ಸಿಧು 'ಸೂಪರ್​ ಸಿಎಂ' ಆಗಲು ಪ್ರಯತ್ನಿಸಿದರೆ ಕಾಂಗ್ರೆಸ್​ಗೆ ಕುತ್ತು ಎಂದ ಕ್ಯಾಪ್ಟನ್!

ಚಂಡೀಗಢ: ಶಾಸಕರ ಬಂಡಾಯದ ನೆರಳಲ್ಲಿ ರಾಜೀನಾಮೆ ನೀಡಿದ ಪಂಜಾಬ್​ನ ನಿಕಟಪೂರ್ವ ಮುಖ್ಯಮಂತ್ರಿ ಕ್ಯಾಪ್ಟನ್ ಅಮರೀಂದರ್​ ಸಿಂಗ್​, ತಮ್ಮ ಮುಂದಿನ ರಾಜಕೀಯ ಪ್ರಯಾಣದ ಬಗ್ಗೆ ಇನ್ನೂ ಯಾವುದೇ ಮಾಹಿತಿ ನೀಡಿಲ್ಲ. ಆದರೆ, ಪಿಪಿಸಿಸಿ ಅಧ್ಯಕ್ಷ ನವಜೋತ್​ ಸಿಂಗ್​ ಸಿಧು ಅವರನ್ನು ಪಕ್ಷವು ಮುಂದಿನ ಸಿಎಂ ಆಗಿ ಬಿಂಬಿಸಿದಲ್ಲಿ ಅವರ ವಿರುದ್ಧ ಚುನಾವಣೆಯಲ್ಲಿ ತಮ್ಮ ಅಭ್ಯರ್ಥಿಯನ್ನು ಇಳಿಸುವುದಾಗಿ ಎಚ್ಚರಿಸಿದ್ದಾರೆ.

ಚಂಡೀಗಢದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿರುವ ಕ್ಯಾಪ್ಟನ್​, ಪಕ್ಷವನ್ನು 'ದೆಹಲಿಯಿಂದ ನಡೆಸುತ್ತಿರುವ ರೀತಿ'ಯ ಬಗ್ಗೆ ಕಳವಳ ವ್ಯಕ್ತಪಡಿಸಿದ್ದಾರೆ. ಕೆ.ಕೆ.ವೇಣುಗೋಪಾಲ್​, ಅಜಯ್​ ಮಕೇನ್​ ಅಥವಾ ರಣದೀಪ್​ ಸುರ್ಜೇವಾಲಾರಂಥ ಕಾಂಗ್ರೆಸ್​ ನಾಯಕರು ರಾಜ್ಯದಲ್ಲಿ ಯಾರು ಯಾವ ಸಚಿವಾಲಯಕ್ಕೆ ಸೂಕ್ತ ಎಂದು ಹೇಗೆ ನಿರ್ಧರಿಸಬಲ್ಲರು ಎಂದು ಪ್ರಶ್ನಿಸಿದ್ದಾರೆ. ತಾವು ಸಿಎಂ ಆಗಿದ್ದಾಗ ತಮಗೆ ಪ್ರತಿಯೊಬ್ಬರ ಸಾಮರ್ಥ್ಯ ತಿಳಿದಿದ್ದರಿಂದ ತಾವೇ ನಿರ್ಧಾರಗಳನ್ನು ತೆಗೆದುಕೊಂಡದ್ದಾಗಿ ಹೇಳಿದ್ದಾರೆ.

ಇದನ್ನೂ ಓದಿ: ಯಾರ ಮೇಲೆ ನಂಬಿಕೆ ಇದೆಯೋ ಅವರನ್ನೇ ಆಯ್ಕೆ ಮಾಡಲಿ: ರಾಜೀನಾಮೆ ನೀಡಿದ ಕ್ಯಾಪ್ಟನ್​ ಉದ್ಗಾರ

ಮಂಗಳವಾರದಂದು ಹೊಸ ಸಿಎಂ ಚರಣ್​ಜೀತ್​ ಸಿಂಗ್ ಚನ್ನಿ ಅವರು, ಸಿಧು ಜೊತೆಗೆ ರಾಜಧಾನಿ ದೆಹಲಿಗೆ ರಾಜ್ಯ ಸಂಪುಟ ರಚನೆ ಬಗ್ಗೆ ಚರ್ಚೆ ಮಾಡಲು ತೆರಳಿದ್ದರು ಎನ್ನಲಾಗಿದ್ದು, ಈ ಹಿನ್ನೆಲೆಯಲ್ಲಿ ಕ್ಯಾಪ್ಟನ್​ ಹೇಳಿಕೆ ನೀಡಿದ್ದಾರೆ. ಮೊದಲ ದಲಿತ ಸಿಎಂ ಆದ ಚನ್ನಿ ಬಗ್ಗೆ ಪ್ರತಿಕ್ರಿಯಿಸಿ, ನಮ್ಮ ಧರ್ಮಗಳು ನಮಗೆ ಎಲ್ಲರೂ ಸಮಾನ ಎಂದು ಹೇಳುತ್ತವೆ. ನಾನು ಜನರನ್ನು ಅವರ ಜಾತಿ ಆಧಾರದ ಮೇಲೆ ನೋಡುವುದಿಲ್ಲ. ಬದಲಿಗೆ ಅವರ ದಕ್ಷತೆ ಮುಖ್ಯ" ಎಂದಿರುವ ಕ್ಯಾಪ್ಟನ್​, ಚನ್ನಿ ಆಳ್ವಿಕೆಯಲ್ಲಿ ಸಿಧು ಅವರೇ ನಿರ್ಣಯಗಳನ್ನು ತೆಗೆದುಕೊಳ್ಳುತ್ತಿರುವಂತೆ ಭಾಸವಾಗುತ್ತಿದೆ ಎಂದಿದ್ದಾರೆ.

ಸಿಧು ವಿರುದ್ಧ ಹರಿಹಾಯ್ದಿರುವ ಕ್ಯಾಪ್ಟನ್​, ಪಿಸಿಸಿ ಮುಖ್ಯಸ್ಥರು ಪಕ್ಷದ ವ್ಯವಹಾರಗಳ ಮೇಲೆ ಗಮನ ಹರಿಸಬೇಕು. ಅವರು 'ಸೂಪರ್​ ಸಿಎಂ' ಆಗಿ ವರ್ತಿಸಿದರೆ, ಪಕ್ಷ ಕಾರ್ಯ ನಿರ್ವಹಿಸುವುದಿಲ್ಲ ಎಂದಿದ್ದಾರೆ. ಜೊತೆಗೇ, ಸಿಧು ಅವರತ್ತಲೇ ಬೆಟ್ಟು ಮಾಡುತ್ತಾ, "ಈ ಡ್ರಾಮಾ ಮಾಸ್ಟರ್​ ನಾಯಕತ್ವದಲ್ಲಿ ಕಾಂಗ್ರೆಸ್​ ಪಂಜಾಬ್​ ಚುನಾವಣೆಗಳಲ್ಲಿ ಎರಡಂಕಿಯನ್ನೂ ತಲುಪುವುದು ಕಷ್ಟವಾದೀತು" ಎಂದು ಅಭಿಪ್ರಾಯಪಟ್ಟಿದ್ದಾರೆ. (ಏಜೆನ್ಸೀಸ್)

https://www.vijayavani.net/man-punches-nurse-for-giving-vaccine-to-wife-without-his-consent/

https://www.vijayavani.net/bbmp-wakes-up-after-fire-accident-orders-against-unsafe-alterations-to-apartment-balconies/