ನರೇಂದ್ರ ಎಸ್.ಮರಸಣಿಗೆ ಹೆಬ್ರಿ
ಹೆಬ್ರಿ ಕೆಳಪೇಟೆಯಿಂದ ಚಾರ ಕ್ರಾಸ್ ತನಕ ಸುಮಾರು ಮೂರು ಕಿ.ಮೀ. ರಸ್ತೆ ಸಂಪೂರ್ಣ ಹೊಂಡ ಗುಂಡಿಗಳಿಂದ ಕೂಡಿದ್ದು, ಸಂಚಾರಕ್ಕೆ ಸವಾಲಾಗಿದೆ.
ಚಾರ ನಾಗಬ್ರಹ್ಮ ಸ್ಥಾನದ ಬಳಿ, ಹೆಬ್ರಿ ಕೇಳಪೇಟೆ, ಯೂನಿಯನ್ ಬ್ಯಾಂಕ್ ಮುಂಭಾಗ, ಚಾರ ಪಂಚಾಯಿತಿ, ಗಾಂಧಿನಗರ, ಚಾರ ಕ್ರಾಸ್ನಲ್ಲಿ ಬೃಹತ್ ಗಾತ್ರದ ಗುಂಡಿಗಳು ಸವಾರರನ್ನು ಹೈರಾಣಾಗಿಸಿದೆ. ಸಮಸ್ಯೆಗೆ ಯಾವುದೇ ಕ್ರಮ ವಹಿಸದೆ ಲೋಕೋಪಯೋಗಿ ಇಲಾಖೆ ಬೇಜವಾಬ್ದಾರಿ ಮೆರೆದಿದೆ.
ಚಾರ ಗ್ರಾಮ ಪಂಚಾಯಿತಿ ಹಾಗೂ ಯೂನಿಯನ್ ಬ್ಯಾಂಕ್ ಮುಂಭಾಗದಲ್ಲಿ ಬೃಹತ್ ಗಾತ್ರದ ಗುಂಡಿಗಳಲ್ಲಿ ನೀರು ತುಂಬಿದ್ದು, ವಾಹನಗಳು ಸಂಚರಿಸುವಾಗ ಸಾರ್ವಜನಿಕರು, ಶಾಲಾ ಮಕ್ಕಳಿಗೆ ಕೆಸರಿನ ಸಿಂಚನವಾಗುತ್ತದೆ. ಪಂಚಾಯಿತಿ ಮುಂಭಾಗದಲ್ಲೇ ಬೃಹತ್ ಗಾತ್ರದ ಗಂಡಿಗಳು ನಿರ್ಮಾಣವಾಗಿದ್ದರೂ ಪಂಚಾಯಿತಿಯೂ ಕಣ್ಮುಚ್ಚಿ ಕುಳಿತಿರುವುದಕ್ಕೆ ಸಾರ್ವಜನಿಕರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ. ರಸ್ತೆ ದುರಸ್ತಿ ಮಾಡುವಂತೆ ಲೋಕೋಪಯೋಗಿ ಇಲಾಖೆಗೆ ಪಂಚಾಯಿತಿ ಆಡಳಿತ ಸಾಕಷ್ಟು ಬಾರಿ ಮನವಿ ಮಾಡಿದರೂ ಯಾವುದೇ ಪ್ರಯೋಜನವಾಗಿಲ್ಲ.
ದ್ವಿಚಕ್ರ ಸವಾರರಿಗೆ ಸವಾಲು: ಕೆಲವು ಕಡೆ ಗುಂಡಿಗಳನ್ನು ಅಂದಾಜಿಸಲೂ ಸಾಧ್ಯವಾಗದಷ್ಟು ಬೃಹತ್ ಆಗಿವೆ. ದ್ವಿಚಕ್ರ ವಾಹನ ಸವಾರರು ಇಲ್ಲಿ ಸ್ವಲ್ಪ ನಿಯಂತ್ರಣ ತಪ್ಪಿದರೂ ಪ್ರಾಣಕ್ಕೆ ಕುತ್ತು ಬರುತ್ತದೆ. ಅನೇಕ ಕಡೆ ರಸ್ತೆಯಲ್ಲಿ ನೀರು ಹರಿದು ಗುಂಡಿ ನಿರ್ವಾಣ ಆಗಿದೆ. ಕನಿಷ್ಠ ಪಕ್ಷ ತೇಪೆ ಕಾಮಗಾರಿಯನ್ನಾದರೂ ಮಾಡಿ ರಸ್ತೆ ಗುಂಡಿಗಳನ್ನು ಮುಚ್ಚಿ ಸುರಕ್ಷಿತ ಸಂಚಾರಕ್ಕೆ ಅನುವು ಮಾಡಿಕೊಡಬೇಕೆಂದು ಈ ಭಾಗದ ನಾಗರಿಕು ಆಗ್ರಹಿಸಿದ್ದಾರೆ.
