ಇಂದು ದಕ್ಷಿಣ ಆಫ್ರಿಕಾ ವಿರುದ್ಧ ಫೈನಲ್​; ಭಾರತದ ವೀರ ವನಿತೆಯರಿಗೆ ಚೊಚ್ಚಲ ವಿಶ್ವಕಪ್​ ಗೆಲ್ಲುವ ಅವಕಾಶ

ಮುಂಬೈ: ಭಾರತದ ಪುರುಷರ ಕ್ರಿಕೆಟ್​ ತಂಡ 1983ರಲ್ಲಿ ಆಗಿನ ಬಲಾಢ್ಯ ವೆಸ್ಟ್​ ಇಂಡೀಸ್​ ತಂಡವನ್ನು ಬಗ್ಗುಬಡಿದು ಲಾರ್ಡ್ಸ್​ನಲ್ಲಿ ಚೊಚ್ಚಲ ವಿಶ್ವಕಪ್​ ಎತ್ತಿಹಿಡಿದಿತ್ತು. ಈ ಗೆಲುವು ಮೈದಾನದೊಳಗೆ ಮಾತ್ರವಲ್ಲದೆ, ಮೈದಾನದ ಹೊರಗೂ ಭಾರತ ತಂಡವನ್ನು ಶ್ರೀಮಂತಗೊಳಿಸಿತ್ತು. ಇದೀಗ ಭಾರತದ ಮಹಿಳೆಯರಿಗೂ ಅಂಥದ್ದೇ ಚಾರಿತ್ರಿಕ ಮತ್ತು "ಟರ್ನಿಂಗ್​ ಪಾಯಿಂಟ್​' ಆಗಬಹುದಾದಂಥ ಜಯವನ್ನು ತವರು ನೆಲದಲ್ಲೇ ದಾಖಲಿಸುವ ಅವಕಾಶ ಕೂಡಿ ಬಂದಿದೆ. 13ನೇ ಆವೃತ್ತಿಯ ಮಹಿಳೆಯರ ಏಕದಿನ ವಿಶ್ವಕಪ್​ ಟೂರ್ನಿಯ ಫೈನಲ್​ ಪಂದ್ಯ ಭಾನುವಾರ ನವಿಮುಂಬೈನ ಡಾ. ಡಿವೈ ಪಾಟೀಲ್​ ಸ್ಟೇಡಿಯಂನಲ್ಲಿ ನಡೆಯಲಿದ್ದು, ಹರ್ಮಾನ್​ಪ್ರೀತ್​ ಕೌರ್​ ನೇತೃತ್ವದ ಭಾರತ ತಂಡ ದಕ್ಷಿಣ ಆಫ್ರಿಕಾ ತಂಡದ ಸವಾಲು ಎದುರಿಸಲಿದೆ. ಉಪಾಂತ್ಯದಲ್ಲಿ ಹಾಲಿ ಮತ್ತು 7 ಬಾರಿಯ ಚಾಂಪಿಯನ್​ ಆಸ್ಟ್ರೆಲಿಯಾ ತಂಡವನ್ನು ಸೋಲಿಸಿದ ಆತ್ಮವಿಶ್ವಾಸದೊಂದಿಗೆ ಭಾರತದ ಮಹಿಳೆಯರು ಕಣಕ್ಕಿಳಿಯಲಿದ್ದು, ಚೊಚ್ಚಲ ಐಸಿಸಿ ಟ್ರೋಫಿ ಸಂಭ್ರಮವನ್ನು ಕಾಣಲು ತುದಿಗಾಲಲ್ಲಿ ನಿಂತಿದ್ದಾರೆ.

ಉಭಯ ತಂಡಗಳು ಫೈನಲ್​ ಹಾದಿಯಲ್ಲಿ ಹಲವು ಸವಾಲುಗಳನ್ನು ದಾಟಿ ಬಂದಿವೆ. ಭಾರತ ತಂಡ ಆರಂಭಿಕ 2 ಗೆಲುವಿನ ಬಳಿಕ ಹ್ಯಾಟ್ರಿಕ್​ ಸೋಲು ಅನುಭವಿಸಿ, ಅಭಿಮಾನಿಗಳಿಂದ ತೀವ್ರ ಟೀಕೆಗಳಿಗೆ ಗುರಿಯಾಗಿತ್ತು. ಜತೆಗೆ ನಾಕೌಟ್​ ಹಂತಕ್ಕೇರುವುದೇ ಅನುಮಾನವೆನಿಸಿತ್ತು. ಆಗ ನ್ಯೂಜಿಲೆಂಡ್​ ಎದುರು ಭರ್ಜರಿ ಗೆಲುವು ಸಾಧಿಸಿದ್ದಲ್ಲದೆ, ಉಪಾಂತ್ಯದಲ್ಲಿ ಆಸೀಸ್​ ಎದುರು ದಾಖಲೆಯ ಚೇಸಿಂಗ್​ ಮಾಡಿ ಬೀಗಿತ್ತು. ಅತ್ತ ದ. ಆಫ್ರಿಕಾ ತಂಡ ಟೂರ್ನಿಯ ಮೊದಲ ಪಂದ್ಯದಲ್ಲೇ ಇಂಗ್ಲೆಂಡ್​ ಎದುರು ಕೇವಲ 69 ರನ್​ಗಳಿಗೆ ಆಲೌಟ್​ ಆಗಿ ಸೋತಿದ್ದರೆ, ನಂತರ ಸತತ 5 ಜಯ ಸಾಧಿಸಿದ ಬಳಿಕ ಕೊನೇ ಲೀಗ್​ ಪಂದ್ಯದಲ್ಲಿ ಆಸೀಸ್​ ಎದುರು ಮತ್ತೆ 97 ರನ್​ಗಳಿಗೆ ಮುಗ್ಗರಿಸಿತ್ತು. ಆದರೂ ಸೆಮೀಸ್​ನಲ್ಲಿ 4 ಬಾರಿಯ ಚಾಂಪಿಯನ್​ ಇಂಗ್ಲೆಂಡ್​ ಎದುರು ದೊಡ್ಡ ಅಂತರದಿಂದ ಗೆದ್ದು ಪುಟಿದೆದ್ದಿತ್ತು. ಇದೀಗ ಒಂದು ತಂಡಕ್ಕೆ ಮಾತ್ರ ಈ ಯಶೋಗಾಥೆಯನ್ನು ಟ್ರೋಫಿಯೊಂದಿಗೆ ಸಂಭ್ರಮಿಸುವ ಅದೃಷ್ಟ ಒಲಿಯಲಿದೆ.

ವಿಶ್ವಾಸದಲ್ಲಿ ಹರ್ಮಾನ್​ಪ್ರೀತ್​ ಪಡೆ

ಎಂಎಸ್​ ಧೋನಿ ಬಳಗ 2011ರಲ್ಲಿ ತವರಿನಲ್ಲೇ ವಿಶ್ವಕಪ್​ ಗೆದ್ದಂತೆ, ಹರ್ಮಾನ್​ಪ್ರೀತ್​ ಕೌರ್​ ಪಡೆ ಕೂಡ ತವರಿನಲ್ಲೇ ವಿಶ್ವಕಪ್​ ಎತ್ತಿಹಿಡಿದು ವಿಜೃಂಭಿಸುವ ನಿರೀಕ್ಷೆ ಹರಡಿದೆ. ಜೆಮೀಮಾ ರೋಡ್ರಿಗಸ್​ ಶತಕದ ಸಾಹಸದಿಂದ ಬಲಿಷ್ಠ ಆಸೀಸ್​ ಎದುರು ದಾಖಲೆ ಚೇಸಿಂಗ್​ ನಡೆಸಿ ಗೆದ್ದ ಬಳಿಕ ಭಾರತದ ಆತ್ಮವಿಶ್ವಾಸ ದುಪ್ಪಟ್ಟುಗೊಂಡಿದೆ. ಫೈನಲ್​ನಲ್ಲಿ ಸ್ಮೃತಿ ಮಂದನಾ, ಶೆಫಾಲಿ ವರ್ಮ, ದೀಪ್ತಿ ಶರ್ಮ, ರಿಚಾ ಘೋಷ್​, ಅಮನ್​ಜೋತ್​, ರೇಣುಕಾ ಸಿಂಗ್​ ಅವರಿಂದ ನೈಜ ನಿರ್ವಹಣೆ ಬಂದರೆ ಭಾರತಕ್ಕೆ ಗೆಲುವು ಕಠಿಣವಲ್ಲ. ಆದರೆ ದ. ಆಫ್ರಿಕಾವೂ ಬಲಿಷ್ಠ ಬ್ಯಾಟಿಂಗ್​ ವಿಭಾಗವನ್ನು ಹೊಂದಿದ್ದು, ಎಡಗೈ ಸ್ಪಿನ್ನರ್ಸ್​ (ಮ್ಲಾಬಾ, ಟೆಯಾನ್​) ಎದುರಿನ ದೌರ್ಬಲ್ಯವೂ ಕಾಡದಂತೆ ಎಚ್ಚರಿಕೆಯೂ ಅಗತ್ಯವಾಗಿದೆ.

*ಸೋಲಿನ ನೋವು ಹೇಗಿರುತ್ತದೆ ಎಂದು ನೋಡಿದ್ದೇನೆ. ಈಗ ವಿಶ್ವಕಪ್​ ಗೆಲುವಿನ ಅನುಭವವನ್ನು ಪಡೆಯಲು ಬಯಸಿದ್ದೇನೆ. ಭಾನುವಾರ ವಿಶೇಷ ದಿನವಾಗುವ ನಿರೀಕ್ಷೆಯಲ್ಲಿದ್ದೇವೆ.

| ಹರ್ಮಾನ್​ಪ್ರೀತ್​ ಕೌರ್​, ಭಾರತ ತಂಡದ ನಾಯಕಿ

ಆರಂಭ: ಮಧ್ಯಾಹ್ನ 3.00

ನೇರಪ್ರಸಾರ: ಸ್ಟಾರ್​ ಸ್ಪೋರ್ಟ್ಸ್​, ಜಿಯೋ ಹಾಟ್​ಸ್ಟಾರ್​.

4: ಫೈನಲ್​ನಲ್ಲಿ ಯಾವುದೇ ತಂಡ ಗೆದ್ದರೂ, ಮಹಿಳಾ ವಿಶ್ವಕಪ್​ ಗೆದ್ದ 4ನೇ ತಂಡವೆನಿಸಲಿದೆ. ಆಸೀಸ್​, ಇಂಗ್ಲೆಂಡ್​, ನ್ಯೂಜಿಲೆಂಡ್​ ಹಿಂದಿನ 3 ತಂಡಗಳು.

*1: ಆಸ್ಟ್ರೆಲಿಯಾ-ಇಂಗ್ಲೆಂಡ್​ ಎರಡೂ ತಂಡಗಳಿರದ ಮೊದಲ ಮಹಿಳಾ ಏಕದಿನ ವಿಶ್ವಕಪ್​ ಫೈನಲ್​ ಇದಾಗಿದೆ. ಕಳೆದ ವರ್ಷ ಟಿ20 ವಿಶ್ವಕಪ್​ನಲ್ಲೂ ಇವೆರಡೂ ತಂಡಗಳಿರದ ಮೊದಲ ಫೈನಲ್​ ನಡೆದಿತ್ತು.

ಫೈನಲ್​ ಸೋಲಿನ ಶಾಪ ವಿಮೋಚನೆ?

ಭಾರತದ ಮಹಿಳೆಯರು 2005 ಮತ್ತು 2017ರ ಬಳಿಕ 3ನೇ ಬಾರಿ ಏಕದಿನ ವಿಶ್ವಕಪ್ ಫೈನಲ್​ನಲ್ಲಿ ಆಡಲಿದ್ದು, "ಥರ್ಡ್​ ಟೈಮ್​ ಲಕ್ಕಿ' ಎನಿಸುವ ನಿರೀಕ್ಷೆಯಲ್ಲಿದೆ. ಅತ್ತ ದ. ಆಫ್ರಿಕಾ ಮಹಿಳೆಯರಿಗೆ ಏಕದಿನ ವಿಶ್ವಕಪ್​ನಲ್ಲಿ ಇದು ಮೊದಲ ಫೈನಲ್​ ಆಗಿದ್ದರೂ, ಐಸಿಸಿ ಟೂರ್ನಿಯಲ್ಲಿ ಇದು 3ನೇ ಫೈನಲ್​. 2023 ಮತ್ತು 2024ರ ಟಿ20 ವಿಶ್ವಕಪ್​ ಫೈನಲ್​ಗೇರಿದ್ದ ದ. ಆಫ್ರಿಕಾ ರನ್ನರ್​ಅಪ್​ಗೆ ತೃಪ್ತಿಪಟ್ಟಿತ್ತು. ಹೀಗಾಗಿ ಈ ಬಾರಿ ಭಾರತ-ದ. ಆಫ್ರಿಕಾ ಪೈಕಿ ಒಂದು ತಂಡವಷ್ಟೇ ಫೈನಲ್​ ಸೋಲಿನ ಶಾಪದಿಂದ ವಿಮೋಚನೆ ಪಡೆದುಕೊಳ್ಳಲಿದೆ.

ಮಳೆ ಭೀತಿ, ಮೀಸಲು ದಿನವಿದೆ

ಫೈನಲ್​ ಪಂದ್ಯಕ್ಕೆ ಮಳೆ ಅಡಚಣೆಯ ಭೀತಿ ಇದೆ. ಅದರಲ್ಲೂ ಹಗಲಿನಲ್ಲಿ ಮಳೆ ಸಾಧ್ಯತೆ ಹೆಚ್ಚಿದೆ. ಫಲಿತಾಂಶ ನಿರ್ಧಾರಕ್ಕೆ ನಿಗದಿತ ಓವರ್​ ನಡೆಯದಿದ್ದರೆ ಪಂದ್ಯ ಮೀಸಲು ದಿನವಾದ ಸೋಮವಾರಕ್ಕೆ ಮುಂದೂಡಲ್ಪಡಲಿದೆ. ಸೋಮವಾರವೂ ಪಂದ್ಯ ನಡೆಯದಿದ್ದರೆ ಐಸಿಸಿ, ಉಭಯ ತಂಡಗಳನ್ನು "ಜಂಟಿ ಚಾಂಪಿಯನ್​' ಎಂದು ಘೋಷಿಸಲಿದೆ.

ಆಸೀಸ್​ ಸೋಲಿಸಿದವರಿಗೆ ಟ್ರೋಫಿ?

ಮಹಿಳೆಯರ ಏಕದಿನ ವಿಶ್ವಕಪ್​ ಇತಿಹಾಸ ಗಮನಿಸಿದಾಗ ಬಹುತೇಕ ಆವೃತ್ತಿಗಳಲ್ಲಿ ಆಸ್ಟ್ರೆಲಿಯಾಕ್ಕೆ ಅಥವಾ ಆಸ್ಟ್ರೆಲಿಯಾವನ್ನು ಸೋಲಿಸಿದವರಿಗೆ ಪ್ರಶಸ್ತಿ ಒಲಿದಿರುವುದನ್ನು ಕಾಣಬಹುದು. ಹೀಗಾಗಿ ಈ ಬಾರಿ ಸೆಮೀಸ್​ನಲ್ಲಿ ಆಸೀಸ್​ಗೆ ಸೋಲುಣಿಸಿರುವ ಭಾರತಕ್ಕೆ ಟ್ರೋಫಿ ಗೆಲ್ಲುವ ನಿರೀಕ್ಷೆ ಹೆಚ್ಚಿದೆ. ಹಿಂದಿನ 12 ಆವೃತ್ತಿಗಳಲ್ಲಿ 7 ಬಾರಿ ಆಸ್ಟ್ರೆಲಿಯಾವೇ ವಿಶ್ವಕಪ್​ ಗೆದ್ದಿದ್ದರೆ, 1973, 2000ದಲ್ಲಿ ಆಸ್ಟ್ರೆಲಿಯಾವನ್ನು ಫೈನಲ್​ನಲ್ಲಿ ಮಣಿಸಿದ ತಂಡಕ್ಕೆ ಪ್ರಶಸ್ತಿ ಒಲಿದಿತ್ತು. ಇನ್ನು 1993, 2017ರಲ್ಲಿ ಲೀಗ್​ ಹಂತದಲ್ಲಿ ಆಸ್ಟ್ರೆಲಿಯಾವನ್ನು ಮಣಿಸಿದ್ದ ಇಂಗ್ಲೆಂಡ್​ ವಿಶ್ವಕಪ್​ ಗೆದ್ದಿತ್ತು. 2009ರಲ್ಲಿ ಮಾತ್ರ ಸೂಪರ್​-6 ಹಂತದಲ್ಲಿ ಆಸೀಸ್​ಗೆ ಶರಣಾಗಿದ್ದರೂ ಇಂಗ್ಲೆಂಡ್​ ಪ್ರಶಸ್ತಿ ಗೆದ್ದಿತ್ತು. ಲೀಗ್​ ಹಂತದಲ್ಲಿ ಆಸೀಸ್​ಗೆ ಸೋಲುಣಿಸಿದ್ದ ನ್ಯೂಜಿಲೆಂಡ್​ ರನ್ನರ್​ಅಪ್​ಗೆ ತೃಪ್ತಿಪಟ್ಟಿತ್ತು.

ಮತ್ತೆ ಹೊಸ ಚಾಂಪಿಯನ್​!

ಜಾಗತಿಕ ಕ್ರಿಕೆಟ್​ ಟೂರ್ನಿಗಳಲ್ಲಿ ಹಾಲಿ ವರ್ಷ ಹೊಸ ಚಾಂಪಿಯನ್ನರ ವರ್ಷವೆನಿಸಿದೆ. ವರ್ಷಾರಂಭದಲ್ಲಿ ಆಸ್ಟ್ರೆಲಿಯಾದ ಬಿಗ್​ಬ್ಯಾಷ್​ ಲೀಗ್​ನಲ್ಲಿ ಹೋರ್ಬಟ್​ ಹರಿಕೇನ್​ 14 ಆವೃತ್ತಿಗಳಲ್ಲಿ ಮೊದಲ ಬಾರಿ ಪ್ರಶಸ್ತಿ ಗೆದ್ದಿದ್ದರೆ, ಐಪಿಎಲ್​ನಲ್ಲಿ ಆರ್​ಸಿಬಿ ತಂಡ 18 ವರ್ಷಗಳ ಬಳಿಕ ಚೊಚ್ಚಲ ಕಪ್​ ಒಲಿಸಿಕೊಂಡಿತ್ತು. ದ. ಆಫ್ರಿಕಾದ ಎಸ್​ಎ20 ಲೀಗ್​ನಲ್ಲಿ ಎಂಐ ಕೇಪ್​ಟೌನ್​ ಮತ್ತು ಯುಎಇಯ ಇಂಟರ್​ನ್ಯಾಷನಲ್​ ಲೀಗ್​ ಟಿ20ಯಲ್ಲಿ ದುಬೈ ಕ್ಯಾಪಿಟಲ್ಸ್​ ಮೊದಲ ಬಾರಿ ಪ್ರಶಸ್ತಿ ಜಯಿಸಿತ್ತು. ಐಸಿಸಿ ವಿಶ್ವ ಟೆಸ್ಟ್​ ಚಾಂಪಿಯನ್​ಷಿಪ್​ನಲ್ಲಿ ದ. ಆಫ್ರಿಕಾ ಪುರುಷರ ತಂಡ ಮೊದಲ ಬಾರಿ ಟ್ರೋಫಿ ಗೆದ್ದಿತ್ತು. ಇದೀಗ ಮಹಿಳಾ ವಿಶ್ವಕಪ್​ನಲ್ಲೂ ಭಾರತ-ದ. ಆಫ್ರಿಕಾ ಪೈಕಿ ಯಾರೇ ಗೆದ್ದರೂ ಹೊಸ ಚಾಂಪಿಯನ್​ ಎನಿಸಲಿದ್ದಾರೆ.

ಕಿರಿಯರ ವಿಶ್ವಕಪ್​ ಪುನರಾವರ್ತನೆ!

ಹಾಲಿ ವರ್ಷಾರಂಭದಲ್ಲಿ ನಡೆದ 19 ವಯೋಮಿತಿ ಮಹಿಳೆಯರ ಟಿ20 ವಿಶ್ವಕಪ್​ನಲ್ಲೂ ಭಾರತ-ದ. ಆಫ್ರಿಕಾ ಮುಖಾಮುಖಿ ಆಗಿದ್ದವು. ಆಗ ಕನ್ನಡತಿ ನಿಕಿ ಪ್ರಸಾದ್​ ಸಾರಥ್ಯದ ಭಾರತ ತಂಡ ಪ್ರಶಸ್ತಿ ಗೆದ್ದುಕೊಂಡಿತ್ತು. ಇದೀಗ ಭಾರತದ ಹಿರಿಯ ಆಟಗಾರ್ತಿಯರಿಗೂ ಇದೇ ಫಲಿತಾಂಶ ಪುನರಾವರ್ತಿಸುವ ಅವಕಾಶವಿದೆ.

*39: ಚಾಂಪಿಯನ್​ ತಂಡ 39.77 ಕೋಟಿ ರೂ. (4.48 ದಶಲಕ್ಷ ಡಾಲರ್​) ಗಳಿಸಲಿದೆ. ಇದು ಕಳೆದ ಆವೃತ್ತಿಗಿಂತ ಶೇ.239 ಅಧಿಕವಾಗಿದೆ. ರನ್ನರ್​ಅಪ್​ ತಂಡ 19.88 ಕೋಟಿ ರೂ. (2.24 ದಶಲಕ್ಷ ಡಾಲರ್​) ಪಡೆಯಲಿದೆ. ಇದು ಕಳೆದ ಆವೃತ್ತಿಗಿಂತ ಶೇ. 273 ಅಧಿಕವೆನಿಸಿದೆ.

ಬಿಸಿಸಿಐನಿಂದ 125 ಕೋಟಿ ರೂ. ಬಹುಮಾನ?

ಕಳೆದ ವರ್ಷ ಭಾರತದ ಪುರುಷರ ತಂಡ ಐಸಿಸಿ ಟಿ20 ವಿಶ್ವಕಪ್​ ಗೆದ್ದಾಗ ಬಿಸಿಸಿಐ 125 ಕೋಟಿ ರೂ. ಬಹುಮಾನ ನೀಡಿತ್ತು. ಬಿಸಿಸಿಐನ ಸಮಾನ ವೇತನ ಪಾಲಿಸಿಯ ಅನ್ವಯ ಈ ಬಾರಿ ಮಹಿಳಾ ತಂಡ ವಿಶ್ವಕಪ್​ ಗೆದ್ದರೂ ಅಷ್ಟೇ ಮೊತ್ತದ ಬಹುಮಾನವನ್ನು ವಿತರಿಸುವ ನಿರೀಕ್ಷೆ ಇದೆ. ಇನ್ನು ಐತಿಹಾಸಿಕ ಗೆಲುವಿನೊಂದಿಗೆ ಫೈನಲ್​ಗೇರಿರುವ ಹರ್ಮಾನ್​ಪ್ರೀತ್​ ಕೌರ್​ ಪಡೆ, ರನ್ನರ್​ಅಪ್​ಗೆ ತೃಪ್ತಿಪಟ್ಟರೂ ಬಿಸಿಸಿಐನಿಂದ ಬಹುಮಾನ ಗಳಿಸುವ ಸಾಧ್ಯತೆ ಇದೆ. ಯಾಕೆಂದರೆ 2017ರ ವಿಶ್ವಕಪ್ ಫೈನಲ್​ನಲ್ಲಿ ಸೋತಾಗ ಎಲ್ಲ ಆಟಗಾರ್ತಿಯರಿಗೆ ಬಿಸಿಸಿಐ ತಲಾ 50 ಲಕ್ಷ ರೂ. ನೀಡಿತ್ತು.

ಬೆಂಗಳೂರಿನಲ್ಲಿ ನಡೆಯಬೇಕಿತ್ತು ಫೈನಲ್​

ಟೂರ್ನಿಯ ಉದ್ಘಾಟನಾ ಪಂದ್ಯದೊಂದಿಗೆ ಫೈನಲ್​ ಕೂಡ ಬೆಂಗಳೂರಿನ ಚಿನ್ನಸ್ವಾಮಿ ಸ್ಟೇಡಿಯಂನಲ್ಲೇ ನಡೆಯಬೇಕಿತ್ತು. ಆದರೆ ಕಳೆದ ಜೂನ್​ನಲ್ಲಿ ಆರ್​ಸಿಬಿ ವಿಜಯೋತ್ಸವದ ವೇಳೆ ಸಂಭವಿಸಿದ ಕಾಲ್ತುಳಿತ ದುರಂತದಿಂದಾಗಿ, ಮಹಿಳಾ ವಿಶ್ವಕಪ್​ ಆತಿಥ್ಯಕ್ಕೆ ರಾಜ್ಯ ಸರ್ಕಾರ ಅನುಮತಿ ನಿರಾಕರಿಸಿತ್ತು. ಇದರಿಂದಾಗಿ ಕೊನೇಕ್ಷಣದಲ್ಲಿ ಆತಿಥ್ಯ ಕೈತಪ್ಪಿತ್ತು. ಇದರಿಂದಾಗಿ ಬೆಂಗಳೂರಿನ ಜನರಿಗೆ ಈಗ ಭಾರತ ತಂಡದ ಫೈನಲ್​ ವೀಕ್ಷಿಸುವ ಅವಕಾಶವೂ ತಪ್ಪಿದೆ.

https://www.vijayavani.net/fide-world-chess-cup-trophy-named-after-viswanathan-anand