ಮದ್ಯ ಕುಡಿದ ಕೂಡಲೇ ದೇಹದಲ್ಲಿ ಆಗುವ ಬದಲಾವಣೆಗಳೇನು? ಇಲ್ಲಿದೆ ನೋಡಿ ನಿಮಗೆ ಗೊತ್ತಿರದ ಅಚ್ಚರಿ ಮಾಹಿತಿ | Alcohol

Alcohol Affects: ಮದ್ಯಪಾನ ಆರೋಗ್ಯಕ್ಕೆ ಹಾನಿಕಾರಕ ಎಂದು ಬಾಟಲಿ ಅಥವಾ ಮದ್ಯದ ಪ್ಯಾಕೆಟ್​ ಮೇಲೆ ಬರೆದಿದ್ದರೂ ಕುಡಿತಕ್ಕೆ ದಾಸರಾದವರು ಮಾತ್ರ ಅದಕ್ಕೆಲ್ಲ ಕಿಂಚಿತ್ತು ತಲೆಕಡಿಸಿಕೊಳ್ಳಲ್ಲ! ಕೆಲವರು ವಾರಾಂತ್ಯದಲ್ಲಿ ತಮ್ಮ ಮಾನಸಿಕ ನೆಮ್ಮದಿ ಮತ್ತು ಸಂತೋಷಕ್ಕಾಗಿ ಕುಡಿದರೆ, ಇನ್ನೂ ಕೆಲವರು ಪ್ರತಿದಿನ ಕಂಠಪೂರ್ತಿ ಸೇವಿಸಿ, ನಶೆಯಲ್ಲಿ ತೂರಾಡುತ್ತಾರೆ.

ಎಣ್ಣೆ ಎಫೆಕ್ಟ್​ ಕುಡಿದ ತಕ್ಷಣ ಕಾಡಲು ಶುರುವಾಗುತ್ತದೆ. ಮದ್ಯಪಾನ ಮಾಡಿದ ಕೇವಲ 6 ನಿಮಿಷಗಳಲ್ಲಿ ಅದರ ಪರಿಣಾಮ ಮಿದುಳಿನ ಕೋಶಗಳನ್ನು ತಲುಪುತ್ತದೆ. ಆ ಸಮಯದಲ್ಲಿ, ಡೋಪಮೈನ್ ಬಿಡುಗಡೆಯಾಗುತ್ತದೆ. ಇದು ಖುಷಿ ಮತ್ತು ವಿಶ್ರಾಂತಿಯ ಭಾವನೆಗಳಿಗೆ ಕಾರಣವಾಗುತ್ತದೆ. ಇದಕ್ಕೆ ಮುಖ್ಯ ಕಾರಣ ಗಾಬಾ ಅಮೈನೊ ಬ್ಯುಟರಿಕ್ ಆಮ್ಲ (GABA) ಎಂಬ ನ್ಯೂರೋಟ್ರಾನ್ಸ್​ಮೀಟರ್​. ಇದು ನಿಮ್ಮನ್ನು ಇದಕ್ಕಿದ್ದಂತೆ ಧೈರ್ಯಶಾಲಿ ಎಂಬ ಭಾವನೆಗೆ ದೂಡುತ್ತದೆ ಮತ್ತು ನಿಮ್ಮಿಂದ ಅಪಾಯಕಾರಿ, ಅನಾಹುತಗಳನ್ನು ಮಾಡುವಂತೆ ಮಾಡುತ್ತದೆ. ಇದು ಮದ್ಯದ ಪ್ರಮುಖ ಅಡ್ಡಪರಿಣಾಮ!

ಮದ್ಯಪಾನ ಹೃದಯ ಬಡಿತ ಮತ್ತು ರಕ್ತದೊತ್ತಡವನ್ನು ಹೆಚ್ಚಿಸುತ್ತದೆ. ಇದು ನೇರವಾಗಿ ಕಿಡ್ನಿಗಳ ಮೇಲೆ ಪರಿಣಾಮ ಬೀರುತ್ತದೆ. ಎಣ್ಣೆಯನ್ನು ಕುಡಿಯುವುದರಿಂದ ಅತಿಯಾದ ಮೂತ್ರ ವಿಸರ್ಜನೆಯಿಂದಾಗಿ ದೇಹದಲ್ಲಿ ನೀರಿನ ಕೊರತೆ ಕೂಡ ಉಂಟಾಗುತ್ತದೆ. ವಾಸೊಪ್ರೆಸಿನ್ ಎಂಬ ಹಾರ್ಮೋನ್ ಉತ್ಪಾದನೆಯಲ್ಲಿನ ಇಳಿಕೆಯಿಂದಾಗಿ ನಿರ್ಜಲೀಕರಣ ದ್ವಿಗುಣಗೊಳ್ಳುತ್ತದೆ. ಒಟ್ಟಾರೆಯಾಗಿ, ಮೋಜಿನ ನೆಪದಲ್ಲಿ ಶುರುವಾಗುವ ಕುಡಿತ, ಚಟವಾಗಿ ಬದಲಾಗುವ ಮೂಲಕ ದೊಡ್ಡ ಅಪಾಯವನ್ನು ತಂದೊಡ್ಡಲಿದೆ,(ಏಜೆನ್ಸೀಸ್).