ್ನುತ್ತಾರೆ ಪದ್ಮಜಾ. ಈ ಮಧ್ಯೆಯೇ, ‘ಒಂದು ಗಿಫ್ಟ್ನ ಕಥೆ’ ನೋಡಿರುವವರೊಬ್ಬರು, ಚಿತ್ರ ನಿರ್ದೇಶಿಸಿಕೊಡುವುದಕ್ಕೆ ಆಫರ್ ಕೊಟ್ಟಿದ್ದಾರಂತೆ. ‘ಐದಾರು ವರ್ಷಗಳಿಂದ ತಲೆಯಲ್ಲೊಂದು ಕಥೆ ಇತ್ತು. ಆ ಕಥೆ ಚಿತ್ರವಾಗುತ್ತಿದೆ. ಸದ್ಯಕ್ಕೆ ಅದರಲ್ಲೇ ಮುಳುಗಿದ್ದೇನೆ. ಎಲ್ಲಾ ಅಂದುಕೊಂಡಂತೆ ಆದರೆ, ಆಗಸ್ಟ್ ಕೊನೆಯ ಹೊತ್ತಿಗೆ ಚಿತ್ರ ಶುರುವಾಗಬಹುದು’ ಎನ್ನುತ್ತಾರೆ ಪದ್ಮಜಾ ರಾವ್.
