‘ಈ ಸಲದ ಕಥೆಗಳನ್ನು ಓದಿದಾಗ ಕಥೆಗಾರರು, ಕಥೆ ಹೇಳಲು ಭಾಷಾ ಹಿಡಿತ ಉತ್ತಮ ಮಟ್ಟದಲ್ಲಿರಬೇಕು ಎಂಬುದನ್ನು ಮನಗಂಡಂತೆ ಭಾಸವಾಗುತ್ತದೆ. ಕೆಲವು ವರುಷಗಳ ಹಿಂದೆ ಭಾಷೆಯ ಮಟ್ಟಿಗೆ ಇಂತಹ ಹಿಡಿತ ಸ್ಪರ್ಧೆಗೆ ಬಂದ ಕಥೆಗಳಲ್ಲಿ ಇತ್ತೆಂದು ಹೇಳಲಾಗದು. ಕನ್ನಡದಲ್ಲಿ ಇತ್ತೀಚೆಗೆ ಹೆಚ್ಚಾಗುತ್ತಿರುವ ಅಭಿಜಾತ ಸಾಹಿತ್ಯ, ಅನುವಾದ ಸಾಹಿತ್ಯಗಳು ಮತ್ತು ಸಾಹಿತ್ಯೇತರ ಕೃತಿಗಳ ಓದು ಅದಕ್ಕೆ ಕಾರಣವಾಗಿರಬಹುದು. ಭಾಷೆ ಅಲ್ಲದೆ ಲೇಖಕರಿಗೆ ಹೇಳುವುದಕ್ಕೆ ಬೇರೆ ಮಾಧ್ಯಮಗಳಿಲ್ಲ. ಹಾಗಾಗಿ ಲೇಖಕರಲ್ಲಿ ಹೆಚ್ಚಾಗುತ್ತಿರುವ ಭಾಷೆಯ ಬಗೆಗಿನ ಅರಿವು ಸಂತೋಷದ ವಿಚಾರ. ಕೇವಲ ವಿವರಣೆಗಳಲ್ಲಿ ವಿರಮಿಸದೆ ಕಥೆಯನ್ನೊಂದು ಅನುಭವವಾಗಿ ಪರಿವರ್ತಿಸಬೇಕೆಂಬ ಲೇಖಕರ ಪ್ರಯತ್ನ ಭರವಸೆದಾಯಕ’ ಎಂದು ತೀರ್ಪಗಾರರಾದ ಎಚ್. ದಂಡಪ್ಪ ಹಾಗೂ ಎಸ್.ಆರ್. ವಿಜಯಶಂಕರ ಅಭಿಪ್ರಾಯಪಟ್ಟಿದ್ದಾರೆ. ಪ್ರಥಮ, ದ್ವಿತೀಯ, ತೃತೀಯ ಬಹುಮಾನಿತ ಕಥೆಗಳು ‘ವಿಜಯವಾಣಿ’ ದೀಪಾವಳಿ ವಿಶೇಷಾಂಕದಲ್ಲಿ ಪ್ರಕಟವಾಗಲಿದ್ದು, ವಿಶೇಷಾಂಕ ಶೀಘ್ರವೇ ಮಾರುಕಟ್ಟೆಗೆ ಬರಲಿದೆ. ಬಹುಮಾನಿತ ಹಾಗೂ ಮೆಚ್ಚುಗೆ ಪಡೆದ ಕಥೆಗಳು vijayavani.net ವೆಬ್ಸೈಟ್ನಲ್ಲಿ ಪ್ರಕಟವಾಗಲಿವೆ.
