ನವದೆಹಲಿ: ಕ್ರಿಕೆಟ್ ನಿಯಮಾವಳಿಗಳು ಕಾಲಕಾಲಕ್ಕೆ ಬದಲಾಗುತ್ತ ಅಥವಾ ತಿದ್ದುಪಡಿಯಾಗುತ್ತಲೇ ಬಂದಿವೆ. ನಿಯಮಗಳಲ್ಲಿ ಕಾಣಿಸುವ ದೋಷಗಳು ಮತ್ತು ತಂತ್ರಜ್ಞಾನದ ಅನುಕೂಲಗಳು ಇದಕ್ಕೆ ಪ್ರಮುಖ ಕಾರಣಗಳಾಗಿವೆ. ಇದರಂತೆ ಐಸಿಸಿ ಇತ್ತೀಚೆಗೆ ಅಂತಾರಾಷ್ಟ್ರೀಯ ಕ್ರಿಕೆಟ್ ಆಟದ ಕರಾರುಗಳಲ್ಲಿ (ಪ್ಲೇಯಿಂಗ್ ಕಂಡೀಷನ್) ಕೆಲ ಬದಲಾವಣೆಗಳನ್ನು ತಂದಿವೆ. ಬೌಂಡರಿ ಗೆರೆ ಬಳಿ ಕ್ಯಾಚ್ ಹಿಡಿಯುವ ಮತ್ತು ಏಕದಿನದಲ್ಲಿ 35ನೇ ಓವರ್ ಬಳಿಕ ಒಂದೇ ಚೆಂಡು ಬಳಸುವ ನಿಯಮ ಈಗಾಗಲೆ ಬಹಿರಂಗಗೊಂಡಿತ್ತು.
ಇದೀಗ ಐಸಿಸಿ ತನ್ನ ಸದಸ್ಯ ರಾಷ್ಟ್ರಗಳಿಗೆ ಕಳುಹಿಸಿರುವ ಮೂರೂ ಮಾದರಿಯ ಕ್ರಿಕೆಟ್ ಆಟದ ಬದಲಾದ ಕರಾರುಗಳ ಪಟ್ಟಿಯಲ್ಲಿ ಇನ್ನಷ್ಟು ತಿದ್ದುಪಡಿ ಅಥವಾ ಹೊಸ ನಿಯಮಗಳ ವಿವರ ಬೆಳಕಿಗೆ ಬಂದಿವೆ. ಈ ಪೈಕಿ ಟೆಸ್ಟ್ ಕ್ರಿಕೆಟ್ನಲ್ಲಿ ಐಸಿಸಿ ವಿಶ್ವ ಟೆಸ್ಟ್ ಚಾಂಪಿಯನ್ಷಿಪ್ (ಡಬ್ಲ್ಯುಟಿಸಿ) 4ನೇ ಆವೃತ್ತಿಯ ಆರಂಭದಿಂದಲೇ ಈ ನಿಯಮಗಳು ಬಳಕೆಯಾಗುತ್ತಿದ್ದರೆ, ಸೀಮಿತ ಓವರ್ ಪ್ರಕಾರದಲ್ಲಿ ಜುಲೈ 2ರಿಂದ ಜಾರಿಗೆ ಬರಲಿವೆ. ಅಂಥ ಕೆಲ ಬದಲಾದ ನಿಯಮಗಳ ಸಂಪ್ತ ವಿವರ ಇಲ್ಲಿದೆ…
ಟೆಸ್ಟ್ನಲ್ಲೂ ಸ್ಟಾಪ್ ಕ್ಲಾಕ್
ಒಂದು ಓವರ್ ಮುಗಿದ 60 ಸೆಕೆಂಡ್ನೊಳಗೆ ಮುಂದಿನ ಓವರ್ ಆರಂಭಗೊಳ್ಳಬೇಕೆಂಬ “ಸ್ಟಾಪ್ ಕ್ಲಾಕ್’ ನಿಯಮ ಈಗಾಗಲೆ 2024ರಿಂದಲೇ ಏಕದಿನ ಮತ್ತು ಟಿ20 ಕ್ರಿಕೆಟ್ನಲ್ಲಿ ಜಾರಿಯಲ್ಲಿದ್ದವು. ಇದೀಗ ಡಬ್ಲ್ಯುಟಿಸಿ 4ನೇ ಆವೃತ್ತಿಯಿಂದ ಇದು ಟೆಸ್ಟ್ ಕ್ರಿಕೆಟ್ನಲ್ಲೂ ಜಾರಿಗೆ ಬಂದಿದೆ. ಓವರ್ಗತಿ ಸುಧಾರಣೆ ಇದರ ಪ್ರಮುಖ ಉದ್ದೇಶವಾಗಿದೆ. ಸ್ಟಾಪ್ ಕ್ಲಾಕ್ ನಿಯಮದನ್ವಯ ಓವರ್ ಮುಗಿದ 60 ಸೆಕೆಂಡ್ನೊಳಗೆ ಮರುಓವರ್ ಶುರುವಾಗದಿದ್ದರೆ, ಅಂಪೈರ್ ಎರಡು ಬಾರಿ ಫೀಲ್ಡಿಂಗ್ ತಂಡಕ್ಕೆ ಎಚ್ಚರಿಕೆ ನೀಡುತ್ತಾರೆ. 3ನೇ ಬಾರಿ ಇದೇ ತಪು ಮಾಡಿದಾಗ ಅಂಪೈರ್ ಬೌಲಿಂಗ್ ತಂಡಕ್ಕೆ 5 ರನ್ ಪೆನಾಲ್ಟಿ ವಿಧಿಸುತ್ತಾರೆ. ಪ್ರತಿ ಇನಿಂಗ್ಸ್ನ 80ನೇ ಓವರ್ ಬಳಿಕ ಅಂಪೈರ್ ಎಚ್ಚರಿಕೆ ಶೂನ್ಯಕ್ಕೆ ಮರುಹೊಂದಿಕೆ (ರೀಸೆಟ್) ಆಗುತ್ತದೆ. ಸ್ಟಾಪ್ ಕ್ಲಾಕ್ 0ಯಿಂದ 60 ಸೆಕೆಂಡ್ಗೆ ಎಣಿಸುತ್ತದೆ.
ಎಂಜಲು ಬಳಸಿದರೆ ಚೆಂಡು ಬದಲಾಗದು
ಚೆಂಡಿಗೆ ಎಂಜಲು ಹಚ್ಚಿ ಶೈನ್ ಮಾಡಲು ಯತ್ನಿಸುವುದನ್ನು ಐಸಿಸಿ ಕರೋನಾ ಕಾಲದಲ್ಲಿ ನಿಷೇಧಿಸಿತ್ತು. ಕಳೆದ ಐಪಿಎಲ್ನಲ್ಲಿ ಈ ನಿಷೇಧವನ್ನು ತೆರವುಗೊಳಿಸಿ, ಎಂಜಲು ಬಳಸಲು ಅವಕಾಶ ನೀಡಲಾಗಿತ್ತು. ಆದರೆ ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಚೆಂಡಿಗೆ ಎಂಜಲು ಹಚ್ಚುವುದರ ಮೇಲಿನ ರ್ನಿಬಂಧ ಮುಂದುವರಿಯಲಿದೆ. ಹಾಗೆಂದು ಇನ್ನು ಮುಂದೆ, ಚೆಂಡಿಗೆ ಎಂಜಲು ಹಚ್ಚಿರುವುದು ಕಂಡು ಬಂದ ತಕ್ಷಣ ಅದನ್ನು ಬದಲಾಯಿಸಲಾಗುವುದಿಲ್ಲ. ಕೆಲ ತಂಡಗಳು ಚೆಂಡು ಬದಲಾವಣೆಗಾಗಿ, ಉದ್ದೇಶಪೂರ್ವಕವಾಗಿ ಎಂಜಲು ಹಚ್ಚುವುದನ್ನು ತಡೆಯಲು ಈ ತಿದ್ದುಪಡಿ ತರಲಾಗಿದೆ.
ಹೀಗಾಗಿ ಇನ್ನು ಮುಂದೆ ಚೆಂಡಿನ ಸ್ಥಿತಿ ತೀರಾ ಬಿಗಡಾಯಿಸಿದ್ದಲ್ಲಿ ಮಾತ್ರ ಅದನ್ನು ಬದಲಿಸುವರು. ಎಂಜಲು ಬಳಕೆಯಿಂದಲೂ ಚೆಂಡಿನ ಸ್ಥಿತಿ ತೀರಾ ಹದಗೆಟ್ಟಲ್ಲಿ ಮಾತ್ರ ಬದಲಿಸಲು ಅಂಪೈರ್ ನಿರ್ಧಾರ ತೆಗೆದುಕೊಳ್ಳಬಹುದು. ಬೌಲಿಂಗ್ ತಂಡ ಚೆಂಡಿಗೆ ಎಂಜಲು ಹಚ್ಚಿದಾಗ ಬ್ಯಾಟಿಂಗ್ ತಂಡಕ್ಕೆ 5 ರನ್ ನೀಡುವ ನಿಯಮ ಮುಂದುವರಿಯಲಿದೆ.
ಡಿಆರ್ಎಸ್ ಶಿಷ್ಟಾಚಾರ ಬದಲು
ಬ್ಯಾಟರ್ ವಿರುದ್ಧ ಕ್ಯಾಚ್ ತೀರ್ಪಿಗಾಗಿ ಡಿಆರ್ಎಸ್ ಮೊರೆ ಹೋದಾಗ ತೃತೀಯ ಅಂಪೈರ್ ಅಲ್ಟ್ರಾಎಡ್ಜ್ ಪರಿಶೀಲಿಸುತ್ತಾರೆ. ಆಗ ಚೆಂಡು ಬ್ಯಾಟ್ ಸ್ಪರ್ಶಿಸದೆ ಇರುವುದು ಕಂಡು ಬಂದರೆ ಅದು ಕ್ಯಾಚ್ ಔಟ್ ಆಗಿರುವುದಿಲ್ಲ. ಬಳಿಕ ಟಿವಿ ಅಂಪೈರ್, ಅದೇ ಎಸೆತದಲ್ಲಿ ಬ್ಯಾಟರ್ ಎಲ್ಬಿಡಬ್ಲ್ಯು ಆಗಿರುವರೇ ಎಂದೂ ಪರಿಶೀಲಿಸುತ್ತಾರೆ. ಈ ವೇಳೆ ಎಲ್ಬಿಡಬ್ಲ್ಯು ತೀರ್ಪಿನ ಬಾಲ್-ಟ್ರಾಕಿಂಗ್ನಲ್ಲಿ “ಅಂಪೈರ್ಸ್ ಕಾಲ್’ ಬಂದರೆ ಇದುವರೆಗೆ ಅದನ್ನು “ನಾಟೌಟ್’ ಎಂದೇ ಪರಿಗಣಿಸಲಾಗುತಿತ್ತು. ಆದರೆ ಇನ್ನು ಮುಂದೆ ಅದು “ಔಟ್’ ಆಗಲಿದೆ. ಯಾಕೆಂದರೆ ಇನ್ನು ಮುಂದೆ ಒಂದೇ ಎಸೆತದ 2ನೇ ಡಿಆರ್ಎಸ್ ಪರಿಶೀಲನೆ ವೇಳೆ, ಮೈದಾನದ ಅಂಪೈರ್ನ “ಮೂಲ ನಿರ್ಧಾರ’ವನ್ನು “ಔಟ್’ ಎಂದೇ ಪರಿಗಣಿಸಲಾಗುತ್ತದೆ.
ಇನ್ನೊಂದು ಡಿಆರ್ಎಸ್ ಶಿಷ್ಟಾಚಾರ ಬದಲಾವಣೆಯ ಅನ್ವಯ, ಮೈದಾನದ ಅಂಪೈರ್ ಮತ್ತು ಆಟಗಾರರು ಏಕಕಾಲದಲ್ಲಿ ಟಿವಿ ಅಂಪೈರ್ ಪರಾಮರ್ಶೆಗೆ ಮನವಿ ಸಲ್ಲಿಸಿದಾಗ, ಮೈದಾನದಲ್ಲಿ ಟನೆಗಳನ್ನು ಕಾಲಾನುಕ್ರಮದಲ್ಲಿ ಪರಿಶೀಲಿಸಲಾಗುತ್ತದೆ. ಉದಾಹರಣೆಗೆ, ಏಕಕಾಲದಲ್ಲಿ ತೃತೀಯ ಅಂಪೈರ್ಗೆ ಎಲ್ಬಿಡಬ್ಲ್ಯು ಮತ್ತು ರನೌಟ್ ತೀರ್ಪಿಗಾಗಿ ಮನವಿ ಸಲ್ಲಿಸಿದಾಗ, ಮೊದಲಿಗೆ ಎಲ್ಬಿಡಬ್ಲ್ಯು ಪರಿಶೀಲಿಸಲಾಗುತ್ತದೆ. ಅದು ಔಟ್ ಆಗಿದ್ದರೆ ಅಲ್ಲಿಗೆ ಆ ಚೆಂಡು ಡೆಡ್ ಎಂದು ಪರಿಗಣಿಸಲಾಗುತ್ತದೆ. ಎಲ್ಬಿಡಬ್ಲ್ಯು ಔಟ್ ಇಲ್ಲದಿದ್ದರೆ ಮಾತ್ರ ರನೌಟ್ ಪರಿಶೀಲಿಸಲಾಗುತ್ತದೆ ಮತ್ತು ಆ ಎಸೆತದಲ್ಲಿ ಓಡಿದ ರನ್ ಪರಿಗಣಿಸಲಾಗುತ್ತದೆ.
ನೋಬಾಲ್ನಲ್ಲಿ ಕ್ಯಾಚ್ ಮಾನ್ಯತೆ ಪರಿಶೀಲನೆ
ಎಸೆತವೊಂದರಲ್ಲಿ ಫೀಲ್ಡರ್ ಕ್ಯಾಚ್ ಹಿಡಿದಾಗ ಆ ಕ್ಯಾಚ್ ಕ್ಲೀನ್ ಆಗಿದೆಯೇ ಎಂದು ಮೈದಾನದ ಅಂಪೈರ್ ಯೋಚಿಸುತ್ತಿರುವಾಗಲೇ, ಆ ಎಸೆತ ನೋಬಾಲ್ ಎಂದು ತೃತೀಯ ಅಂಪೈರ್ ಸಂದೇಶ ರವಾನಿಸುತ್ತಾರೆ. ಹಿಂದಿನ ಸಂದರ್ಭಗಳಲ್ಲಿ, ಟಿವಿ ಅಂಪೈರ್ ನೋಬಾಲ್ ಎಂದಾಗ ಆ ಕ್ಯಾಚ್ ಮಾನ್ಯವಾಗಿದೆಯೇ ಎಂದು ಮತ್ತೆ ಪರಿಶೀಲಿಸುತ್ತಿರಲಿಲ್ಲ. ಆದರೆ ಇನ್ನು ಮುಂದೆ ಹೊಸ ಆಟದ ಕರಾರಿನ ಅನ್ವಯ, ಅದು ನೋಬಾಲ್ ಆಗಿದ್ದರೂ ಕ್ಯಾಚ್ ಕ್ಲೀನ್ ಆಗಿತ್ತೇ ಎಂದು ಪರಿಶೀಲಿಸಲಾಗುತ್ತದೆ. ಅಲ್ಲದೆ ಆ ಕ್ಯಾಚ್ ಕ್ಲೀನ್ ಆಗಿದ್ದರೆ, ಬ್ಯಾಟಿಂಗ್ ತಂಡಕ್ಕೆ ನೋಬಾಲ್ನ 1 ರನ್ ಮಾತ್ರ ನೀಡಲಾಗುತ್ತದೆ. ಒಂದು ಆ ಕ್ಯಾಚ್ ಕ್ಲೀನ್ ಆಗಿರದಿದ್ದರೆ, ಆ ಎಸೆತದಲ್ಲಿ ಬ್ಯಾಟರ್ಗಳು ಓಡಿರುವ (ರನ್ ಓಡಿದ್ದರೆ) ರನ್ಗಳನ್ನೂ ಬ್ಯಾಟಿಂಗ್ ತಂಡಕ್ಕೆ ನೀಡಲಾಗುತ್ತದೆ.
ಶಾರ್ಟ್ ರನ್ ರೂಲ್ಸ್ ತಿದ್ದುಪಡಿ
ವಿಕೆಟ್ ನಡುವಿನ ಓಟದ ವೇಳೆ ಬ್ಯಾಟರ್ ಶಾರ್ಟ್ ರನ್ ತೆಗೆದುಕೊಳ್ಳುವುದು ಅಂದರೆ ಕ್ರೀಸ್ನೊಳಗೆ ಬ್ಯಾಟ್ ಅಥವಾ ಕಾಲು ಸ್ಪರ್ಶಿಸದೆ ಇನ್ನೊಂದು ಸ್ಟ್ರೆಕ್ನತ್ತ ಓಡುವುದು ಕಂಡು ಬಂದರೆ, ಇದುವರೆಗೆ ಅಂಪೈರ್ ಬ್ಯಾಟಿಂಗ್ ತಂಡಕ್ಕೆ 5 ರನ್ ಪೆನಾಲ್ಟಿ ನೀಡುತ್ತಿದ್ದರು. ಆದರೆ ಇನ್ನು ಮುಂದೆ ಬ್ಯಾಟರ್ಗಳು ವಿಕೆಟ್ ನಡುವಿನ ಓಟದ ವೇಳೆ, ಅಂಪೈರ್ ಕಣ್ತಪ್ಪಿಸಲು ಅಥವಾ ಸ್ಟ್ರೆಕ್ ಕಾಯ್ದುಕೊಳ್ಳಲು ಉದ್ದೇಶಪೂರ್ವಕವಾಗಿ ಶಾರ್ಟ್ ರನ್ ಕಸಿಯುವುದು ಕಂಡುಬಂದರೆ, ಅಂಪೈರ್ಗಳು ಫೀಲ್ಡಿಂಗ್ ತಂಡಕ್ಕೆ ಯಾವ ಬ್ಯಾಟರ್ ಸ್ಟ್ರೆಕ್ನಲ್ಲಿರಬೇಕೆಂದು ನಿರ್ಧರಿಸುವ ಅಧಿಕಾರ ನೀಡುತ್ತಾರೆ. ಜತೆಗೆ 5 ಪೆನಾಲ್ಟಿ ರನ್ ಕೂಡ ಲಭಿಸುತ್ತದೆ. ಆದರೆ ಅದು ಉದ್ದೇಶಪೂರ್ವಕ ಶಾರ್ಟ್ ರನ್ ಆಗಿಲ್ಲ ಎಂದು ಅಂಪೈರ್ ಪರಿಗಣಿಸಿದರೆ, ಈಗಿನಂತೆ 5 ರನ್ ಪೆನಾಲ್ಟಿ ಮಾತ್ರ ನೀಡಲಾಗುತ್ತದೆ.
ಗಾಯಾಳುಗೆ ಪೂರ್ಣ ಬದಲಿ ಆಟಗಾರ
ಕ್ರಿಕೆಟ್ನಲ್ಲಿ ಸದ್ಯ, ತಲೆಗೆ ಚೆಂಡೇಟು ಬಿದ್ದಾಗ “ಕನ್ಕಷನ್’ ಬದಲಿಯಾಗಿ ಬರುವ ಆಟಗಾರನಿಗೆ ಬ್ಯಾಟಿಂಗ್&ಬೌಲಿಂಗ್ ಅವಕಾಶ ನೀಡಲಾಗುತ್ತಿದೆ. ಆದರೆ ಇನ್ನು ಮುಂದೆ ಆಟಗಾರನೊಬ್ಬ ಗಂಭೀರ ಬಾಹ್ಯ ಗಾಯದಿಂದ ಮೈದಾನ ತೊರೆದಾಗ ಬರುವ ಬದಲಿ ಆಟಗಾರನಿಗೂ ಈ ಅವಕಾಶ ನೀಡುವ ಸಾಧ್ಯತೆ ಇದೆ. ಈ ಸಂಬಂಧ ಐಸಿಸಿ ಎಲ್ಲ ದೇಶಗಳ ಕ್ರಿಕೆಟ್ ಮಂಡಳಿಗಳಿಗೆ ದೇಶೀಯ ಪ್ರಥಮ ದರ್ಜೆ ಪಂದ್ಯಗಳಲ್ಲಿ ಇದನ್ನು ಜಾರಿಗೊಳಿಸಲು ಸೂಚಿಸಿದೆ.
ಇದರನ್ವಯ ಗಂಭೀರ ಬಾಹ್ಯ ಗಾಯಗೊಂಡ ಆಟಗಾರನಿಗೆ ಬದಲಿಯಾಗಿ ಕನ್ಕಷನ್ ಬದಲಿಯಂತೆ, ವೇಗಿಗೆ ವೇಗಿ, ಸ್ಪಿನ್ನರ್ಗೆ ಸ್ಪಿನ್ನರ್, ಬ್ಯಾಟರ್ಗೆ ಬ್ಯಾಟರ್, ಆಲ್ರೌಂಡರ್ಗೆ ಆಲ್ರೌಂಡರ್, ಕೀಪರ್ಗೆ ಕೀಪರ್ ಬದಲಿಗರಾಗಿ ಆಡಬಹುದು. ಅಲ್ಲದೆ ಇದಕ್ಕೆ ಮ್ಯಾಚ್ ರೆಫ್ರಿ ಒಪ್ಪಿಗೆಯೂ ಅಗತ್ಯ. ಆದರೆ ಸ್ನಾಯುಸೆಳೆತ ಅಥವಾ ಸಣ್ಣಪುಟ್ಟ ಗಾಯಗಳಾದಾಗ ಬರುವ ಬದಲಿ ಫೀಲ್ಡರ್ಗೆ ಈ ಅವಕಾಶ ಲಭಿಸುವುದಿಲ್ಲ. ಆತ ಫೀಲ್ಡಿಂಗ್ ಮಾತ್ರ ಮಾಡಲು ಅವಕಾಶವಿರುತ್ತದೆ. ದೇಶೀಯ ಕ್ರಿಕೆಟ್ನಲ್ಲಿ ಇದರ ಪ್ರಾಯೋಗಿಕ ಜಾರಿ ಯಶಸ್ವಿಯಾದರೆ, ಮುಂದೆ ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲೂ ಐಸಿಸಿ ಇದನ್ನು ಜಾರಿಗೊಳಿಸಲಿದೆ.