ಗುರ್ಗಾಂವ್: ಮಾರಣಾಂತಿಕ ಕರೊನಾವನ್ನು ಮಣಿಸಿದ ಈ ಮಹಿಳೆಗೆ ಸಾವು ಇನ್ನೊಂದು ರೂಪದಲ್ಲಿ ಬಂದೊದಗಿತು.
ಇವರು ಇಟಾಲಿಯನ್ ಮಹಿಳೆ. ಭಾರತಕ್ಕೆ ಪ್ರವಾಸಕ್ಕೆ ಬಂದಿದ್ದ ಅವರಿಗೆ ಡೆಡ್ಲಿ ಕರೊನಾ ವಕ್ಕರಿಸಿತ್ತು. ಆದರೆ ಅದರಿಂದ ಚೇತರಿಸಿಕೊಂಡಿದ್ದರೂ ಕೆಲವೇ ದಿನದಲ್ಲಿ ಮತ್ತೊಂದು ಕಾಯಿಲೆಯಿಂದ ಮೃತಪಟ್ಟಿದ್ದಾರೆ.
78 ವರ್ಷದ ಈ ಮಹಿಳೆ ಸೇರಿ ಒಟ್ಟು 13 ಇಟಾಲಿಯನ್ ಪ್ರವಾಸಿಗರಿಗೆ ಮಾರ್ಚ್ನಲ್ಲಿ ಕರೊನಾ ವೈರಸ್ ತಗುಲಿತ್ತು. ಅವರೆಲ್ಲರಿಗೂ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿತ್ತು. ಈ ಮಹಿಳೆ ಒಂದು ತಿಂಗಳು ಆಸ್ಪತ್ರೆಯಲ್ಲಿದ್ದು ಕರೊನಾದಿಂದ ಚೇತರಿಸಿಕೊಂಡಿದ್ದರು. ಆದರೆ ಶುಕ್ರವಾರ ಹೃದಯಾಘಾತದಿಂದ ಹರಿಯಾಣಾದ ಗುರ್ಗಾಂವ್ನ ಖಾಸಗಿ ಆಸ್ಪತ್ರೆಯಲ್ಲಿ ಮೃತಪಟ್ಟಿದ್ದಾರೆ.
ಈಕೆ ಸಾಯುವ ವೇಳೆ ಕರೊನಾ ವೈರಸ್ ಅಂಶ ಇರಲಿಲ್ಲ. ಸಂಪೂರ್ಣ ನೆಗೆಟಿವ್ ಆಗಿತ್ತು ಎಂದು ಆಸ್ಪತ್ರೆ ಮೂಲಗಳು ತಿಳಿಸಿವೆ. ಹಾಗೇ ಕರೊನಾ ಸೋಂಕಿನಿಂದ ಆಸ್ಪತ್ರೆ ಸೇರಿದ್ದ ಈ ಮಹಿಳೆಯೊಂದಿಗೆ ಇದ್ದ ಉಳಿದ 13 ಮಂದಿ ಕೂಡ ಗುಣಮುಖರಾಗಿ, ಡಿಸ್ಚಾರ್ಜ್ ಆಗಿದ್ದಾರೆ ಎಂದ ಮುಖ್ಯ ವೈದ್ಯಾಧಿಕಾರಿ ಮಾಹಿತಿ ನೀಡಿದ್ದಾರೆ. (ಏಜೆನ್ಸೀಸ್)