ಭಾರತೀಯ ಜಲಸೀಮೆ ಅಕ್ರಮ ಪ್ರವೇಶ ಸಾಬೀತು...

ಆಪಾದಿತರಿಗೆ ದಂಡ ವಿಧಿಸಿದ ಉಡುಪಿ ನ್ಯಾಯಾಲಯ

ಓಮನ್​ ಬೋಟ್​ನೊಂದಿಗೆ ಆಗಮಿಸಿದ್ದ ಮೂವರು

ವಿಜಯವಾಣಿ ಸುದ್ದಿಜಾಲ ಉಡುಪಿ

ಓಮನ್​ ದೇಶದ ಬೋಟಿನೊಂದಿಗೆ ಭಾರತೀಯ ಜಲಸೀಮೆಯನ್ನು ಅಕ್ರಮವಾಗಿ ಪ್ರವೇಶಿಸಿದ್ದ ಆರೋಪ ಸಾಬೀತಾದ ಹಿನ್ನೆಲೆಯಲ್ಲಿ ಮೂವರು ಆಪಾದಿತರಿಗೆ ನ್ಯಾಯಾಲಯ ದಂಡ ವಿಧಿಸಿದೆ.

ಭಾರತೀಯ ಪ್ರಜೆಗಳಾದ ಜೇಮ್ಸ್​ ಫ್ರಾಂಕ್ಲಿನ್​, ರಾಬಿನ್​ಸ್ಟನ್​ ಹಾಗೂ ಟಿರೋಸ್​ ಡಿರೋಸ್​ ಎಂಬವರು ಆಪಾದಿತರಾಗಿದ್ದು, ಪ್ರಿನ್ಸಿಪಲ್​ (ಸೀನಿಯರ್​) ಸಿವಿಲ್​ ಜಡ್ಜ್​ ಮತ್ತು ಸಿಜೆಎಂ ನ್ಯಾಯಾಲಯವು ಇಬ್ಬರಿಗೆ ತಲಾ 10 ಸಾವಿರ ರೂ. ಹಾಗೂ ಇನ್ನೋರ್ವನಿಗೆ 60 ಸಾವಿರ ರೂ. ಸೇರಿ ಒಟ್ಟು 80 ಸಾವಿರ ರೂ. ದಂಡ ವಿಧಿಸಿದೆ ಎಂದು ಕರಾವಳಿ ಕಾವಲು ಪೊಲೀಸ್​ ಅಧೀಕ್ಷಕರ ಉಡುಪಿ ಕಚೇರಿ ಪ್ರಕಟಣೆಯಲ್ಲಿ ತಿಳಿಸಿದೆ.

ಮಂಗಳೂರು ಕೋಸ್ಟ್​ ಗಾರ್ಡ್​ ಪ್ರಧಾನ ಅಧಿಕಾರಿ ಸುಖ್ವಿಂದರ್​ ಸಿಂಗ್​ ಅವರು 2025ರ ಫೆ.24ರಂದು ಸಿಬ್ಬಂದಿಯೊಂದಿಗೆ ಸಮುದ್ರ ಗಸ್ತಿನಲ್ಲಿರುವಾಗ ಓಮನ್​ ದೇಶದ ಬೋಟ್​ ಹಾಗೂ ಅದರಲ್ಲಿ ಮೂವರು ಮೀನುಗಾರರು ಅಕ್ರಮವಾಗಿ ಭಾರತೀಯ ಜಲಸೀಮೆಯೊಳಗೆ ಪ್ರವೇಶಿಸಿರುವುದು ಕಂಡು ಬಂದಿತ್ತು. ಸೂಕ್ತ ಕಾನೂನು ಕ್ರಮ ಕೈಗೊಳ್ಳುವಂತೆ ಅವರು ದೂರು ನೀಡಿದ್ದು, ಮಲ್ಪೆ ಕರಾವಳಿ ಕಾವಲು ಪೊಲೀಸ್​ ಠಾಣೆಯ ಪೊಲೀಸ್​ ನಿರೀಕ್ಷಕ ಲೋಕೇಶ ಎ.ಸಿ. ಈ ಬಗ್ಗೆ ಪ್ರಕರಣ ದಾಖಲಿಸಿದ್ದರು.

ಭಾರತೀಯ ಪ್ರಜೆಗಳಾದ ಅವರೆಲ್ಲರೂ ಓಮಾನ್​ ದೇಶದಲ್ಲಿ ಮೀನುಗಾರಿಕಾ ಕೆಲಸಕ್ಕೆಂದು ಹೋಗಿದ್ದು, ವಿದೇಶದಲ್ಲಿ ಸಂಪಾದನೆ ಕುಂಠಿತಗೊಂಡಿತ್ತು. ಹೀಗಾಗಿ ಮೂಲ ಪಾಸ್​ಪೋರ್ಟ್​ ಓಮಾನ್​ ದೇಶದ ಬೋಟ್​ನ ಮಾಲೀಕನಾದ ಅಬ್ದುಲ್ಲಾ ಎಂಬಾತನ ಬಳಿಯಲ್ಲಿತ್ತು. ಸ್ವದೇಶಕ್ಕೆ ಹಿಂದಿರುಗಲು ಮೂಲ ಪಾಸ್​ಪೋರ್ಟ್​ ಕೇಳಿದರೂ ಮಾಲೀಕ ನೀಡದ ಕಾರಣದಿಂದ ಆತನ ಬೋಟ್​ನೊಂದಿಗೆ ಮೂವರೂ ಸ್ವದೇಶಕ್ಕೆ ಬಂದಿದ್ದರು.

ಯಾವುದೇ ಮೂಲ ಪಾಸ್​ಪೋರ್ಟ್​ ಹಾಗೂ ಪರವಾನಗಿ ಇಲ್ಲದೆ ಭಾರತೀಯ ಜಲಸೀಮೆಯೊಳಗೆ ವಿದೇಶದ ಬೋಟ್​ನೊಂದಿಗೆ ಅಕ್ರಮವಾಗಿ ಪ್ರವೇಶ ಮಾಡಿದ್ದರು. ಈ ಕುರಿತಂತೆ ಮಲ್ಪೆ ಕರಾವಳಿ ಕಾವಲು ಪೊಲೀಸ್​ ಅಧೀಕ್ಷಕರು ಹಾಗೂ ಇತರ ಹಿರಿಯ ಅಧಿಕಾರಿಗಳ ಮಾರ್ಗದರ್ಶನದಲ್ಲಿ ಸಿಎಸ್​ಪಿ ಮಲ್ಪೆಯ ಪಿಎಸ್​ಐ ಶಿವಶಂಕರ ಅವರು ತನಿಖೆ ನಡೆಸಿ, 33 ಸಾಕ್ಷಿದಾರರ ವಿಚಾರಣೆ ನಡೆಸಿ ನ್ಯಾಯಾಲಯಕ್ಕೆ ಆರೋಪ ಪಟ್ಟಿ ಸಲ್ಲಿಸಿದ್ದರು.