ಪಾಕ್​ ಜೆರ್ಸಿ ಧರಿಸುವ ಆಸಕ್ತಿಯೇ ನನಗಿಲ್ಲ! ಶೋಯಿಬ್ ಮಲಿಕ್ ಅಚ್ಚರಿ ಹೇಳಿಕೆ ಹಿಂದಿದೆ ಈ ಕಾರಣ

ಲಾಹೋರ್​: ಭಾರತೀಯ ಮಾಜಿ ಟೆನ್ನಿಸ್​ ಆಟಗಾರ್ತಿ ಸಾನಿಯಾ ಮಿರ್ಜಾ ಜತೆ ದಾಂಪತ್ಯ ಜೀವನ ಮುರಿದು ನೆಟ್ಟಿಗರ ತೀವ್ರ ಟೀಕೆ, ವ್ಯಂಗ್ಯಕ್ಕೆ ಗುರಿಯಾಗಿದ್ದ ಪಾಕಿಸ್ತಾನ ಕ್ರಿಕೆಟ್​ನ ಮಾಜಿ ಆಟಗಾರ ಶೋಯಿಬ್ ಮಲಿಕ್​, ಇದೀಗ ಮತ್ತೊಂದು ಅಚ್ಚರಿ ಹೇಳಿಕೆ ಮೂಲಕ ಮತ್ತೊಮ್ಮೆ ಮುನ್ನೆಲೆಗೆ ಬಂದಿದ್ದಾರೆ. ಈ ಹಿಂದೆಯೇ ಪಾಕಿಸ್ತಾನ ಪರ ಆಡಲು ನಾನು ಬಯಸುವುದಿಲ್ಲ ಎಂದು ಹೇಳಿದ್ದ ಮಲಿಕ್, ಈಗ ಮತ್ತೆ ಅದೇ ವಿಚಾರಕ್ಕೆ ಪ್ರತಿಕ್ರಿಯಿಸಿದ್ದು, ನನಗೆ ಪಾಕ್​ ಜೆರ್ಸಿ ತೊಡುವ ಆಸಕ್ತಿಯೇ ಇಲ್ಲ ಎಂದು ನೇರವಾಗಿ ಪಿಸಿಬಿಗೆ ಅರ್ಥವಾಗುವಂತೆ ತಿಳಿಸಿದ್ದಾರೆ.

ಇದನ್ನೂ ಓದಿ: ಬೋಧಕೇತರ ನೌಕರರಿಗೆ ಯುಜಿಸಿ ವೇತನ ನೀಡಿ

"2024ರ ಐಸಿಸಿ ಟಿ20 ವಿಶ್ವಕಪ್‌ಗೂ ಮೊದಲು ಪಾಕಿಸ್ತಾನ ಕ್ರಿಕೆಟ್ ಮಂಡಳಿ (ಪಿಸಿಬಿ) ತನಗೆ ಆಯ್ಕೆ ಸಮಿತಿಯಲ್ಲಿ ಆಯ್ಕೆಗಾರನಾಗಿ ಕಾರ್ಯನಿರ್ವಹಿಸುವಂತೆ ಆಫರ್​ವೊಂದನ್ನು ನೀಡಿತ್ತು. ಆದರೆ ಆ ಹುದ್ದೆಯನ್ನು ಅಲಂಕರಿಸುವ ಬಗ್ಗೆ ನಾನೇನು ಮಾತನಾಡದೆ, ಆನಂತರ ಅದನ್ನು ನಿರಾಕರಿಸಿದ್ದೆ. ನನ್ನ ಪ್ರಕಾರ, ಕ್ರಿಕೆಟಿಗನಾಗಿ ಸಕ್ರಿಯವಾಗಿರುವಾಗ ಆಯ್ಕೆಗಾರನಾಗುವುದು ಸರಿಯಲ್ಲ. ಹೀಗಿರುವಾಗ ಇದು ಸಾಧ್ಯವಿಲ್ಲ ಎಂದು ನನಗನಿಸಿತು" ಎಂದು ಹೇಳಿದರು.

"ಸದ್ಯದ ಮಟ್ಟಿಗೆ ನಾನು ಏಕದಿನ ಮತ್ತು ಟೆಸ್ಟ್​ ಕ್ರಿಕೆಟ್​ನಿಂದ ನಿವೃತ್ತಿ ಹೊಂದಿದ್ದೇನೆ. ಟಿ20 ಕ್ರಿಕೆಟ್‌ ಮತ್ತು ಮುಂಬರುವ ದೇಶೀಯ ಟಿ20 ಟೂರ್ನಿಗಳಲ್ಲಿ ಮಾತ್ರ ಆಡಲು ಸಿದ್ಧನಿದ್ದೇನೆ. ನನಗೆ ಪಾಕಿಸ್ತಾನಕ್ಕಾಗಿ ಕಣಕ್ಕಿಳಿಯಲು ಇಷ್ಟವಿಲ್ಲ. ಪಾಕ್​ನ ಜೆರ್ಸಿ ಧರಿಸಲು ನನಗೆ ಆಸಕ್ತಿಯೇ ಇಲ್ಲ. ದೇಶಿಯ ಕ್ರಿಕೆಟ್‌ನಲ್ಲಿ ಸ್ಪರ್ಧಿಸುವುದನ್ನು ಎಂದಿನಂತೆ ಮುಂದುವರೆಸುತ್ತೇನೆ. ಈ ಟೂರ್ನಿಗಳ ಜತೆ ಇನ್ನೂ ಒಂದಷ್ಟು ಲೀಗ್​ಗಳಲ್ಲಿ ಸ್ಪರ್ಧಿಸುವ ಯೋಚನೆ ಮಾಡಿದ್ದೀನಿ. ಶೀಘ್ರವೇ ಅವರೊಂದಿಗೆ ಮಾತುಕತೆ ಮಾಡುತ್ತೇನೆ" ಎಂದು ಶೋಯಿಬ್ ಹೇಳಿದ್ದಾರೆ,(ಏಜೆನ್ಸೀಸ್).

https://www.vijayavani.net/kid-refuses-to-leave-abductor-after-staying-14-months-together