ತೆಲಂಗಾಣ: ಭಾರತದಲ್ಲಿ ಸೋನಿಯಾ ಗಾಂಧಿ, ನರೇಂದ್ರ ಮೋದಿ, ಅಮಿತಾಬ್ ಬಚ್ಚನ್ ಸೇರಿ ಅನೇಕ ಪ್ರಸಿದ್ಧ ವ್ಯಕ್ತಿಗಳ ಪ್ರತಿಮೆ ನಿರ್ಮಿಸಿಕೊಂಡು ಅದನ್ನೇ ದೇವರೆಂದು ಪೂಜಿಸುವ ಜನರನ್ನು ನೋಡಿದ್ದೇವೆ. ಆದರೆ ಇಲ್ಲೊಬ್ಬ ವ್ಯಕ್ತಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ನನ್ನು ತನ್ನ ದೇವನೆಂದು ನಂಬಿ ಅವನ ಪ್ರತಿಮೆಗೇ ಪ್ರತಿ ದಿನ ಪೂಜೆ ಮಾಡುತ್ತಿದ್ದಾನೆ.
ತೆಲಂಗಾಣದ ಒಂದು ಪುಟ್ಟ ಹಳ್ಳಿಯಲ್ಲಿ ಒಬ್ಬಂಟಿಯಾಗಿ ಜೀವಿಸುತ್ತಿರುವ ಕೃಷ್ಣ ಹೆಸರಿನ ವ್ಯಕ್ತಿಗೆ ನಾಲ್ಕು ವರ್ಷಗಳ ಹಿಂದೆ ಅಮೆರಿಕದ ಡೊನಾಲ್ಡ್ ಟ್ರಂಪ್ ತನ್ನ ಕನಸಿನಲ್ಲಿ ಬಂದಿದ್ದನಂತೆ. ಅಂದಿನಿಂದ ಆತ ಟ್ರಂಪ್ನನ್ನೇ ದೇವರು ಎಂದು ನಂಬಲಾರಂಭಿಸಿದನಂತೆ.
ಜನರೆಲ್ಲ ಶಿವನನ್ನು ನಂಬುವಂತೆ ನಾನು ಟ್ರಂಪ್ನನ್ನು ನಂಬುತ್ತೇನೆ. ನಾನು ದೇವರಲ್ಲಿ ಏನೂ ಬೇಡಿಕೊಳ್ಳುವುದಿಲ್ಲ ಆದರೆ ಟ್ರಂಪ್ ಬಳಿ ಬೇಡಿಕೊಳ್ಳುತ್ತೇನೆ ಎಂದಿದ್ದಾರೆ ಟ್ರಂಪ್ ಭಕ್ತ ಕೃಷ್ಣ.
ಕೃಷ್ಣಗೆ ಟ್ರಂಪ್ನ ಬಗ್ಗೆ ಅದೆಷ್ಟು ಭಕ್ತಿ ಇದೆ ಎಂದರೆ ಆತ ತನ್ನ ಮನೆಯ ಜಾಗದಲ್ಲಿ ಟ್ರಂಪ್ನ ಪ್ರತಿಮೆಯೊಂದನ್ನು ನಿರ್ಮಿಸಿಕೊಂಡು ಪ್ರತಿನಿತ್ಯ ಅದಕ್ಕೆ ಪೂಜೆ ಮಾಡುತ್ತಾನೆ. ಆಗಾಗ ಹಾಲಿನ ಅಭಿಷೇಕವೂ ನೆರವೇರುತ್ತದೆ. ಈ ಪ್ರತಿಮೆ ನಿರ್ಮಾಣ ಮಾಡಿದಾಗಿನಿಂದ ಆತನನ್ನು ಊರಿನ ಜನರು ಟ್ರಂಪ್ ಕೃಷ್ಣ ಎಂದು ಕರೆಯಲಾರಂಭಿಸಿದ್ದು, ಆತನ ಮನೆಯನ್ನು ಟ್ರಂಪ್ ಮನೆ ಎಂದೇ ಕರೆಯಲಾರಂಭಿಸಿದ್ದಾರೆ.
ಕೃಷ್ಣ ಈ ರೀತಿಯಲ್ಲಿ ಟ್ರಂಪ್ನ ಆರಾಧನೆ ಮಾಡುತ್ತಿರುವುದರಿಂದಾಗಿ ನಮಗೆಲ್ಲ ಅವಮಾನವಾಗುತ್ತಿದೆ ಎಂದು ಅವನ ಕುಟುಂಬಸ್ಥರೆಲ್ಲ ಆತನನ್ನು ದೂರು ಮಾಡಿದ್ದಾರೆ. ಆದರೆ ಕೃಷ್ಣ ಮಾತ್ರ ಕುಟುಂಬದವರಿಗೆ ದೇವರು ಎಷ್ಟು ಮುಖ್ಯವೋ ನನಗೆ ಟ್ರಂಪ್ ಅಷ್ಟೇ ಮುಖ್ಯ ಎಂದು ಒಬ್ಬಂಟಿಗರಾಗೇ ಉಳಿದಿದ್ದಾರೆ. ಮನೆಯ ಗೋಡೆಗಳೆಲ್ಲೆಲ್ಲ ಟ್ರಂಪ್ನ ಹೆಸರನ್ನು ಬರೆದುಕೊಂಡಿದ್ದಾರೆ ಎನ್ನಲಾಗಿದೆ.
ಭಾರತಕ್ಕೆ ಫೆ.24 ಮತ್ತು 25ರಂದು ಡೊನಾಲ್ಡ್ ಟ್ರಂಪ್ ಆಗಮಿಸಲಿದ್ದು ಅಂದು ತನಗೆ ಟ್ರಂಪ್ನನ್ನು ಭೇಟಿ ಮಾಡಲು ಅವಕಾಶ ಮಾಡಿಕೊಡಿ ಎಂದು ಕೃಷ್ಣ ಕೇಂದ್ರ ಸರ್ಕಾರದ ಬಳಿ ಕೇಳಿಕೊಂಡಿದ್ದಾನೆ, ನಾನು ಟ್ರಂಪ್ ಭಕ್ತ, ಪ್ರತಿ ಶುಕ್ರವಾರ ಟ್ರಂಪ್ನ ಒಳಿತಿಗಾಗಿ ಉಪವಾಸ ಮಾಡುತ್ತೇನೆ. ಸರ್ಕಾರ ನನಗೆ ಟ್ರಂಪ್ನ ಭೇಟಿ ಮಾಡಲು ಅವಕಾಶ ಮಾಡಿಕೊಡಬೇಕು ಎಂದು ಆತ ಕೇಳಿದ್ದಾನೆ. (ಏಜೆನ್ಸೀಸ್)