ಉಡುಪಿ: ಮಣಿಪಾಲ ಕಸ್ತೂರ್ಬಾ ಆಸ್ಪತ್ರೆ ಆವರಣದಲ್ಲಿ ಹೊಸದಾಗಿ ನಿರ್ಮಿಸಲಾದ ಅತ್ಯಾಧುನಿಕ ಸೌಲಭ್ಯಗಳು ಮತ್ತು ಸೇವೆಗಳನ್ನು ಒಳಗೊಂಡ ಡಾ. ರಾಮದಾಸ್ ಎಂ. ಪೈ ಬ್ಲಾಕ್ ಅನ್ನು ಡಾ. ಟಿಎಂಎ ಪೈ 126ನೇ ಜನ್ಮ ದಿನಾಚರಣೆಯಂದು ಮಂಗಳವಾರ ಎಂಇಎಂಜಿ ಮುಖ್ಯಸ್ಥ ಹಾಗೂ ಮಾಹೆ ಟ್ರಸ್ಟ್ ಅಧ್ಯಕ್ಷ ಡಾ.ರಂಜನ್ ಆರ್. ಪೈ ಹಾಗೂ ಮಾಹೆ ಟ್ರಸ್ಟಿ ವಸಂತಿ ಆರ್. ಪೈ ಉದ್ಘಾಟಿಸಿದರು.
ಈ ಸಂದರ್ಭದಲ್ಲಿ ಮಾಹೆ ಸಹ ಕುಲಾಧಿಪತಿ ಡಾ.ಎಚ್.ಎಸ್.ಬಲ್ಲಾಳ್, ಮಣಿಪಾಲ್ ಹೆಲ್ತ್ ಎಂಟರ್ ಪ್ರೈಸಸ್ ಪ್ರೈ. ಲಿ. ಮುಖ್ಯಸ್ಥ ಡಾ.ಎಚ್.ಸುದರ್ಶನ್ ಬಲ್ಲಾಳ್ , ಮಾಹೆ ಕುಲಪತಿ ಡಾ. ಎಂ.ಡಿ ವೆಂಕಟೇಶ್ , ಸಹ ಕುಲಪತಿ ಡಾ.ಶರತ್ ಕುಮಾರ್ ರಾವ್ , ಕುಲಸಚಿವ ಡಾ.ಗಿರಿಧರ್ ಕಿಣಿ, ಟಿ.ಅಶೋಕ್ ಪೈ, ಯು.ಸತೀಶ್ ಪೈ, ಡಾ.ಕೆ.ವಿ ಕಾಮತ್, ನಾಡೋಜ ಡಾ. ಜಿ. ಶಂಕರ್, ಡಾ. ನಾರಾಯಣ ಸಭಾಹಿತ್, ಸಿಜಿ ಮುತ್ತಣ್ಣ , ಡಾ.ರವಿರಾಜ್, ಡಾ.ಪದ್ಮರಾಜ್ ಹೆಗ್ಡೆ, ಡಾ.ಆನಂದ್ ವೇಣುಗೋಪಾಲ್, ಡಾ.ಅವಿನಾಶ್ ಶೆಟ್ಟಿ ಮತ್ತು ಡಾ.ಶಿರನ್ ಶೆಟ್ಟಿ ಮೊದಲಾದವರು ಉಪಸ್ಥಿತರಿದ್ದರು.
ಬ್ಲಾಕ್ ವಿಶೇಷತೆ
ರೋಗಿಗಳಿಗೆ ದೀರ್ಘಾವಧಿಯ ಕಾಯುವಿಕೆಯನ್ನು ತಪ್ಪಿಸಲು ಆನ್ಲೈನ್ ಅಪಾಯಿಂಟ್ಮೆಂಟ್ ಮತ್ತು ಆಯ್ಕೆಯ ಪರಿಣಿತ ಸಲಹೆಗಾರರನ್ನು ತಮ್ಮ ಅನುಕೂಲ ಸಮಯದಲ್ಲಿ ಭೇಟಿ ಮಾಡಲು ಪ್ರೀಮಿಯಂ ಹೊರರೋಗಿ ಸಮಾಲೋಚನೆ ಸೌಲಭ್ಯ ಹೊಸ ಬ್ಲಾಕ್ ಒಳಗೊಂಡಿದೆ. ಇದರಲ್ಲಿ 10 ಹೊರರೋಗಿ ಸಮಾಲೋಚನೆ ಕೊಠಡಿಗಳು, 34 ಡಬಲ್ ಆಕ್ಯುಪೆನ್ಸಿ ಕೊಠಡಿಗಳು, 75 ಖಾಸಗಿ ಕೊಠಡಿಗಳು, 4 ಪ್ರಮುಖ ಸುಧಾರಿತ ಅತ್ಯಾಧುನಿಕ ಆಪರೇಷನ್ ಥಿಯೇಟರ್ಗಳು, 4 ಪ್ರೀಮಿಯರ್ ಸೂಟ್ ರೂಮ್ಗಳೊಂದಿಗೆ 4 ಶಸ್ತ್ರಚಿಕಿತ್ಸಾ ಪೂರ್ವ ಹಾಸಿಗೆಗಳು, 4 ಶಸ್ತ್ರ್ತ್ರ ಚಿಕಿತ್ಸಾ ನಂತರದ ಕೊಠಡಿಗಳು , 14 ತೀವ್ರ ನಿಗಾ ಘಟಕ ಹಾಸಿಗೆಗಳು , 10 ಎಚ್ ಡಿ ಯು ಹಾಸಿಗೆಗಳು ಮತ್ತು 16 ಹಾಸಿಗೆಗಳ ದಿನದ ಆರೈಕೆ ಘಟಕ. ಹೀಗೆ ಹೊಸ ಬ್ಲಾಕ್ನಲ್ಲಿ ಒಟ್ಟು 161 ಒಳರೋಗಿ ಹಾಸಿಗೆಗಳು ಒಳಗೊಂಡಿರುತ್ತದೆ. ಇಲ್ಲಿ ರಕ್ತದ ಮಾದರಿ ಸಂಗ್ರಹಣೆ, ರೋಗರ್ನಿಣಯ ಮತ್ತು ಡೇ ಕೇರ್ ಕಾರ್ಯವಿಧಾನಗಳನ್ನು ಮಾಡಲಾಗುತ್ತದ. ಇದರಲ್ಲಿ ಇಂರ್ಟವೆನ್ಷನಲ್ ರೇಡಿಯಾಲಜಿ ಕಾರ್ಯವಿಧಾನಗಳಿಗೆ ಉನ್ನತ-ಮಟ್ಟದ ಬೈ-ಪ್ಲೇನ್ ಕ್ಯಾಥ್ ಲ್ಯಾಬ್ ಸೌಲಭ್ಯವಿದೆ. ಜೊತೆಗೆ ವಿಶೇಷವಾದ ವಿದೇಶಿ ರೋಗಿಗಳನ್ನು ಚಿಕಿತ್ಸಾ ಸೌಲಭ್ಯಗಳನ್ನು ಈ ಹೊಸ ಬ್ಲಾಕ್ ಹೊಂದಿದೆ.