50 ದಿನ ಮುನ್ನವೇ ಭಾರತ-ಆಸೀಸ್​ ಸರಣಿ ಟಿಕೆಟ್​ ಸೋಲ್ಡ್​ಔಟ್​!: ಏಷ್ಯಾಕಪ್​ ಪಂದ್ಯಗಳು ಅರ್ಧ ಗಂಟೆ ವಿಳಂಬ

ಮೆಲ್ಬೋರ್ನ್​: ಭಾರತ ತಂಡದ ಮುಂಬರುವ ಆಸ್ಟ್ರೆಲಿಯಾ ಪ್ರವಾಸದ ಸೀಮಿತ ಓವರ್​ ಸರಣಿಗೆ ಇನ್ನೂ 50ಕ್ಕೂ ಅಧಿಕ ದಿನಗಳು ಬಾಕಿ ಉಳಿದಿದ್ದರೂ, ಸರಣಿಯ ಎಲ್ಲ 8 ಪಂದ್ಯಗಳ ಭಾರತೀಯ ವಲಯದ ಟಿಕೆಟ್​ಗಳು ಈಗಾಗಲೆ ಸೋಲ್ಡ್​ಔಟ್​ ಆಗಿವೆ ಎಂದು ಕ್ರಿಕೆಟ್​ ಆಸ್ಟ್ರೆಲಿಯಾ (ಸಿಎ) ಶನಿವಾರ ಪ್ರಕಟಿಸಿದೆ.

ಸಿಡ್ನಿ ಮತ್ತು ಕ್ಯಾನ್​ಬೆರಾದಲ್ಲಿ ನಡೆಯಲಿರುವ ಪಂದ್ಯಗಳ ಎಲ್ಲ ಸಾರ್ವಜನಿಕ ಟಿಕೆಟ್​ಗಳು ಸಂಪೂರ್ಣವಾಗಿ ಮಾರಾಟವಾಗಿವೆ ಎಂದು ಸಿಎ ತಿಳಿಸಿದೆ. ಭಾರತ ತಂಡ ಪ್ರವಾಸದಲ್ಲಿ ಅಕ್ಟೋಬರ್​ 19ರಿಂದ 3 ಏಕದಿನ ಮತ್ತು 5 ಟಿ20 ಪಂದ್ಯಗಳ ಸರಣಿ ಆಡಲಿದೆ. ಇದು ಭಾರತದ ಬ್ಯಾಟಿಂಗ್​ ತಾರೆಯರಾದ ರೋಹಿತ್​ ಶರ್ಮ ಮತ್ತು ವಿರಾಟ್​ ಕೊಹ್ಲಿ ಅವರ ಕೊನೇ ಆಸ್ಟ್ರೆಲಿಯಾ ಪ್ರವಾಸ ಎನಿಸುವ ಕಾರಣದಿಂದಲೂ ವಿಶೇಷ ಮಹತ್ವವನ್ನು ಪಡೆದುಕೊಂಡಿದೆ.

ಏಷ್ಯಾಕಪ್​ ಪಂದ್ಯಗಳು ಅರ್ಧ ಗಂಟೆ ವಿಳಂಬ

ದುಬೈ: ಮುಂಬರುವ ಏಷ್ಯಾಕಪ್​ ಟಿ20 ಟೂರ್ನಿಯ 19 ಪಂದ್ಯಗಳ ಪೈಕಿ 18 ಪಂದ್ಯಗಳು ಅರ್ಧ ಗಂಟೆ ತಡವಾಗಿ ಆರಂಭವಾಗಲಿವೆ. ಯುಎಇಯಲ್ಲಿನ ಉಷ್ಣ ಹವಾಮಾನದಿಂದಾಗಿ ಈ ನಿರ್ಧಾರವನ್ನು ತೆಗೆದುಕೊಳ್ಳಲಾಗಿದೆ. ಸ್ಥಳಿಯ ಕಾಲಮಾನ ಸಂಜೆ 6ಕ್ಕೆ ಶುರುವಾಗಬೇಕಿದ್ದ ಪಂದ್ಯಗಳು ಇದೀಗ 6.30ಕ್ಕೆ ಶುರುವಾಗಲಿವೆ.

ಅಂದರೆ ಭಾರತೀಯ ಕಾಲಮಾನ ರಾತ್ರಿ 7.30ರಿಂದ ನಡೆಯಬೇಕಿದ್ದ ಪಂದ್ಯಗಳು ರಾತ್ರಿ 8ರಿಂದ ನಡೆಯಲಿವೆ. ಸೆಪ್ಟೆಂಬರ್​ 9ರಿಂದ ನಡೆಯಲಿರುವ ಟೂರ್ನಿಯಲ್ಲಿ ಯುಎಇ&ಓಮನ್​ ನಡುವಿನ ಏಕೈಕ ಹಗಲು ಪಂದ್ಯ ಮಾತ್ರ ಈ ಮೊದಲಿನ ಸಮಯದಲ್ಲೇ (ಭಾರತೀಯ ಕಾಲಮಾನ ಸಂಜೆ 5.30) ಶುರುವಾಗಲಿದೆ.