ಇಂದಿನಿಂದ ಭಾರತ-ದ.ಆಫ್ರಿಕಾ ಎ ಕಾದಾಟ; ಮರಳಿ ಕಣಕ್ಕಿಳಿಯಲು ಸಜ್ಜಾದ ರಿಷಭ್​ ಪಂತ್​

ಬೆಂಗಳೂರು: ವಿಕೆಟ್​ ಕೀಪರ್-ಬ್ಯಾಟರ್​ ರಿಷಭ್​ ಪಂತ್​ ಮೂರು ತಿಂಗಳ ಬಳಿಕ ಸ್ಪರ್ಧಾತ್ಮಕ ಕ್ರಿಕೆಟ್​ಗೆ ಮರಳಲು ಸಜ್ಜಾಗಿದ್ದಾರೆ. ಪ್ರವಾಸಿ ದಕ್ಷಿಣ ಆಫ್ರಿಕಾ ಎ ವಿರುದ್ಧ ಉದ್ಯಾನನಗರಿಯ ಬಿಸಿಸಿಐ ಶ್ರೇಷ್ಠತಾ ಕೇಂದ್ರದಲ್ಲಿ ಗುರುವಾರದಿಂದ ನಡೆಯಲಿರುವ ಮೊದಲ ಚತುರ್ದಿನ ಪಂದ್ಯದಲ್ಲಿ ಅವರು ಭಾರತ ಎ ತಂಡದ ನಾಯಕರಾಗಿ ಕಣಕ್ಕಿಳಿಯಲಿದ್ದಾರೆ.

ಪಂತ್​ ಕಳೆದ ಜುಲೈ ಅಂತ್ಯದಲ್ಲಿ ನಡೆದ ಇಂಗ್ಲೆಂಡ್​ ಪ್ರವಾಸದ 4ನೇ ಟೆಸ್ಟ್​ ಪಂದ್ಯದ ವೇಳೆ ಪಾದದ ಮೂಳೆ ಮುರಿತಕ್ಕೊಳಗಾಗಿದ್ದರು. ನಂತರದಲ್ಲಿ ಅವರು ಶಸ್ತ್ರಚಿಕಿತ್ಸೆ ಇಲ್ಲದೆ ಚೇತರಿಕೆ ಕಂಡಿದ್ದಾರೆ. ಏಷ್ಯಾಕಪ್​, ವಿಂಡೀಸ್​ ವಿರುದ್ಧದ ತವರಿನ ಸರಣಿ, ಆಸೀಸ್​ ಪ್ರವಾಸ ತಪ್ಪಿಸಿಕೊಂಡಿರುವ ಪಂತ್​, ಮುಂಬರುವ ದಣ ಆಫ್ರಿಕಾ ವಿರುದ್ಧದ ಟೆಸ್ಟ್​ಗೆ ಫಿಟ್​ ಆಗುವ ದೃಷ್ಟಿಯಿಂದ ಈ ಸರಣಿಯ 2 ಪಂದ್ಯಗಳು ಮಹತ್ವದ್ದಾಗಿವೆ.

ಇತರ ಟೆಸ್ಟ್​ ಆಟಗಾರರಾದ ಧ್ರುವ ಜುರೆಲ್​, ಸಾಯಿ ಸುದರ್ಶನ್​, ಎನ್​. ಜಗದೀಶನ್​, ಕನ್ನಡಿಗ ದೇವದತ್​ ಪಡಿಕ್ಕಲ್​ ಕೂಡ ಈ ಪಂದ್ಯದಲ್ಲಿ ಆಡಲಿದ್ದಾರೆ. ಯುವ ಬ್ಯಾಟರ್​ ಆಯುಷ್​ ಮಹಾತ್ರೆ, ರಜತ್​ ಪಾಟೀದಾರ್​, ಆಲ್ರೌಂಡರ್​ ಹರ್ಷ್​ ದುಬೆ, ಸ್ಪಿನ್ನರ್​ಗಳಾದ ತನುಷ್​ ಕೋಟ್ಯಾನ್​, ಮಾನವ್​ ಸುಥರ್​, ವೇಗಿಗಳಾದ ಖಲೀಲ್​ ಅಹ್ಮದ್​, ಅಂಶುಲ್​ ಕಾಂಬೋಜ್​, ಯಶ್​ ಠಾಕೂರ್​ ಪಂದ್ಯದಲ್ಲಿ ಆಡಲಿರುವ ಇತರ ಪ್ರಮುಖರು. ಸರಣಿಯ 2ನೇ ಪಂದ್ಯಕ್ಕೆ ಕೆಎಲ್​ ರಾಹುಲ್​, ಮೊಹಮದ್​ ಸಿರಾಜ್​ ಕೂಡ ಭಾರತ ಎ ತಂಡವನ್ನು ಕೂಡಿಕೊಳ್ಳಲಿದ್ದಾರೆ.

ಟೆಸ್ಟ್​ ತಂಡಕ್ಕೆ 2 ವರ್ಷಗಳ ಬಳಿಕ ಮರಳಿರುವ ಬ್ಯಾಟರ್​ ಜುಬೇರ್​ ಹಂಜಾ ದಕ್ಷಿಣ ಆಫ್ರಿಕಾ ಎ ಪರ ಆಡಲಿದ್ದಾರೆ. ಸರಣಿಯ 2ನೇ ಪಂದ್ಯಕ್ಕೆ ಟೆಸ್ಟ್​ ನಾಯಕ ಟೆಂಬಾ ಬವುಮಾ ಕೂಡ ದಕ್ಷಿಣ ಆಫ್ರಿಕಾ ಎ ತಂಡವನ್ನು ಸೇರಿಕೊಳ್ಳಲಿದ್ದಾರೆ.

ಆರಂಭ: ಬೆಳಗ್ಗೆ 9.30

https://www.vijayavani.net/bmm-2025-events-and-schedule-on-race-day-december-6-2025