ವಿಜಯವಾಣಿ ಸುದ್ದಿಜಾಲ ಕೋಟ
ಸಾಲಿಗ್ರಾಮ ಪಟ್ಟಣ ಪಂಚಾಯಿತಿ ವ್ಯಾಪ್ತಿಯ ಯಕ್ಷಿಮಠ, ಪಾಂಡೇಶ್ವರ ಗ್ರಾಮ ಪಂಚಾಯಿತಿಯ ಸೂಲ್ಕುದ್ರು, ಕೋಡಿ ಗ್ರಾಪಂ ವ್ಯಾಪ್ತಿಯಲ್ಲಿ ಸೋಮವಾರ ಬೆಳಗ್ಗೆ ಹಠಾತ್ ಉಪ್ಪು ನೀರಿನಿಂದ ಕೃತಕ ನೆರೆ ಉಂಟಾಗಿದ್ದು, ಕೃಷಿ ಭೂಮಿ ಸಹಿತ ಮನೆಗಳು ಜಲಾವೃತಗೊಂಡಿವೆ. ಇದರಿಂದ ಜನರು ನೆಲೆ ಕಳೆದುಕೊಂಡಿದ್ದಾರೆ.
ಸುಮಾರು ನಲವತ್ತುಕ್ಕೂ ಅಧಿಕ ಕೃಷಿ ಭೂಮಿಯಲ್ಲಿ ಉದ್ದು, ಅವರೆ ಸಹಿತ ಹಲವು ಬೆಳೆ ಬೆಳೆಯಲಾಗುತ್ತಿದ್ದು, ಪದೇಪದೇ ಉಂಟಾಗುವ ಉಪ್ಪುನೀರಿನ ಕೃತಕ ನೆರೆಗೆ ಕೃಷಿ ಹಾನಿ ಹಾಗೂ ಭೂಮಿ ಬರಡಾಗುತ್ತಿದೆ. ಇನ್ನೂ ಕೆಲವೆಡೆ ತರಕಾರಿಗಳನ್ನು ಪ್ರಧಾನ ಬೆಳೆಯಾಗಿ ಬೆಳೆಯಲಾಗುತ್ತಿದ್ದು, ಉಪ್ಪುನೀರಿನ ನೆರೆಯಿಂದ ಅವುಗಳೂ ನಷ್ಟವಾಗುವ ಭೀತಿ ಎದುರಾಗಿದೆ.
ಯಕ್ಷಿಮಠ ಪರಿಸರದಲ್ಲಿ ಹೊಳೆ ಸಾಲುಗಳಿಗೆ ತಡೆ ದಂಡೆ ನಿರ್ಮಿಸಿದರೆ ಉಪ್ಪು ನೀರಿನ ನೆರೆ ಸಮಸ್ಯೆಗೆ ಮುಕ್ತಿ ನೀಡಬಹುದು. ಈ ಕುರಿತು ಅಧಿಕಾರಿಗಳು, ಜನಪ್ರತಿನಿಧಿಗಳ ಗಮನಕ್ಕೆ ತಂದರೂ ಯಾವುದೇ ಪ್ರಯೋಜನವಾಗಿಲ್ಲ ಎನ್ನುತ್ತಾರೆ ಸ್ಥಳೀಯರು.
ಪಟ್ಟಣ ಪಂಚಾಯಿತಿ ವ್ಯಾಪ್ತಿಯಲ್ಲಿರುವ ಯಕ್ಷಿಮಠದಲ್ಲಿ ನಲವತ್ತರಿಂದ ಐವತ್ತು ಮನೆಗಳಿಗೆ ಹಾಗೂ ನಲವತ್ತು ಎಕರೆ ಕೃಷಿ ಭೂಮಿ ಉಪ್ಪು ನೀರು ನುಗ್ಗಿ ಹಾನಿಗಳಾಗುತ್ತಲೇ ಇದ್ದರೂ ಸಂಬಂಧಿತರು ಯಾರೂ ಗಮನಹರಿಸುತ್ತಿಲ್ಲ. ಕೃಷಿ ಹಾನಿಯಿಂದ ಕೃಷಿಕರ ಜೀವನ ಸಂಕಷ್ಟಕ್ಕೆ ಸಿಲುಕಿದ್ದು, ಸಮಸ್ಯೆಗಳನ್ನು ಕೂಡಲೇ ಬಗೆಹರಿಸದಿದ್ದಲ್ಲಿ ಗ್ರಾಮಸ್ಥರು ಒಗ್ಗೂಡಿ ಪ್ರತಿಭಟನೆ ನಡೆಸಲಿದ್ದೇವೆ ಎಂದು ಸ್ಥಳೀಯರು ಎಚ್ಚರಿಕೆ ನೀಡಿದ್ದಾರೆ.
