ಉಳ್ಳಾಲ: ಕುಂಪಲ ಶ್ರೀ ಬಾಲಕೃಷ್ಣ ಮಂದಿರದ ಆಶ್ರಯದಲ್ಲಿ ಪ್ರತಿವರ್ಷ ಆಚರಿಸಲಾಗುವ ಕುಂಪಲಾಷ್ಟಮಿಯಲ್ಲಿ ಗಮನಸೆಳೆಯುತ್ತಿದ್ದ ಡಿಜೆ ಸೌಂಡನ್ನು ಈ ವರ್ಷದಿಂದ ನಿಲ್ಲಿಸಲಾಗುತ್ತಿದೆ.
ಶ್ರೀಕೃಷ್ಣ ಜನ್ಮಾಷ್ಟಮಿ ಅದ್ದೂರಿಯಾಗಿ ಆಚರಿಸಲ್ಪಡುವ ಪ್ರಮುಖ ಪ್ರದೇಶಗಳಲ್ಲಿ ಕುಂಪಲವೂ ಒಂದು. ಇಲ್ಲಿನ ಶ್ರೀ ಬಾಲಕೃಷ್ಣ ಮಂದಿರದ ಆಶ್ರಯದಲ್ಲಿ ಪ್ರತಿವರ್ಷ ಕುಂಪಲಾಷ್ಟಮಿ ಅದ್ದೂರಿಯಾಗಿ ನಡೆಸಲಾಗುತ್ತಿದೆ. ಆದರೆ ಈ ಬಾರಿ ಡಿ.ಜೆ.ಗೆ ಬ್ರೇಕ್ ಹಾಕುವ ತೀರ್ಮಾನವನ್ನು ಸಮಿತಿ ತೆಗೆದುಕೊಂಡಿದೆ.
ಆ.15ರಂದು ಕುಂಪಲಾಷ್ಟಮಿ ಉತ್ಸವ ನಡೆಯಲಿದ್ದು ಸಂಜೆ ನಡೆಯುವ ಭವ್ಯ ಶೋಭಾಯಾತ್ರೆಯಲ್ಲಿ ಸಂಘ-ಸಂಸ್ಥೆಗಳ ಪೌರಾಣಿಕ ದೃಶ್ಯರೂಪಕ, ಹುಲಿವೇಷ ಕುಣಿತ, ವಿವಿಧ ವಾಧ್ಯಘೋಷಗಳು ಇರಲಿವೆ. ಆದರೆ ಡಿ.ಜೆ.ಸೌಂಡ್‌ಗೆ ಅವಕಾಶ ನೀಡದಿರಲು ಮಂದಿರದ ಸದಸ್ಯರು, ಊರಿನ ಸಂಘ-ಸಂಸ್ಥೆಗಳ ಪ್ರತಿನಿಧಿಗಳ ಸಭೆಯಲ್ಲಿ ತೀರ್ಮಾನಿಸಲಾಗಿದೆ.
ಶ್ರೀಕೃಷ್ಣ ಜನ್ಮಾಷ್ಟಮಿ ಸಂಸ್ಕಾರಯುತವಾಗಿ ನಡೆಯಲು ಹಾಗೂ ಆರೋಗ್ಯದ ಹಿತದೃಷ್ಟಿಯಿಂದಲೂ ಈ ತೀರ್ಮಾನ ಕೈಗೊಳ್ಳಲಾಗಿದೆ ಎನ್ನುವುದು ಸಂಘಟಕರ ಅಭಿಪ್ರಾಯ.
