ನಮ್ಮ ದೇಹವು ಉಸಿರಾಡುವುದಕ್ಕಾಗಿಯೇ ಮೂಗನ್ನು ವಿನ್ಯಾಸಗೊಳಿಸಿದೆ. ಮೂಗಿನ ಮೂಲಕ ಗಾಳಿ ಒಳಹೋದಾಗ ಅದು ಸೋಸಲ್ಪಡುತ್ತದೆ (Filter), ತೇವಾಂಶವನ್ನು ಪಡೆಯುತ್ತದೆ ಮತ್ತು ದೇಹದ ಉಷ್ಣತೆಗೆ ತಕ್ಕಂತೆ ಬದಲಾಗುತ್ತದೆ. ಆದರೆ, ಬಾಯಿ ಮೂಲಕ ಉಸಿರಾಡಿದಾಗ ಈ ಯಾವುದೇ ಪ್ರಕ್ರಿಯೆಗಳು ನಡೆಯುವುದಿಲ್ಲ. ಇದರಿಂದ ನೇರವಾಗಿ ತಣ್ಣನೆಯ ಮತ್ತು ಅಶುದ್ಧ ಗಾಳಿ ಶ್ವಾಸಕೋಶವನ್ನು ತಲುಪುತ್ತದೆ.

ಬಾಯಿ ಮೂಲಕ ಉಸಿರಾಡುವಾಗ ರಕ್ತದಲ್ಲಿ ಆಮ್ಲಜನಕದ ಮಟ್ಟ (Oxygen Saturation) ಕಡಿಮೆಯಾಗುತ್ತದೆ. ಇದರಿಂದ ಮೆದುಳಿಗೆ ಸರಿಯಾದ ವಿಶ್ರಾಂತಿ ಸಿಗುವುದಿಲ್ಲ. ಪರಿಣಾಮವಾಗಿ, ರಾತ್ರಿ ಪೂರ್ತಿ ಮಲಗಿದರೂ ಬೆಳಿಗ್ಗೆ ಎದ್ದಾಗ ತಲೆನೋವು ಅಥವಾ ಅತಿಯಾದ ಆಯಾಸ ಕಾಡುತ್ತದೆ.

ಬಾಯಿ ತೆರೆದು ಉಸಿರಾಡುವುದರಿಂದ ಬಾಯಲ್ಲಿರುವ ಲಾಲಾರಸ (Saliva) ಒಣಗಿ ಹೋಗುತ್ತದೆ. ಲಾಲಾರಸವು ಬಾಯಲ್ಲಿರುವ ಬ್ಯಾಕ್ಟೀರಿಯಾಗಳನ್ನು ಕೊಲ್ಲುವ ಕೆಲಸ ಮಾಡುತ್ತದೆ. ಅದು ಇಲ್ಲದಿದ್ದಾಗ ಬ್ಯಾಕ್ಟೀರಿಯಾಗಳು ವೃದ್ಧಿಯಾಗಿ ಹಲ್ಲು ಕುಸಿಯುವುದು, ವಸಡಿನ ಸಮಸ್ಯೆ ಮತ್ತು ಬಾಯಿ ದುರ್ವಾಸನೆ ಉಂಟಾಗುತ್ತದೆ.

ಬಾಯಿ ಮೂಲಕ ಉಸಿರಾಡುವವರಲ್ಲಿ ಗೊರಕೆ ಹೊಡೆಯುವ ಸಮಸ್ಯೆ ಸಾಮಾನ್ಯ. ಇದು ಮುಂದೆ 'ಸ್ಲೀಪ್ ಅಪ್ನಿಯಾ' ಎಂಬ ಗಂಭೀರ ಸಮಸ್ಯೆಗೆ ದಾರಿಯಾಗಬಹುದು. ಇದರಲ್ಲಿ ನಿದ್ದೆಯಲ್ಲೇ ಕೆಲ ಕ್ಷಣ ಉಸಿರಾಟ ನಿಂತುಹೋಗುವ ಅಪಾಯವಿರುತ್ತದೆ.

ವಿಶೇಷವಾಗಿ ಮಕ್ಕಳಲ್ಲಿ ಈ ಅಭ್ಯಾಸವಿದ್ದರೆ, ಬೆಳೆಯುತ್ತಾ ಅವರ ಮುಖ ಉದ್ದವಾಗುವುದು, ಗಲ್ಲದ ಭಾಗ ಹಿಂದೆ ಸರಿಯುವುದು ಅಥವಾ ಹಲ್ಲುಗಳು ಸರಿಯಾದ ಸಾಲಿನಲ್ಲಿ ಇರದಿರುವಂತಹ ಸಮಸ್ಯೆಗಳು ಕಾಣಿಸಿಕೊಳ್ಳಬಹುದು. ಇದನ್ನು ವೈದ್ಯಕೀಯ ಲೋಕದಲ್ಲಿ 'ಅಡೆನಾಯ್ಡ್ ಫೇಸ್' ಎನ್ನಲಾಗುತ್ತದೆ.

ಗಾಢ ನಿದ್ದೆ ಇಲ್ಲದಿರುವುದು ದೇಹದಲ್ಲಿ ಒತ್ತಡದ ಹಾರ್ಮೋನ್ (Cortisol) ಅನ್ನು ಹೆಚ್ಚಿಸುತ್ತದೆ. ಇದು ದೀರ್ಘಕಾಲದಲ್ಲಿ ಅಧಿಕ ರಕ್ತದೊತ್ತಡ ಮತ್ತು ಹೃದಯದ ಸಮಸ್ಯೆಗಳಿಗೆ ಕಾರಣವಾಗಬಹುದು.

ಮೂಗಿನ ಹಾದಿ ಸ್ವಚ್ಛವಿರಲಿ: ಅಲರ್ಜಿ ಅಥವಾ ನೆಗಡಿಯಿಂದ ಮೂಗು ಕಟ್ಟಿದ್ದರೆ ತಕ್ಷಣ ಚಿಕಿತ್ಸೆ ಪಡೆಯಿರಿ.

ಮಲಗುವ ಭಂಗಿ: ಬೆನ್ನಿನ ಮೇಲೆ ಮಲಗುವ ಬದಲು ಪಕ್ಕಕ್ಕೆ ತಿರುಗಿ ಮಲಗುವುದು ಬಾಯಿ ತೆರೆಯುವುದನ್ನು ತಡೆಯಲು ಸಹಾಯ ಮಾಡುತ್ತದೆ.

ಮೌತ್ ಟೇಪಿಂಗ್ (ಎಚ್ಚರಿಕೆಯಿಂದ): ಇತ್ತೀಚೆಗೆ ಮಲಗುವಾಗ ಬಾಯಿಗೆ ವೈದ್ಯಕೀಯ ಟೇಪ್ ಹಚ್ಚುವ ಅಭ್ಯಾಸ ಜನಪ್ರಿಯವಾಗುತ್ತಿದೆ, ಆದರೆ ಇದನ್ನು ವೈದ್ಯರ ಸಲಹೆ ಮೇರೆಗೆ ಮಾತ್ರ ಮಾಡಬೇಕು.

ಯೋಗ ಮತ್ತು ಪ್ರಾಣಾಯಾಮ: ದಿನನಿತ್ಯ ಪ್ರಾಣಾಯಾಮ ಮಾಡುವುದರಿಂದ ಮೂಗಿನ ಮೂಲಕ ಉಸಿರಾಡುವ ಸಾಮರ್ಥ್ಯ ಹೆಚ್ಚುತ್ತದೆ,(ಏಜೆನ್ಸೀಸ್​).