ಹನು ರಾಘವ್ಪುಡಿ ನಿರ್ದೇಶನದ ಹಾಗೂ ಪ್ರಭಾಸ್ ನಟಿಸಿರುವ 'ಫೌಜಿ' ಚಿತ್ರದಲ್ಲಿ ಬಣ್ಣ ಹಚ್ಚಿರುವ ಇಮಾನ್ವಿಯನ್ನು ತಪ್ಪಾಗಿ ಪಾಕಿಸ್ತಾನಿ ಎಂದು ಕರೆದಿರುವ ನೆಟ್ಟಿಗರು, ಆಕೆಯನ್ನು ತಕ್ಷಣವೇ ಚಿತ್ರತಂಡದಿಂದ ತೆಗೆಯಬೇಕು ಎಂದು ಒತ್ತಾಯಿಸಿದ್ದಾರೆ. ಕಡೆಗೂ ಈ ಕುರಿತು ತನ್ನ ಬೇಸರ ಹೊರಹಾಕಿದ ಯುವ ನಟಿ, ಸುದೀರ್ಘ ಬರಹದ ಮುಖೇನ ತಾನು ಪಾಕಿಸ್ತಾನಿ ಅಲ್ಲ ಎಂಬುದನ್ನು ಸ್ಪಷ್ಟಪಡಿಸಿದ್ದಾರೆ. ಮೊದಲಿಗೆ ಪಹಲ್ಗಾಮ್ ದಾಳಿಯಲ್ಲಿ ಮೃತಪಟ್ಟವರಿಗೆ ಸಂತಾಪ ಸೂಚಿಸಿದ ಇಮಾನ್ವಿ, "ಕಲಾವಿದೆಯಾಗಿ ನನಗೆ ಪ್ರೀತಿ ಹಂಚುವುದು ಗೊತ್ತೇ ಹೊರತು, ದ್ವೇಷದ ಕಿಚ್ಚಲ್ಲ. ಕಳೆದ ಎರಡು-ಮೂರು ದಿನಗಳಿಂದ ನನ್ನ ವಿರುದ್ಧ ಕೇಳಿಬಂದಿರುವ ಆರೋಪಗಳು ಶುದ್ಧ ಸುಳ್ಳು. ನಾನು ಪಾಕಿಸ್ತಾನಿಯಲ್ಲ. ನನಗೆ ಅಥವಾ ನನ್ನ ಕುಟುಂಬಕ್ಕೆ ಪಾಕ್ ಸೇನೆಯೊಂದಿಗೆ ಯಾವ ಸಂಬಂಧವೂ ಇಲ್ಲ" ಎಂದು ಹೇಳಿದ್ದಾರೆ.
