ಇಂದು-ನಾಳೆ ಜಿಂಬಾಬ್ವೆ ಎದುರು ಕೊನೇ ಎರಡು ಟಿ20 ಹಣಾಹಣಿ; ಸರಣಿ ವಶದ ಹಂಬಲದಲ್ಲಿ ಯುವ ಭಾರತ

ಹರಾರೆ: ಆರಂಭಿಕ ಪಂದ್ಯದ ಆಘಾತದ ಬಳಿಕ ಸತತ 2 ಪಂದ್ಯಗಳಲ್ಲಿ ಭರ್ಜರಿ ಗೆಲುವು ದಾಖಲಿಸಿರುವ ಭಾರತದ ಯುವ ತಂಡ ಇದೀಗ ಸರಣಿ ವಶಪಡಿಸಿಕೊಳ್ಳಲು ಸಜ್ಜಾಗಿದೆ. ಆತಿಥೇಯ ಜಿಂಬಾಬ್ವೆ ವಿರುದ್ಧದ 5 ಪಂದ್ಯಗಳ ಟಿ20 ಸರಣಿಯ ಕೊನೇ 2 ಪಂದ್ಯಗಳು ಶನಿವಾರ ಮತ್ತು ಭಾನುವಾರ ನಡೆಯಲಿದ್ದು, ಶುಭಮಾನ್​ ಗಿಲ್​ ಬಳಗ ಗೆಲುವಿನ ಓಟ ಮುಂದುವರಿಸುವ ಹಂಬಲದಲ್ಲಿದೆ.

ಸರಣಿಯ ಮೊದಲ ಪಂದ್ಯದಲ್ಲಿ ಭಾರತಕ್ಕೆ ಬ್ಯಾಟಿಂಗ್​ ವಿಭಾಗ ಕೈಕೊಟ್ಟಿತ್ತು. ಹಿರಿಯರ ಟಿ20 ವಿಶ್ವಕಪ್​ ಗೆಲುವಿನ ಸಂಭ್ರಮಾಚರಣೆಯ ನಡುವೆ ಯುವ ಬ್ಯಾಟರ್​ಗಳು ಮೈಮರೆತಿದ್ದರು. ಆದರೆ ಕಳೆದೆರಡು ಪಂದ್ಯಗಳಲ್ಲಿ ಭಾರತ ತಂಡ ತನ್ನ ಬ್ಯಾಟಿಂಗ್​ ಶಕ್ತಿಯನ್ನು ಪ್ರದರ್ಶಿಸಿದೆ. ಅಭಿಷೇಕ್​ ಶರ್ಮ, ಶುಭಮಾನ್​ ಗಿಲ್​ ಮತ್ತು ಋತುರಾಜ್​ ಗಾಯಕ್ವಾಡ್​ ರನ್​ಮಳೆ ಹರಿಸಿದ್ದಾರೆ. ಈ ಮೂಲಕ ರೋಹಿತ್​ ಶರ್ಮ ಮತ್ತು ವಿರಾಟ್​ ಕೊಹ್ಲಿ ನಿವೃತ್ತಿಯ ನಂತರದಲ್ಲಿ ಟಿ20 ತಂಡದಲ್ಲಿ ಖಾಲಿಯಾಗಿರುವ ಅಗ್ರ ಕ್ರಮಾಂಕದ ಬ್ಯಾಟರ್​ ಸ್ಥಾನವನ್ನು ಒಲಿಸಿಕೊಳ್ಳಲು ಪೈಪೋಟಿ ನಡೆದಿದೆ. ಇದೇ ವೇಳೆ ರವೀಂದ್ರ ಜಡೇಜಾರಿಂದ ತೆರವಾಗಿರುವ ಸ್ಥಾನಕ್ಕೆ ತಾನೇ ಸೂಕ್ತ ಅಭ್ಯರ್ಥಿ ಎಂದು ವಾಷಿಂಗ್ಟನ್​ ಸುಂದರ್​ ನಿರೂಪಿಸಿದ್ದಾರೆ. ಇದರಿಂದಾಗಿ ಅವರು ಮುಂಬರುವ ಶ್ರೀಲಂಕಾ ಪ್ರವಾಸದ ಟಿ20 ಸರಣಿಗೂ ಸ್ಥಾನ ಉಳಿಸಿಕೊಳ್ಳುವ ಭರವಸೆಯಲ್ಲಿದ್ದಾರೆ.

ಟಿ20 ವಿಶ್ವಕಪ್​ ಗೆಲುವಿನ ಬಳಿಕ ಜಿಂಬಾಬ್ವೆಯಲ್ಲಿ 3ನೇ ಪಂದ್ಯಕ್ಕೆ ಮರಳಿದ ಸಂಜು ಸ್ಯಾಮ್ಸನ್​ ಮತ್ತು ಶಿವಂ ದುಬೆಗೆ ಹೆಚ್ಚಿನ ಅವಕಾಶ ಲಭಿಸಲಿಲ್ಲ. ಆದರೆ ಇವರು ಈಗಲೂ ತಂಡದ ಪ್ರಮುಖ ಆಟಗಾರರೇ ಆಗಿದ್ದಾರೆ. ಇನ್ನು ಸ್ಪಿನ್ನರ್​ ರವಿ ಬಿಷ್ಣೋಯಿ ಕೂಡ ಸರಣಿಯಲ್ಲಿ ಭಾರತದ ಪ್ರಮುಖ ಅಸ್ತ್ರವೆನಿಸಿದ್ದಾರೆ.

ಟೀಮ್​ ನ್ಯೂಸ್​:

ಭಾರತ: 4ನೇ ಪಂದ್ಯಕ್ಕೆ ಭಾರತದ ಬ್ಯಾಟಿಂಗ್​ ವಿಭಾಗದಲ್ಲಿ ಬದಲಾವಣೆ ಸಾಧ್ಯತೆ ಇಲ್ಲ. ಆದರೆ 4ನೇ ಪಂದ್ಯದಲ್ಲೇ ಸರಣಿ ಗೆದ್ದರೆ ಕೊನೇ ಪಂದ್ಯಕ್ಕೆ ಕೆಲ ಬದಲಾವಣೆ ನಿರೀಸಬಹುದು. ಇನ್ನು ಬೌಲಿಂಗ್​ ವಿಭಾಗದಲ್ಲಿ ಕಳೆದ ಪಂದ್ಯದಿಂದ ವಿಶ್ರಾಂತಿ ಪಡೆದಿದ್ದ ಮುಕೇಶ್​ ಕುಮಾರ್​ ಈ ಬಾರಿ ಮರಳಬಹುದು ಮತ್ತು ಆವೇಶ್​ ಖಾನ್​ಗೆ ವಿಶ್ರಾಂತಿ ನೀಡಬಹುದು.

ಜಿಂಬಾಬ್ವೆ: ಸರಣಿಯ ಮೊದಲ ಪಂದ್ಯ ಗೆದ್ದು ಬೀಗಿದ್ದ ಜಿಂಬಾಬ್ವೆ ಕಳೆದೆರಡು ಪಂದ್ಯಗಳಲ್ಲಿ ಭಾರತೀಯ ಬಲಿಷ್ಠ ಆಟದೆದುರು ಮಂಕಾಗಿದೆ. ವೇಗಿ ಬ್ಲೆಸಿಂಗ್​ ಮುಜರಬಾನಿಗೆ ಇತರರಿಂದ ಸಮರ್ಥ ಬೆಂಬಲ ಸಿಗುತ್ತಿಲ್ಲ. ಇದರ ನಡುವೆಯೂ ತಂಡದಲ್ಲಿ ಬದಲಾವಣೆ ಅನುಮಾನ.

ಆರಂಭ: ಸಂಜೆ 4.30

ನೇರಪ್ರಸಾರ: ಸೋನಿ ಸ್ಪೋರ್ಟ್ಸ್​ ನೆಟ್​ವರ್ಕ್​

ಆರಂಭಿಕರಿಗೆ ಆದ್ಯತೆ, ಮಧ್ಯಮ ಕ್ರಮಾಂಕದ ಬ್ಯಾಟರ್ಸ್​ ಕಡೆಗಣನೆ!

ಭಾರತ ತಂಡ ಕಳೆದ ಟಿ20 ವಿಶ್ವಕಪ್​ನಲ್ಲಿ ವಿರಾಟ್​ ಕೊಹ್ಲಿಗೆ 3ನೇ ಕ್ರಮಾಂಕದಿಂದ ಆರಂಭಿಕನಾಗಿ ಬಡ್ತಿ ನೀಡಿ, ತಂಡದ ತಜ್ಞ ಆರಂಭಿಕ ಯಶಸ್ವಿ ಜೈಸ್ವಾಲ್​ರನ್ನು ಆಡುವ 11ರ ಬಳಗದಿಂದ ಹೊರಗಿಟ್ಟಿತ್ತು. ಆದರೆ ಇದೀಗ ಜಿಂಬಾಬ್ವೆ ಪ್ರವಾಸದಲ್ಲಿ ಆರಂಭಿಕರಿಗೆ ಹೆಚ್ಚಿನ ಆದ್ಯತೆ ನೀಡಿ ಮಧ್ಯಮ ಕ್ರಮಾಂಕದ ಬ್ಯಾಟರ್​ಗಳನ್ನು ಹೊರಗಿಡುತ್ತಿರುವುದು ವಿಚಿತ್ರವೆನಿಸುತ್ತಿದೆ. ಐಪಿಎಲ್​ ಸಹಿತ ಸಾಮಾನ್ಯವಾಗಿ ಟಿ20ಯಲ್ಲಿ ಆರಂಭಿಕರಾಗಿ ಆಡುವ ನಾಲ್ವರು ಬ್ಯಾಟರ್​ಗಳೇ (ಶುಭಮಾನ್​ ಗಿಲ್​, ಯಶಸ್ವಿ ಜೈಸ್ವಾಲ್​, ಅಭಿಷೇಕ್​ ಶರ್ಮ, ಋತುರಾಜ್​ ಗಾಯಕ್ವಾಡ್​) ಕಳೆದ ಪಂದ್ಯದಲ್ಲಿ ಅಗ್ರ 4 ಕ್ರಮಾಂಕದಲ್ಲಿ ಆಡಿದ್ದರು. ಇದೇ ವೇಳೆ ಮಧ್ಯಮ ಕ್ರಮಾಂಕದ ಬ್ಯಾಟರ್​ ರಿಯಾನ್​ ಪರಾಗ್​ರನ್ನು ಹೊರಗಿಡಲಾಗಿತ್ತು. 2026ರ ಟಿ20 ವಿಶ್ವಕಪ್​ಗೆ ತಂಡ ಕಟ್ಟಲು ಮುಂದಾಗಿರುವ ಈ ಸಮಯದಲ್ಲಿ ತಂಡದ ಈ ನಡೆ ಗೊಂದಲ ಮೂಡಿಸಿದೆ.

https://www.vijayavani.net/mysore-warriors-talent-hunt-for-future-cricket-stars