ನಿಮಗಿಂತ ಅನಿಲ್​ ಕುಂಬ್ಳೆಯೇ ಉತ್ತಮ... ಟೀಮ್​ ಇಂಡಿಯಾದ ಸ್ಟಾರ್​ ಬೌಲರ್​ ವಿರುದ್ಧ ಸಿಧು ಆಕ್ರೋಶ! IND vs ENG

IND vs ENG : ಮ್ಯಾಂಚೆಸ್ಟರ್‌ನಲ್ಲಿ ಇಂಗ್ಲೆಂಡ್ ವಿರುದ್ಧ ನಡೆಯುತ್ತಿರುವ ನಾಲ್ಕನೇ ಟೆಸ್ಟ್ ಪಂದ್ಯದಲ್ಲಿ ಟೀಮ್​ ಇಂಡಿಯಾ ಬೌಲರ್‌ಗಳು ಸಂಪೂರ್ಣ ವಿಫಲರಾಗಿದ್ದಾರೆ. ವಾಷಿಂಗ್ಟನ್ ಸುಂದರ್ ಮತ್ತು ರವೀಂದ್ರ ಜಡೇಜಾ ಅವರಂತಹ ಸ್ಪಿನ್ನರ್‌ಗಳು ಸ್ವಲ್ಪ ಪರಿಣಾಮ ಬೀರಿದರೆ, ಜಸ್​ಪ್ರೀತ್​ ಬುಮ್ರಾ ಮತ್ತು ಮೊಹಮ್ಮದ್ ಸಿರಾಜ್‌ರಂತಹ ಪ್ರಮುಖ ವೇಗಿಗಳು ಪ್ರಭಾವ ಬೀರಲೇ ಇಲ್ಲ.

ವೇಗಿಗಳು ಸರಿಯಾದ ವೇಗದಲ್ಲಿ ಬೌಲಿಂಗ್ ಮಾಡುವಲ್ಲಿ ವಿಫಲರಾದರು. ಪ್ರಥಮ ಬಾರಿಗೆ ಟೀಮ್​ ಇಂಡಿಯಾ ಪ್ರತಿನಿಧಿಸುತ್ತಿರುವ ಯುವ ವೇಗಿ ಅನ್ಶುಲ್ ಕಾಂಬೋಜ್ ಕೂಡ ಇದೇ ರೀತಿ ಆಡಿದರು. ಒಂದೇ ಒಂದು ವಿಕೆಟ್ ಮಾತ್ರ ಪಡೆದರು. ಆದರೆ, ಭಾರಿ ರನ್ ಬಿಟ್ಟುಕೊಟ್ಟರು. ಭಾರತೀಯ ಬೌಲರ್‌ಗಳನ್ನು ಸುಲಭವಾಗಿ ಎದುರಿಸುತ್ತಿರುವ ಇಂಗ್ಲೆಂಡ್, ಮೊದಲ ಇನ್ನಿಂಗ್ಸ್‌ನಲ್ಲಿ ಬೃಹತ್ ಸ್ಕೋರ್‌ (669) ಕಲೆ ಹಾಕಿದೆ.

ಇದೇ ಸಂದರ್ಭದಲ್ಲಿ ಭಾರತದ ಮಾಜಿ ಕ್ರಿಕೆಟಿಗ ನವಜೋತ್ ಸಿಂಗ್ ಸಿಧು ಟೀಮ್​ ಇಂಡಿಯಾ ಬೌಲಿಂಗ್ ಘಟಕವನ್ನು ಟೀಕಿಸಿದ್ದಾರೆ. ಸಿಧು ವಿಶೇಷವಾಗಿ ಅನ್ಶುಲ್ ಕಾಂಬೋಜ್ ಮತ್ತು ಮೊಹಮ್ಮದ್ ಸಿರಾಜ್ ಅವರನ್ನು ಗುರಿಯಾಗಿಸಿಕೊಂಡು ಟೀಕಿಸಿದ್ದಾರೆ.

ಮ್ಯಾಂಚೆಸ್ಟರ್‌ನಲ್ಲಿ, ಮೊಹಮ್ಮದ್ ಸಿರಾಜ್ ಮತ್ತು ಅನ್ಶುಲ್ ಕಾಂಬೋಜ್ ಗಂಟೆಗೆ 120 ರಿಂದ 130 ಕಿ.ಮೀ ವೇಗದಲ್ಲಿ ಬೌಲಿಂಗ್ ಮಾಡುತ್ತಿದ್ದಾರೆ. ಸ್ಪಿನ್ನರ್ ಅನಿಲ್ ಕುಂಬ್ಳೆ ಕೂಡ ಈ ವೇಗದಲ್ಲಿ ಬೌಲಿಂಗ್ ಮಾಡಲು ಸಾಧ್ಯವಿದೆ. ಕಾಂಬೋಜ್ ತಮ್ಮ ಮೊದಲ ಟೆಸ್ಟ್ ಆಡುವಾಗ ಈ ರೀತಿ ಬೌಲಿಂಗ್ ಮಾಡುವುದು ಸರಿಯಲ್ಲ. ಅವರು ವಿಕೆಟ್ ಪಡೆಯದಿದ್ದರೂ, ಕನಿಷ್ಠ ಬ್ಯಾಟ್ಸ್‌ಮನ್‌ಗಳನ್ನು ನಿರ್ಬಂಧಿಸಬೇಕು ಎಂದರು.

ಇದನ್ನೂ ಓದಿ: ನೀವು ತುಂಬಾ ಕೋಪಿಷ್ಟರಾ? ಕೋಪದಿಂದ ಎಷ್ಟು ರೋಗಗಳು ಬರುತ್ತವೆ ಗೊತ್ತಾ? ಪಟ್ಟಿ ಇಲ್ಲಿದೆ ನೋಡಿ… Anger Effects

ಅದೇ ರೀತಿ, ಶಾರ್ದೂಲ್ ಠಾಕೂರ್ ಅವರನ್ನು ತಂಡಕ್ಕೆ ಏಕೆ ಮರಳಿ ಕರೆತರಲಾಯಿತು ಎಂದು ನನಗೆ ಅರ್ಥವಾಗುತ್ತಿಲ್ಲ. ಅವರು ಪಂದ್ಯಕ್ಕೆ 30 ರಿಂದ 40 ರನ್ ಗಳಿಸಬಹುದು. ಆದರೆ, ಅವರು ಬೌಲಿಂಗ್‌ನಲ್ಲಿ ಸಂಪೂರ್ಣ ವಿಫಲರಾಗಿದ್ದಾರೆ. ವಿಕೆಟ್‌ಗಳ ವಿಷಯವನ್ನು ಬದಿಗಿಟ್ಟು, ಪ್ರಸಿದ್ಧ್ ಕೃಷ್ಣ ಅವರಂತೆ ಹೆಚ್ಚು ರನ್ ನೀಡದೆ 15 ಓವರ್‌ಗಳನ್ನು ಬೌಲಿಂಗ್ ಮಾಡಬಹುದೇ? ಅದೇ ರೀತಿ, ಜಡೇಜಾ ಆಟದ ಮೂರನೇ ದಿನದಂದು 68 ಓವರ್‌ಗಳನ್ನು ಬೌಲಿಂಗ್ ಮಾಡುವುದನ್ನು ನೋಡಿ ನನಗೆ ಆಶ್ಚರ್ಯವಾಯಿತು ಎಂದರು.

ಕಳೆದ ಪಂದ್ಯದಲ್ಲಿ ನಾಲ್ಕು ವಿಕೆಟ್ ಕಬಳಿಸಿದ ವಾಷಿಂಗ್ಟನ್​ ಸುಂದರ್ ಅವರನ್ನು ಗಿಲ್ ಸರಿಯಾಗಿ ಬಳಸಿಕೊಳ್ಳಲಿಲ್ಲ. ಅವರನ್ನು ಇನ್ನಿಂಗ್ಸ್​ನ ಮಧ್ಯದಲ್ಲಿ ಆಡಿಸಲಿಲ್ಲ. ಸುಂದರ್ ಒಬ್ಬ ಅದ್ಭುತ ಸ್ಪಿನ್ನರ್. ಈ ಪಂದ್ಯದಲ್ಲಿ ಅವರು ಹ್ಯಾರಿ ಬ್ರೂಕ್‌ಗೆ ಎಸೆದ ಎಸೆತ ನನಗೆ ದಂತಕಥೆ ಸ್ಪಿನ್ನರ್ ಎರಪಳ್ಳಿ ಪ್ರಸನ್ನ ಅವರನ್ನು ನೆನಪಿಸಿತು ಎಂದು ಸಿಧು ತಮ್ಮ ಯೂಟ್ಯೂಬ್ ಚಾನೆಲ್‌ನಲ್ಲಿ ಹೇಳಿದ್ದಾರೆ.

ಪಂದ್ಯದ ವಿಚಾರಕ್ಕೆ ಮೊದಲ ಇನ್ನಿಂಗ್ಸ್​ನಲ್ಲಿ ಭಾರತ ನೀಡಿದ್ದ 358 ರನ್​ ಗುರಿಯನ್ನು ಬೆನ್ನತ್ತಿದ ಇಂಗ್ಲೆಂಡ್​, ಮೊದಲ ಇನ್ನಿಂಗ್ಸ್​ನಲ್ಲಿ ತನ್ನೆಲ್ಲ ವಿಕೆಟ್​ ಕಳೆದುಕೊಂಡು 669 ರನ್​ ಕಲೆಹಾಕಿದೆ. ಎರಡನೇ ಇನ್ನಿಂಗ್ಸ್​ ಆರಂಭಿಸಿರುವ ಭಾರತ 2 ವಿಕೆಟ್​ ಕಳೆದುಕೊಂಡು 174 ರನ್​ ಗಳಿಸಿದ್ದು, 137 ರನ್​ ಹಿನ್ನಡೆ ಅನುಭವಿಸಿದೆ. ಇಂದು ನಾಲ್ಕನೇ ಟೆಸ್ಟ್​ ಪಂದ್ಯದ ಅಂತಿಮ ದಿನ. ಸದ್ಯಕ್ಕೆ ಕೆ.ಎಲ್​. ರಾಹುಲ್​ (87) ಮತ್ತು ನಾಯಕ ಶುಭಮಾನ್​ ಗಿಲ್​ (78) ರನ್​ ಗಳಿಸಿ ಕ್ರೀಸ್​ನಲ್ಲಿದ್ದಾರೆ. (ಏಜೆನ್ಸೀಸ್​)

https://www.vijayavani.net/tim-david-scores-fastest-t20-century-for-australia-in-series-clinching-win

https://www.vijayavani.net/the-mens-asia-cup-will-be-held-in-the-united-arab-emirates-uae-from-september