ಸೂರತ್: ಕ್ರೈಂ ಥ್ರಿಲರ್ ವೆಬ್ ಸರಣಿಗಳಿಂದ ಪ್ರಭಾವಿತನಾಗಿ ಸಾರ್ವಜನಿಕ ಪ್ರದೇಶಗಳಲ್ಲಿ ಐಪಿಎಸ್ ಅಧಿಕಾರಿ ಎಂದು ಬಿಂಬಿಸಿಕೊಂಡಿದ್ದ ಯುವಕನನ್ನು ಸೂರತ್ ಪೊಲೀಸರು ವಶಕ್ಕೆ ಪಡೆದಿದ್ದಾರೆ.
ಬಂಧಿತನನ್ನು ಮೊಹಮ್ಮದ್ ಬಿಹಾರ ಮೂಲದ ಸರ್ಮಾಜ್ ಆಲಂ (26) ಎಂದು ಗುರುತಿಸಲಾಗಿದೆ. ಈತ ಸೂರತ್ನ ಪ್ರತಿಷ್ಠಿತ ಬಟ್ಟೆ ಅಂಗಡಿ ಒಂದರಲ್ಲಿ ಟೈಲರ್ ಆಗಿ ಕೆಲಸ ಮಾಡುತ್ತಿದ್ದ ಎಂದು ಪೊಲೀಸ್ ಅಧಿಕಾರಿಗಳು ತಿಳಿಸಿದ್ದಾರೆ.
ಈ ಕುರಿತು ಪ್ರತಿಕ್ರಿಯಿಸಿರುವ ಸೂರತ್ ಡಿಸಿಪಿ ಭಗೀರಥ ಗಾಧವಿ, ಬಂಧಿತ ಆರೋಪಿ ಜನರನ್ನು ಮೆಚ್ಚಿಸಲು ಸಾರ್ವಜನಿಕ ಪ್ರದೇಶಗಳಲ್ಲಿ ಪೊಲೀಸ್ ಸಮವಸ್ತ್ರ ಧರಿಸಿ ತಾನೊಬ್ಬ ಐಪಿಎಸ್ ಅಧಿಕಾರಿ ಎಂದು ಬಿಂಬಿಸಿಕೊಂಡಿದ್ದ. ಇದಲ್ಲದೆ ಅಂಗಡಿ ಮುಂಗಟ್ಟುಗಳಿಗೆ ತೆರಳಿ ಈತ ಫೋಟೋವನ್ನು ಸಹ ತೆಗೆಸಿಕೊಳ್ಳುತ್ತಿದ್ದ.
ಇದನ್ನೂ ಓದಿ: VIDEO| ನಾನ್ಯಾಕೆ ವಿರಾಟ್ಗೆ ಅಭಿನಂದಿಸಬೇಕು ಎಂದ ಶ್ರೀಲಂಕಾ ಕ್ಯಾಪ್ಟನ್; ಕ್ರೀಡಾಭಿಮಾನಿಗಳಿಂದ ಫುಲ್ ಟ್ರೋಲ್
ನಗರದ ಉದ್ನಾ ಪ್ರದೇಶದ ರಸ್ತೆ ಒಂದರಲ್ಲಿ ಪೊಲೀಸ್ ಸಮವಸ್ತ್ರ ಧರಿಸಿ ವ್ಯಕ್ತಿಯೊಬ್ಬ ಗಾಡಿಗಳನ್ನು ಪರಿಶೀಲಿಸುತ್ತಿದ್ದಾನೆ ಎಂದು ನಮಗೆ ಮಾಹಿತಿ ಲಭಿಸಿತ್ತು. ಸ್ಥಳಕ್ಕೆ ತೆರಳಿ ಕೂಡಲೇ ಆತನನ್ನು ವಶಕ್ಕೆ ಪಡೆಯಲಾಯಿತು. ಆತನ ಬಳಿ ಇದ್ದ ಐಪಿಎಸ್ ಬ್ಯಾಡ್ಜ್, ಡಮ್ಮಿ ವಾಕಿ ಟಾಕಿ, ಪಿಸ್ತೂಲ್ ಹಾಗೂ ಸಮವಸ್ತ್ರವನ್ನು ವಶಕ್ಕೆ ಪಡೆಯಲಾಗಿದೆ.
ಬಂಧಿತ ಆರೋಪಿಯು ತಾನು ಸಿನಿಮಾ ಹಾಗೂ ಕ್ರೈಂ ಆಧಾರಿತ ವೆಬ್ ಸರಣಿಗಳನ್ನು ನೋಡಿ ಪ್ರಭಾವಿತನಾಗಿ ಈ ರೀತಿ ಮಾಡಿದ್ದಾಗಿ ತಪ್ಪೊಪ್ಪಿಕೊಂಡಿದ್ದಾನೆ. ಆದರೆ, ಆಯ ಯಾರ ಬಳಿಯೂ ಹಣ ಪಡೆದಿಲ್ಲ ಎಂಬುದು ಕಂಡು ಬಂದಿದ್ದು, ಆತನ ವಿರುದ್ಧ ಭಾರತ ದಂಡ ಸಂಹಿತೆ (IPC Section) ಸೆಕ್ಷನ್ 170 ಮತ್ತು 171 ರ ಅಡಿಯಲ್ಲಿ FIR ದಾಖಲಿಸಲಾಗಿದೆ ಎಂದು ಸೂರತ್ ಡಿಸಿಪಿ ಭಗೀರಥ ಗಾಧವಿ ತಿಳಿಸಿದ್ದಾರೆ.