ಸಿಎಂ ಜಸ್ಟ್ ಮಿಸ್: ಕೆಲವು ಭಯೋತ್ಪಾದನಾ ಸಂಘಟನೆಗಳ ಪ್ರೇರಣೆಯಿಂದ ಆರೋಪಿ ಶಾರೀಕ್, ಸಿಎಂ ಬಸವರಾಜ ಬೊಮ್ಮಾಯಿ ಸೇರಿದಂತೆ ಬಿಜೆಪಿಯ ಪ್ರಮುಖ ನಾಯಕರ ಹತ್ಯೆಗೆ ಸಂಚು ರೂಪಿಸಿದ್ದ. ನ.19ರಂದು ಮಂಗಳೂರಿನಲ್ಲಿ ಒಂದೇ ವೇದಿಕೆಯಲ್ಲಿ ಈ ನಾಯಕರನ್ನು ಹತ್ಯೆ ಮಾಡುವ ಯೋಜನೆಯನ್ನೂ ರೂಪಿಸಲಾಗಿತ್ತು ಎನ್ನುವುದು ಪೊಲೀಸರ ಮಾಹಿತಿ. ಆದರೆ ಮೈಸೂರಿನಿಂದ ಆರೋಪಿ ಹೊರಡುವ ಸಂದರ್ಭ ಬಸ್ ಮಿಸ್ ಆಗಿತ್ತು. ಮಂಗಳೂರಿಗೆ ತಲುಪುವುದು ತಡವಾಗಿದ್ದರಿಂದ ಟಾರ್ಗೆಟ್ ಸಿಎಂ ಯೋಜನೆ ವಿಫಲವಾಯಿತು. ಮಂಗಳೂರಿಗೆ ತಡವಾಗಿ ಆಗಮಿಸಿದ ಆರೋಪಿ ಜನವಸತಿ ಪ್ರದೇಶಕ್ಕಾಗಿ ಹುಡುಕುತ್ತಿದ್ದು, ಸಿಟಿ ಸೆಂಟರ್ ಅಥವಾ ಕದ್ರಿ ಪಾರ್ಕ್ಗೆ ತೆರಳಲು ಯೋಜನೆ ರೂಪಿಸಿದ್ದ. ಪಡೀಲ್ ಬಳಿ ಬಸ್ ಇಳಿದು ಪೂರ್ವ ಯೊಜನೆಯಂತೆ ಕುಕ್ಕರ್ನಲ್ಲಿರಿಸಿದ ಸಾಧಾರಣ ತೀವ್ರತೆಯ ಬಾಂಬ್ ಅನ್ನು ಆ್ಯಕ್ಟೀವ್ಗೊಳಿಸಿ ರಿಕ್ಷಾ ಏರಿದ್ದ. ಪಡೀಲ್ ಪಂಪ್ವೆಲ್ ರಸ್ತೆ ಕಾಮಗಾರಿಯಿಂದ ರಸ್ತೆ ಸಮರ್ಪಕವಿಲ್ಲದ ಕಾರಣ ಕುಕ್ಕರ್ ಅದುರಿ ಸ್ಫೋಟಗೊಂಡಿದೆ ಎಂಬ ಮಾಹಿತಿ ಪ್ರಾಥಮಿಕ ತನಿಖೆಯಿಂದ ಬಹಿರಂಗಗೊಂಡಿದೆ.
