ಭಾರತದಲ್ಲಿ ಮೇ 7ರಂದು ನಡೆಸಲಿರುವ ಮಾಕ್ ಡ್ರಿಲ್ (ಪೂರ್ವಸಿದ್ಧತಾ ತಾಲೀಮು) ಬಗ್ಗೆ ದೇಶದ ಜನರು ಹಾಗೂ ಜಗತ್ತಿನ ವಿವಿಧ ರಾಷ್ಟ್ರಗಳ ಗಮನ ನೆಟ್ಟಿರುವಾಗ ಭಾರತದ ಸೇನೆಗಳು ಅದರ ಹಿಂದಿನ ರಾತ್ರಿಯೇ ಕ್ಷಿಪಣಿಗಳ ದಾಳಿ ಮೂಲಕ ಪಾಕ್ಗೆ ‘ಡ್ರಿಲ್’ ಮಾಡಿವೆ. ‘ಪಹಲ್ಗಾಮ್ ದಾಳಿ ನಡೆಸಿದವರಿಗೆ ಹಾಗೂ ಅದಕ್ಕೆ ಕಾರಣರಾದವರಿಗೆ ಅವರು ಊಹಿಸದ ರೀತಿಯಲ್ಲಿ ತಕ್ಕಶಾಸ್ತಿ ಮಾಡಲಾಗುವುದು’ ಎಂಬ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಅವರ ಮಾತಿನಂತೆ ಕಲ್ಪನೆಗೂ ಮಿಗಿಲಾದ ರೀತಿಯಲ್ಲಿ ‘ಆಪರೇಷನ್ ಸಿಂಧೂರ’ ನಡೆಸಲಾಗಿದೆ. ಅತ್ಯಂತ ವ್ಯವಸ್ಥಿತ, ವಿಸõತ ಹಾಗೂ ನಿರ್ದಿಷ್ಟವಾಗಿ ಗುರಿಯನ್ನು ಕೇಂದ್ರೀಕರಿಸಿ ನಡೆಸಲಾದ ಈ ಕಾರ್ಯಾಚರಣೆ ಭಾರತ ಇದುವರೆಗೆ ನಡೆಸಲಾದ ಆಪರೇಷನ್ಗಳಿಗಿಂತ ವಿಭಿನ್ನವಾಗಿದೆ. ತಡರಾತ್ರಿ 25 ನಿಮಿಷಗಳ ಕಾಲ 24 ಕ್ಷಿಪಣಿಗಳ ಮೂಲಕ ಉಗ್ರರ 9 ಶಿಬಿರಗಳ ಮೇಲೆ ನಡೆಸಿದ ಈ ದಾಳಿಯಲ್ಲಿ 70 ಉಗ್ರರು ಹತ್ಯೆಯಾಗಿದ್ದು, 60ಕ್ಕೂ ಹೆಚ್ಚು ಮಂದಿ ಗಾಯಗೊಂಡಿದ್ದಾರೆ.
