ಮಾಡ್ನೂರು ಗ್ರಾಮದ ಕೊಚ್ಚಿ ವ್ಯಾಪ್ತಿಗೆ ಮತ್ತೆ ಕಾಡಾನೆ ಲಗ್ಗೆ ಇಟ್ಟು ಕೃಷಿ ನಾಶ ಮಾಡಿದೆ. ಗುರುವಾರ ರಾತ್ರಿ ಕಾಡಾನೆ ಕೊಚ್ಚಿಯ ಕೃಷ್ಣಪ್ರಸಾದ್ ಅವರ ತೋಟಕ್ಕೆ ನುಗ್ಗಿ ಅಡಕೆ, ತೆಂಗು, ಬಾಳೆ ಕೃಷಿಗಳನ್ನು ನಾಶ ಮಾಡಿರುವುದಾಗಿ ತಿಳಿದು ಬಂದಿದೆ. ಕಳೆದ ಮಂಗಳವಾರ ರಾತ್ರಿ ಕಾಡಾನೆ ಪೂವಂದೂರಿನ ನಾರಾಯಣ ರಾವ್ ಅವರ ತೋಟಕ್ಕೆ ನುಗ್ಗಿ ತೆಂಗು, ಅಡಕೆ, ಬಾಳೆ ಇನ್ನಿತರ ಕೃಷಿಗಳನ್ನು ನಾಶ ಮಾಡಿತ್ತು. ಅದಕ್ಕೆ ಮೊದಲು ಕಾಡಾನೆ ಪೂವಂದೂರು ವ್ಯಾಪ್ತಿಯ ಸ್ವಾತಿ ಭಟ್, ನಿರ್ಮಲಾ ರಾವ್, ಮಹೇಶ್ ಪೂವಂದೂರು ಮತ್ತಿತರ ಕೃಷಿಕರ ತೋಟಗಳಿಗೆ ನುಗ್ಗಿ ಅಡಕೆ, ತೆಂಗು, ಬಾಳೆಗಿಡಗಳನ್ನು ನಾಶಗೊಳಿಸಿ ಅಪಾರ ಪ್ರಮಾಣದ ನಷ್ಟವನ್ನುಂಟು ಮಾಡಿತ್ತು.
