ಗಂಗೊಳ್ಳಿ: ಶುಕ್ರವಾರ ಮಳೆಯಬ್ಬರ ಮುಂದುವರಿದಿದ್ದು, ಗಾಳಿ-ಮಳೆಗೆ ಹಲವೆಡೆ ಮನೆ, ಜಾನುವಾರು ಕೊಟ್ಟಿಗೆಗಳಿಗೆ ಹಾನಿಯಾಗಿದೆ. ಅಪಾರ ಪ್ರಮಾಣದ ಗದ್ದೆಗಳು ಮುಳುಗಡೆಯಾಗಿವೆ. ಗಂಗೊಳ್ಳಿ ಗ್ರಾಮದ ಮಲ್ಯರಬೆಟ್ಟುವಿನ ರೇಖಾ ಖಾರ್ವಿ ಮನೆಗೆ ಹಾನಿಯಾಗಿದ್ದು, ನೆರೆ ನೀರು ನುಗ್ಗಿದೆ. ಕಟ್ಬೆಲ್ತೂರು ಗ್ರಾಮದ ರಘುರಾಮ ಶೆಟ್ಟರ ಮನೆಗೆ ತೆಂಗಿನಮರ ಬಿದ್ದು, ಮನೆ ಹಾಗೂ ಸೋಲಾರ್ಗೆ ಹಾನಿಯಾಗಿದೆ. ರುದ್ರಮ್ಮ ಶೆಡ್ತಿಯವರ ದನದ ಕೊಟ್ಟಿಗೆಗೆ ಹಾನಿಯಾಗಿದೆ. ಬಸ್ರೂರು ಗ್ರಾಮದ ಮೂಡ್ಕೇರಿಯ ಮೀರಾ ಹಾಗೂ ಸೇನಾಪುರ ಗ್ರಾಮದ ಲೆಸ್ಲಿ ಸುನೀಲ್ ಕುಮಾರ್, ಹಕ್ಲಾಡಿ ಗ್ರಾಮದ ಕೆಳಾಕಳಿ ಬಸವ ಪಿ.ಮೊಗವೀರ, ಚಿಲ್ಲರಬೈಲು ಚಂದ್ರಶೇಖರ್ ಗಾಣಿಗ, ಆನಗಳ್ಳಿಯ ಲಾರೆನ್ಸ್ ಬರೆಟ್ಟೋ ಹಾಗೂ ಹೆಮ್ಮಾಡಿ ಗ್ರಾಮದ ಬಾಬುರವರ ಮನೆ ಮೇಲೆ ಮರ ಬಿದ್ದು ಅಪಾರ ಹಾನಿಯಾಗಿ ನಷ್ಟ ಸಂಭವಿಸಿದೆ.
