ಟೆಸ್ಟ್​ ವಿಶ್ವಕಪ್​ ಫೈನಲ್​ಗೆ ಹೇಗಿದೆ ಭಾರತದ ಹಾದಿ? ಬಾರ್ಡರ್​-ಗಾವಸ್ಕರ್ ಟ್ರೋಫಿ ಫಲಿತಾಂಶ ಹೇಗಿರಬೇಕು? ಇಲ್ಲಿದೆ ಲೆಕ್ಕಾಚಾರ...

ಪರ್ತ್​: ಕ್ರಿಕೆಟ್​ ಪ್ರೇಮಿಗಳು ಕುತೂಹಲದಿಂದ ಕಾಯುತ್ತಿರುವ ಬಹುನಿರೀತ ಭಾರತ ಮತ್ತು ಆಸ್ಟ್ರೆಲಿಯಾ ತಂಡಗಳ ನಡುವಿನ ಬಾರ್ಡರ್​-ಗಾವಸ್ಕರ್​ ಟ್ರೋಫಿಯ (ಬಿಜಿಟಿ) 5 ಪಂದ್ಯಗಳ ಟೆಸ್ಟ್​ ಸರಣಿಗೆ ಇನ್ನು ಎರಡು ದಿನಗಳಷ್ಟೇ ಬಾಕಿ ಉಳಿದಿವೆ. ಈಗಾಗಲೆ ಉಭಯ ತಂಡಗಳ ಹಾಲಿ-ಮಾಜಿ ಆಟಗಾರರು ಮೈಂಡ್​ಗೇಮ್​ ಆರಂಭಿಸಿದ್ದಾರೆ. ಜತೆಗೆ ಸರಣಿಯ ಫಲಿತಾಂಶ ಏನಾಗಲಿದೆ ಎಂದು ಭವಿಷ್ಯವನ್ನೂ ನುಡಿಯಲಾಗುತ್ತಿದೆ. ಐಸಿಸಿ ವಿಶ್ವ ಟೆಸ್ಟ್​ ಚಾಂಪಿಯನ್​ಷಿಪ್​ (ಡಬ್ಲ್ಯುಟಿಸಿ) ಫೈನಲ್​ ಪ್ರವೇಶಿಸುವ ನಿಟ್ಟಿನಲ್ಲೂ ಈ ಸರಣಿ ಉಭಯ ತಂಡಗಳಿಗೂ ಮಹತ್ವದ್ದಾಗಿದೆ. ತವರಿನಲ್ಲಿ ನ್ಯೂಜಿಲೆಂಡ್​ ವಿರುದ್ಧ ವೈಟ್​ವಾಷ್​ ಮುಖಭಂಗ ಎದುರಿಸಿರುವ ಹಿನ್ನೆಲೆಯಲ್ಲಿ ಟೀಮ್​ ಇಂಡಿಯಾ, ಸತತ 3ನೇ ಬಾರಿ ಡಬ್ಲ್ಯುಟಿಸಿ ಫೈನಲ್​ಗೇರಬೇಕಾದರೆ ಈ ಸರಣಿಯನ್ನು ಭಾರಿ ಅಂತರದಿಂದ ಗೆಲ್ಲಬೇಕಾದ ಒತ್ತಡಕ್ಕೂ ಸಿಲುಕಿದೆ. ಈ ನಿಟ್ಟಿನಲ್ಲಿ ಸರಣಿಯ ಫಲಿತಾಂಶ ಹೇಗೆ ಬಂದರೆ ಭಾರತಕ್ಕೆ ಅನುಕೂಲ-ಅನನುಕೂಲಗಳಿವೆ ಮತ್ತು ಭಾರತದ ಲಾಭಕ್ಕಾಗಿ ಇತರ ಸರಣಿಗಳ ಫಲಿತಾಂಶ ಹೇಗಿರಬೇಕು ಎಂಬುದರ ಕಿರು ಲೆಕ್ಕಾಚಾರ ಇಲ್ಲಿದೆ.

2023-25ರ ಸಾಲಿನ ಡಬ್ಲ್ಯುಟಿಸಿಯ ಬಾಕಿ ಸರಣಿಗಳು

*ನವೆಂಬರ್​ 22-ಜನವರಿ 7: ಆಸ್ಟ್ರೆಲಿಯಾ-ಭಾರತ (5 ಟೆಸ್ಟ್​)

*ನವೆಂಬರ್​ 22-ಡಿಸೆಂಬರ್​ 4: ವೆಸ್ಟ್​ ಇಂಡೀಸ್​-ಬಾಂಗ್ಲಾ (2 ಟೆಸ್ಟ್​)

*ನವೆಂಬರ್​ 27-ಡಿಸೆಂಬರ್​ 9: ದ. ಆಫ್ರಿಕಾ-ಶ್ರೀಲಂಕಾ (2 ಟೆಸ್ಟ್​)

*ನವೆಂಬರ್​ 28-ಡಿಸೆಂಬರ್​ 18: ನ್ಯೂಜಿಲೆಂಡ್​-ಇಂಗ್ಲೆಂಡ್​ (3 ಟೆಸ್ಟ್​)

*ಡಿಸೆಂಬರ್​26-ಜನವರಿ 7: ದ. ಆಫ್ರಿಕಾ-ಪಾಕಿಸ್ತಾನ (2 ಟೆಸ್ಟ್​)

*ಜನವರಿ 16-28 : ಪಾಕಿಸ್ತಾನ-ವೆಸ್ಟ್​ ಇಂಡೀಸ್​ (2 ಟೆಸ್ಟ್​)

*ಜನವರಿ 29-ಫೆಬ್ರವರಿ 10: ಶ್ರೀಲಂಕಾ-ಆಸ್ಟ್ರೆಲಿಯಾ (2 ಟೆಸ್ಟ್​)

ರೇಸ್​ನಲ್ಲಿವೆ 5 ತಂಡಗಳು

ಹಾಲಿ ಡಬ್ಲ್ಯುಟಿಸಿ ಆವೃತ್ತಿಯಲ್ಲಿ ಇನ್ನು 18 ಟೆಸ್ಟ್​ ಪಂದ್ಯಗಳಷ್ಟೇ ಬಾಕಿ ಉಳಿದಿರುವ ನಡುವೆ 5 ಪ್ರಮುಖ ತಂಡಗಳು ಇನ್ನೂ ಫೈನಲ್​ ಪ್ರವೇಶಿಸುವ ರೇಸ್​ನಲ್ಲಿವೆ. ಅವುಗಳೆಂದರೆ ಆಸ್ಟ್ರೆಲಿಯಾ (ಶೇ. 62.50), ಭಾರತ (ಶೇ.58.33), ಶ್ರೀಲಂಕಾ (ಶೇ. 55.56), ನ್ಯೂಜಿಲೆಂಡ್​ (ಶೇ.54.55) ಮತ್ತು ದ. ಆಫ್ರಿಕಾ (ಶೇ.54.17). ಈ ತಂಡಗಳು ಸದ್ಯ ಡಬ್ಲ್ಯುಟಿಸಿ ಅಂಕಪಟ್ಟಿಯಲ್ಲಿ ಕ್ರಮವಾಗಿ ಮೊದಲ 5 ಸ್ಥಾನದಲ್ಲಿವೆ. ಅಂತಿಮವಾಗಿ ಅಗ್ರ 2 ತಂಡಗಳಷ್ಟೇ 2025ರ ಜೂನ್​ 11ರಿಂದ 15ರವರೆಗೆ (16 ಮೀಸಲು ದಿನ) ಲಾರ್ಡ್ಸ್​ನಲ್ಲಿ ನಡೆಯಲಿರುವ ಫೈನಲ್​ ಪಂದ್ಯದಲ್ಲಿ ಕಾದಾಡಲಿವೆ.

ಡಬ್ಲ್ಯುಟಿಸಿ ಫೈನಲ್​ಗೆ ಭಾರತದ ಲೆಕ್ಕಾಚಾರ...

*4-0/5-0ಯಿಂದ ಗೆದ್ದರೆ: ಬೇರಾವುದೇ ಸರಣಿಯ ಫಲಿತಾಂಶ ಲೆಕ್ಕಕ್ಕಿಲ್ಲದೆ ನೇರವಾಗಿ ಫೈನಲ್​ ಪ್ರವೇಶ.

*3-1/3-0/4-1ರಿಂದ ಗೆದ್ದರೆ: ಇಂಗ್ಲೆಂಡ್​ ವಿರುದ್ಧ ಸರಣಿಯಲ್ಲಿ ನ್ಯೂಜಿಲೆಂಡ್​ ಕನಿಷ್ಠ 1 ಟೆಸ್ಟ್​ನಲ್ಲಿ ಡ್ರಾಗೆ ತೃಪ್ತಿಪಡಬೇಕು.

*2-0ಯಿಂದ ಗೆದ್ದರೆ: ಇಂಗ್ಲೆಂಡ್​ ವಿರುದ್ಧ ಸರಣಿಯಲ್ಲಿ ನ್ಯೂಜಿಲೆಂಡ್​ ಕನಿಷ್ಠ 1 ಟೆಸ್ಟ್​ ಸೋಲಬೇಕು.

*3-2ರಿಂದ ಗೆದ್ದರೆ: ಇಂಗ್ಲೆಂಡ್​ ವಿರುದ್ಧ ನ್ಯೂಜಿಲೆಂಡ್​ ಕನಿಷ್ಠ 1 ಟೆಸ್ಟ್​ ಸೋಲಬೇಕು ಮತ್ತು ಆಸೀಸ್​-ಲಂಕಾ ಸರಣಿಯಲ್ಲಿ ಕನಿಷ್ಠ 1 ಟೆಸ್ಟ್​ ಡ್ರಾ ಆಗಬೇಕು.

*2-1/1-0ಯಿಂದ ಗೆದ್ದರೆ ಅಥವಾ 1-1 ಸಮಬಲವಾದರೆ: ಇಂಗ್ಲೆಂಡ್​ ವಿರುದ್ಧ ಸರಣಿಯಲ್ಲಿ ನ್ಯೂಜಿಲೆಂಡ್​ 1 ಟೆಸ್ಟ್​ ಮಾತ್ರ ಗೆಲ್ಲಬೇಕು ಮತ್ತು ಆಸೀಸ್​-ಲಂಕಾ ಸರಣಿಯಲ್ಲಿ ಕನಿಷ್ಠ 1 ಟೆಸ್ಟ್​ ಡ್ರಾ ಆಗಬೇಕು.

*2-2 ಸಮಬಲವಾದರೆ: ಇಂಗ್ಲೆಂಡ್​ ವಿರುದ್ಧ ಸರಣಿಯಲ್ಲಿ ನ್ಯೂಜಿಲೆಂಡ್​ 1 ಟೆಸ್ಟ್​ ಮಾತ್ರ ಗೆಲ್ಲಬೇಕು ಮತ್ತು ಆಸೀಸ್​ ವಿರುದ್ಧ ಶ್ರೀಲಂಕಾ ಸರಣಿ ಗೆಲ್ಲಬೇಕು.

*2-3ರಿಂದ ಸೋತರೆ: ಇಂಗ್ಲೆಂಡ್​ ವಿರುದ್ಧ ಸರಣಿಯಲ್ಲಿ ನ್ಯೂಜಿಲೆಂಡ್​ 1 ಟೆಸ್ಟ್​ ಮಾತ್ರ ಗೆಲ್ಲಬೇಕು ಮತ್ತು ದಣ ಆಫ್ರಿಕಾ, ಶ್ರೀಲಂಕಾ ತಂಡಗಳು ತಮ್ಮ ಉಳಿದ 4 ಟೆಸ್ಟ್​ಗಳಲ್ಲಿ ತಲಾ 2ರಲ್ಲಿ ಸೋಲಬೇಕು.

*1-2/1-3/0-1ರಿಂದ ಸೋತರೆ ಅಥವಾ 0-0 ಸಮಬಲವಾದರೆ: ನ್ಯೂಜಿಲೆಂಡ್​ ವಿರುದ್ಧ ಇಂಗ್ಲೆಂಡ್​ ಸರಣಿ ಗೆಲ್ಲಬೇಕು ಮತ್ತು ದಣ ಆಫ್ರಿಕಾ ತಂಡ ಲಂಕಾ ಎದುರು 1-1 ಸಮಬಲ, ಪಾಕ್​ ವಿರುದ್ಧ 0-2ರಿಂದ ಸೋಲಬೇಕು ಮತ್ತು ಲಂಕಾ ವಿರುದ್ಧ ಆಸೀಸ್​ 2-0ಯಿಂದ ಗೆಲ್ಲಬೇಕು.

*1-4, 0-2, 0-3ರಿಂದ ಸೋತರೆ: ನ್ಯೂಜಿಲೆಂಡ್​ ವಿರುದ್ಧ ಇಂಗ್ಲೆಂಡ್​ 2-0 ಅಥವಾ 3-0ಯಿಂದ ಗೆಲ್ಲಬೇಕು ಮತ್ತು ದಣ ಆಫ್ರಿಕಾ ತಂಡ ಲಂಕಾ ಎದುರು 1-1 ಸಮಬಲ, ಪಾಕ್​ ವಿರುದ್ಧ 0-2ರಿಂದ ಸೋಲಬೇಕು ಮತ್ತು ಲಂಕಾ ವಿರುದ್ಧ ಆಸೀಸ್​ 2-0ಯಿಂದ ಗೆಲ್ಲಬೇಕು.

*0-4/0-5ರಿಂದ ಸೋತರೆ: ಭಾರತ ಫೈನಲ್​ಗೇರಲು ಸಾಧ್ಯವೇ ಇಲ್ಲ.

ಪರ್ತ್​ನಲ್ಲಿ ಮಳೆ ನಡುವೆ ಕೊಹ್ಲಿ ಅಭ್ಯಾಸ

ಶುಕ್ರವಾರ ಶುರುವಾಗಲಿರುವ ಆಸೀಸ್​ ವಿರುದ್ಧದ ಟೆಸ್ಟ್​ ಸರಣಿಗೆ ಪೂರ್ವಭಾವಿಯಾಗಿ ಭಾರತ ತಂಡ ಮಂಗಳವಾರ, ಮೊದಲ ಟೆಸ್ಟ್​ ಪಂದ್ಯ ನಡೆಯಲಿರುವ ಪರ್ತ್​ನ ಆಪ್ಟಸ್​ ಸ್ಟೇಡಿಯಂನಲ್ಲಿ ಕೊನೇ ಹಂತದ ಸಿದ್ಧತೆ ಆರಂಭಿಸಿತು. ನೆಟ್ಸ್​ ಅಭ್ಯಾಸದ ವೇಳೆ ಮಳೆ ಅಡಚಣೆ ತಂದರೂ, ಕೊಹ್ಲಿ ಮೈದಾನ ತೊರೆಯಲು ನಿರಾಕರಿಸಿ ನಿರಂತರ ಬ್ಯಾಟಿಂಗ್​ ಅಭ್ಯಾಸ ಮುಂದುವರಿಸಿದರು. ನಂತರ ಮಳೆ ಹೆಚ್ಚಾದಾಗ ಅವರೂ ಮೈದಾನ ತ್ಯಜಿಸಬೇಕಾಯಿತು. ತವರಿನ ಕಿವೀಸ್​ ವಿರುದ್ಧ ಸರಣಿಯಲ್ಲಿ ಕೇವಲ 93 ರನ್​ ಗಳಿಸಿದ್ದ 36 ವರ್ಷದ ಕೊಹ್ಲಿ ಆಸೀಸ್​ ನೆಲದಲ್ಲಿ ಲಯಕ್ಕೆ ಮರಳುವ ಹಂಬಲದಲ್ಲಿದ್ದಾರೆ.

https://www.vijayavani.net/indias-home-odi-world-cup-final-bitter-memory-one-year