ಪುಣೆ: ಕನ್ನಡಿಗ ಕೆಎಲ್ ರಾಹುಲ್ ತವರು ನೆಲ ಬೆಂಗಳೂರಿನಲ್ಲಿ ನಡೆದ ಮೊದಲ ಟೆಸ್ಟ್ ಪಂದ್ಯದ ಎರಡೂ ಇನಿಂಗ್ಸ್ಗಳಲ್ಲಿ ವೈಫಲ್ಯ ಕಂಡ ಬಳಿಕ ಕ್ರಿಕೆಟ್ ಪ್ರೇಮಿಗಳಿಂದ ತೀವ್ರ ಟೀಕೆಗಳಿಗೆ ಗುರಿಯಾಗಿದ್ದರು. ಶುಭಮಾನ್ ಗಿಲ್ ಬದಲಿಗೆ ಸ್ಥಾನ ಪಡೆದಿದ್ದ ಸರ್ಫ್ರಾಜ್ ಖಾನ್ ಶತಕ ಸಿಡಿಸಿ ಮಿಂಚಿದ್ದರು. ಹೀಗಾಗಿ ಪುಣೆ ಟೆಸ್ಟ್ಗೆ ಗಿಲ್ ಫಿಟ್ ಆಗಿ ಮರಳಿದರೆ ಸ್ರಾರ್ಜ್ ಬದಲಿಗೆ ರಾಹುಲ್ ಸ್ಥಾನ ಬಿಟ್ಟುಕೊಡಬೇಕಾಗುತ್ತದೆ ಎನ್ನಲಾಗಿತ್ತು. ಆದರೆ ಮಂಗಳವಾರ ಪುಣೆಯಲ್ಲಿ ಭಾರತ ತಂಡದ ಮೊದಲ ಅಭ್ಯಾಸ ಅವಧಿಯ ನಡುವೆ ಸುದ್ದಿಗೋಷ್ಠಿಗೆ ಹಾಜರಾದ ಸಹಾಯಕ ಕೋಚ್ ರ್ಯಾನ್ ಟೆನ್ ಡೋಶೆಟ್ ಆ ಸಾಧ್ಯತೆಯನ್ನು ತಳ್ಳಿಹಾಕಿದ್ದು, ಕೆಎಲ್ ರಾಹುಲ್ ಪುಣೆ ಟೆಸ್ಟ್ನಲ್ಲೂ ಸ್ಥಾನ ಉಳಿಸಿಕೊಳ್ಳುವ ಸೂಚನೆ ರವಾನಿಸಿದ್ದಾರೆ. 32 ವರ್ಷದ ರಾಹುಲ್ ಬೆಂಗಳೂರಿನಲ್ಲಿ 0 ಮತ್ತು 12 ರನ್ ಗಳಿಸಿದ್ದರು.
