ರಾಜ್ಯ ಸರ್ಕಾರ ಹೊಸದಾಗಿ ರೂಪಿಸಿದ ‘ಜಿಲ್ಲಾಧಿಕಾರಿಗಳ ನಡೆ ಹಳ್ಳಿಯ ಕಡೆ’ ಗ್ರಾಮವಾಸ್ತವ್ಯ ಯೋಜನೆ ಆಶಾದಾಯಕವಾಗಿದ್ದರೂ, ಕಾಟಾಚಾರಕ್ಕೆ ನಡೆಯಬಾರದು. ರಾಜ್ಯದ ಹಲವಾರು ಹಳ್ಳಿಗಳು ಇಂದಿಗೂ ಮೂಲಸೌಕರ್ಯಗಳಿಂದ ವಂಚಿತವಾಗಿದ್ದು, ನಾಗರಿಕರು ಹಲವಾರು ಸಮಸ್ಯೆಗಳನ್ನು ಅನುಭವಿಸುತ್ತಿದ್ದಾರೆ. ಒಂದು ಗ್ರಾಮದಲ್ಲಿ ಒಂದು ದಿನ ಗ್ರಾಮವಾಸ್ತವ್ಯ ಮಾಡಿ ಯೋಜನೆ ಯಶಸ್ವಿಯಾಯಿತೆಂದು ಬೀಗುವುದು ಖಂಡಿತ ಸರಿಯಲ್ಲ. ಜಿಲ್ಲಾಧಿಕಾರಿಗಳು, ಜಿಲ್ಲಾ, ತಾಲೂಕು ಪಂಚಾಯತ್ ಮುಖ್ಯ ಕಾರ್ಯನಿರ್ವಾಹಣಾಧಿಕಾರಿಗಳು, ತಹಸೀಲ್ದಾರರು, ತಾಲೂಕು ಮಟ್ಟದ ಅಧಿಕಾರಿಗಳು ಗ್ರಾಮಕ್ಕೆ ಭೇಟಿ ನೀಡಿದಾಗ ಅಲ್ಲಿನ ನೈಜ ಸಮಸ್ಯೆಗಳನ್ನು ಅರಿಯಬಹುದು. ಅಭಿವೃದ್ಧಿಗೊಂಡ ಗ್ರಾಮಗಳಿಗೆ ಹೋಗಿ ವಾಸ್ತವ್ಯ ಮಾಡುವುದಕ್ಕಿಂತ ತಾಂಡಾ, ಕುಗ್ರಾಮಗಳಿಗೆ ತೆರಳಿ ವಾಸ್ತವ್ಯ ಹೂಡಿದರೆ ಅದಕ್ಕೊಂದು ಅರ್ಥವಾದರೂ ಬಂದಿತು.
