ಆರೋಗ್ಯ

ಫ್ಯಾನ್ಸಿ ಡಯಟ್ ಇಲ್ಲ, ಕಠಿಣ ಜಿಮ್ ಇಲ್ಲ: ಕೇವಲ ನಡಿಗೆಯಿಂದಲೇ 45 ಕೆಜಿ ತೂಕ ಇಳಿಸಿಕೊಂಡ ಯುವಕ! Weight Loss Journey

Weight Loss Journey ಚಿತ್ರ Instagram
Weight Loss Journey ಚಿತ್ರ Instagram
Published on: 

Weight Loss Journey: ಇಂದಿನ ದಿನಗಳಲ್ಲಿ ತೂಕ ಇಳಿಸಿಕೊಳ್ಳುವುದು (Weight Loss) ಪ್ರತಿಯೊಬ್ಬರ ಪ್ರಮುಖ ಗುರಿಗಳಲ್ಲಿ ಒಂದಾಗಿದೆ. ಇದಕ್ಕೆ ತಕ್ಕಂತೆ ಸಾಮಾಜಿಕ ಜಾಲತಾಣಗಳಲ್ಲಿ ನಿತ್ಯವೂ ಹೊಸ ಹೊಸ 'ಡಯಟ್ ಟ್ರೆಂಡ್'ಗಳು, ಜ್ಯೂಸ್ ಡಿಟಾಕ್ಸ್ (Detox Cleanses) ಹಾಗೂ ತೀವ್ರ ಪ್ರಮಾಣದ ಕಠಿಣ ವ್ಯಾಯಾಮಗಳ (HIIT) ಶಿಫಾರಸುಗಳು ರಾರಾಜಿಸುತ್ತಿರುತ್ತವೆ. ತ್ವರಿತವಾಗಿ ತೂಕ ಕರಗಿಸುವ ಭರವಸೆ ನೀಡುವ ಇಂತಹ ವಿಧಾನಗಳು ತಾತ್ಕಾಲಿಕ ಫಲಿತಾಂಶ ನೀಡಬಹುದಾದರೂ, ಇವು ದೀರ್ಘಕಾಲದ ಆರೋಗ್ಯಕ್ಕೆ ಸೂಕ್ತವಲ್ಲ ಹಾಗೂ ದೇಹವನ್ನು ಬೇಗನೇ ಆಯಾಸಗೊಳಿಸುತ್ತವೆ.

ಆದರೆ, ಯಾವುದೇ ಕಠಿಣ ಹಸಿವಿನ ಡಯಟ್ ಇಲ್ಲದೆ, ಅತ್ಯಂತ ಸರಳ ಹಾಗೂ ಸುಸ್ಥಿರ ಮಾರ್ಗವಾದ 'ನಡಿಗೆ' (Walking) ಮೂಲಕವೇ ತೂಕ ಇಳಿಸಬಹುದು ಎಂಬುದನ್ನು ಫಿಟ್‌ನೆಸ್ ಇನ್‌ಫ್ಲುಯೆನ್ಸರ್ ವಿವೇಕ್ ಸಿದ್ಧ ಸಾಬೀತುಪಡಿಸಿದ್ದಾರೆ.

135 ದಿನಗಳಲ್ಲಿ 45 ಕೆಜಿ ತೂಕ ನಷ್ಟ!

128 ಕೆಜಿ ತೂಕ ಹೊಂದಿದ್ದ ವಿವೇಕ್ ಸಿದ್ಧ ಅವರು ಕೇವಲ 135 ದಿನಗಳಲ್ಲಿ (ಸುಮಾರು 4.5 ತಿಂಗಳು) ದಿನನಿತ್ಯದ ನಡಿಗೆಯನ್ನು ನೆಚ್ಚಿಕೊಂಡು ಬೊಜ್ಜು ಕರಗಿಸಿದ್ದಾರೆ. ತೂಕ ಇಳಿಕೆಯ ತಮ್ಮ ಸಂಪೂರ್ಣ ಪಯಣದಲ್ಲಿ ಕಠಿಣ ಜಿಮ್ ವ್ಯಾಯಾಮಗಳಿಗಿಂತ 'ನಡಿಗೆ' ಅತ್ಯಂತ ಪರಿಣಾಮಕಾರಿ ಮತ್ತು ಶಕ್ತಿಶಾಲಿಯಾಗಿ ಕೆಲಸ ಮಾಡಿದೆ ಎಂದು ಅವರು ಹಂಚಿಕೊಂಡಿದ್ದಾರೆ.
"ಫ್ಯಾನ್ಸಿ ಡಯಟ್ ಇಲ್ಲ, ದುಬಾರಿ ಸಪ್ಲಿಮೆಂಟ್‌ಗಳಿಲ್ಲ ಹಾಗೂ ಯಾವುದೇ ಶಾರ್ಟ್‌ಕಟ್‌ಗಳಿಲ್ಲ" ಎಂದು ಅವರು ತಮ್ಮ ಇನ್‌ಸ್ಟಾಗ್ರಾಮ್ ವಿಡಿಯೋದಲ್ಲಿ ಬರೆದುಕೊಂಡಿದ್ದಾರೆ.

ಪ್ರತಿನಿತ್ಯ 20,000 ಹೆಜ್ಜೆ ಹಾಗೂ ಆಹಾರ ಪದ್ಧತಿ

ತಮ್ಮ ತೂಕ ಇಳಿಕೆಯ ದಿನಚರಿಯನ್ನು ವಿವರಿಸಿದ ಅವರು, ಆರಂಭದಲ್ಲಿ ಪ್ರತಿನಿತ್ಯ 10,000 ಹೆಜ್ಜೆಗಳನ್ನು ನಡೆಯಲು ಪ್ರಾರಂಭಿಸಿದರು. ಕ್ರಮೇಣ ತಮ್ಮ ದೈನಂದಿನ ಹೆಜ್ಜೆಗಳ ಸಂಖ್ಯೆಯನ್ನು 20,000 ಮತ್ತು ಅದಕ್ಕಿಂತ ಹೆಚ್ಚಿನದಕ್ಕೆ ಹೆಚ್ಚಿಸಿದರು.
ನಡಿಗೆಯ ಜೊತೆಗೆ ಆಹಾರ ಪದ್ಧತಿಯೂ ಅಷ್ಟೇ ಮುಖ್ಯ ಎಂದಿರುವ ವಿವೇಕ್, ಸ್ವಚ್ಛ ಹಾಗೂ ಹೆಚ್ಚಿನ ಪೌಷ್ಟಿಕಾಂಶವಿರುವ ಆಹಾರದತ್ತ ಗಮನಹರಿಸಿದರು. ದಿನಕ್ಕೆ 2 ಬಾರಿ ಊಟ ಮಾಡುವುದರಿಂದ ತಮ್ಮ ದಿನಚರಿಯನ್ನು ಆರಂಭಿಸಿ, ಅಂತಿಮವಾಗಿ ದಿನಕ್ಕೆ ಒಂದೇ ಬಾರಿ ಊಟ ಮಾಡುವ OMAD (One Meal A Day) ಶೈಲಿಯ ದಿನಚರಿಗೆ ಬದಲಾದರು.

ತೂಕ ನಷ್ಟಕ್ಕೆ 'ನಡಿಗೆ' ಎಷ್ಟು ಪರಿಣಾಮಕಾರಿ?

ತೂಕ ಇಳಿಸಿಕೊಳ್ಳಲು ನಡಿಗೆ ಅತ್ಯಂತ ಸುಲಭ, ದೀರ್ಘಕಾಲಿಕ ಹಾಗೂ ಕೊಬ್ಬನ್ನು ಸುಟ್ಟು ಸ್ನಾಯುಗಳನ್ನು ಸಂರಕ್ಷಿಸುವ ಶಕ್ತಿಶಾಲಿ ಮಾರ್ಗವಾಗಿದೆ.
ಕ್ಯಾಲೊರಿ ನಷ್ಟ: ನಿಮ್ಮ ದೈನಂದಿನ ದಿನಚರಿಯಲ್ಲಿ 30 ನಿಮಿಷಗಳ ಕಾಲ ಚುರುಕಾಗಿ ಹೆಜ್ಜೆ ಹಾಕುವುದರಿಂದ ದಿನಕ್ಕೆ ಸುಮಾರು 150 ಹೆಚ್ಚುವರಿ ಕ್ಯಾಲೊರಿಗಳನ್ನು ಸುಡಬಹುದು. 
ಸ್ನಾಯುಗಳ ಸಂರಕ್ಷಣೆ: ತೀವ್ರವಾದ ಕಾರ್ಡಿಯೋ ವ್ಯಾಯಾಮಗಳು ಕೆಲವೊಮ್ಮೆ ಇಂಧನಕ್ಕಾಗಿ ದೇಹದಲ್ಲಿನ ಸ್ನಾಯುಗಳನ್ನು ಕರಗಿಸುತ್ತವೆ. ಆದರೆ ಸ್ಥಿರ, ಮಧ್ಯಮ ವೇಗದ ನಡಿಗೆಯು ಸಂಗ್ರಹವಾಗಿರುವ ಕೊಬ್ಬನ್ನು ಮಾತ್ರ ಸುಟ್ಟು, ಸ್ನಾಯು ಅಂಗಾಂಶಗಳನ್ನು ಸುರಕ್ಷಿತವಾಗಿಡುತ್ತದೆ.
ಮಾನಸಿಕ ಪ್ರಶಾಂತತೆ: ನಡಿಗೆಯು ನರಮಂಡಲವನ್ನು ಶಾಂತಗೊಳಿಸುವುದರ ಜೊತೆಗೆ ಒತ್ತಡವನ್ನು ಕಡಿಮೆ ಮಾಡುತ್ತದೆ. ಮತ್ತು ಹಸಿವಿನ ತೀವ್ರ ಹಂಬಲವನ್ನು ಹದದಲ್ಲಿಡುತ್ತದೆ.

ಕೇವಲ 135 ದಿನಗಳಲ್ಲಿ 45 ಕೆಜಿ ತೂಕ ಇಳಿಸಿಕೊಳ್ಳುವುದು ಸುರಕ್ಷಿತವೇ?

ಕೇವಲ 135 ದಿನಗಳಲ್ಲಿ 45 ಕೆಜಿ ತೂಕ ಇಳಿಸಿಕೊಳ್ಳಲು ವಾರಕ್ಕೆ ಸುಮಾರು 2.33 ಕೆಜಿ ತೂಕ ಕರಗಿಸಬೇಕಾಗುತ್ತದೆ. ಇದು ವೈದ್ಯಕೀಯವಾಗಿ ಶಿಫಾರಸು ಮಾಡಲಾದ ಗರಿಷ್ಠ ಪ್ರಮಾಣಕ್ಕಿಂತ ಎರಡು ಪಟ್ಟು ಹೆಚ್ಚು. ಸಾಮಾನ್ಯವಾಗಿ ವಾರಕ್ಕೆ 0.5 ರಿಂದ 1 ಕೆಜಿ ತೂಕ ಇಳಿಸುವುದು ಸುರಕ್ಷಿತ ಹಾಗೂ ಆರೋಗ್ಯಕರ ಎಂದು ವೈದ್ಯರು ಸೂಚಿಸುತ್ತಾರೆ.
4.5 ತಿಂಗಳಲ್ಲಿ 45 ಕೆಜಿ ತೂಕ ಇಳಿಸಲು ದಿನಕ್ಕೆ ಸುಮಾರು 2,567 ಕ್ಯಾಲೋರಿಗಳಷ್ಟು ಕೊರತೆಯನ್ನು ಕಾಯ್ದುಕೊಳ್ಳಬೇಕಾಗುತ್ತದೆ. ಬಹುಪಾಲು ಜನರ ಚಯಾಪಚಯ ಕ್ರಿಯೆಯು  ಒಂದು ದಿನದಲ್ಲಿ ಅಷ್ಟೊಂದು ಕ್ಯಾಲೋರಿಗಳನ್ನು ಸುಡುವುದಿಲ್ಲ. ಇದನ್ನು ಸಾಧಿಸಲು ಗಂಟೆಗಳ ಕಾಲ ತೀವ್ರವಾದ ವ್ಯಾಯಾಮದ ಜೊತೆಗೆ ಉಪವಾಸ ಇರಬೇಕಾಗುತ್ತದೆ, ಇದು ದೇಹಕ್ಕೆ ಅಪಾಯಕಾರಿ.

ತ್ವರಿತ ತೂಕ ನಷ್ಟದ ಅಪಾಯಗಳು

ವೇಗವಾಗಿ ಹೆಚ್ಚಿನ ತೂಕ ಇಳಿಸಿಕೊಳ್ಳುವುದರಿಂದ ಪಿತ್ತಕೋಶದಲ್ಲಿ ಕಲ್ಲು, ಸ್ನಾಯುಗಳ ನಷ್ಟ ಮತ್ತು ಚಯಾಪಚಯ ಕ್ರಿಯೆಯ ಕುಸಿತ ಉಂಟಾಗುತ್ತದೆ. ಜೊತೆಗೆ ತೀವ್ರ ಕೂದಲು ಉದುರುವಿಕೆ ಹಾಗೂ ಎಲೆಕ್ಟ್ರೋಲೈಟ್ ಅಸಮತೋಲನ ಕಾಣಿಸಿಕೊಳ್ಳಬಹುದು.

ಸುರಕ್ಷಿತ ಕಾಲಮಿತಿ ಹೇಗಿರಬೇಕು?

ಸುರಕ್ಷಿತವಾಗಿ ಮತ್ತು ಶಾಶ್ವತವಾಗಿ 45 ಕೆಜಿ ತೂಕ ಇಳಿಸಿಕೊಳ್ಳಲು 11 ರಿಂದ 22 ತಿಂಗಳ ಕಾಲಾವಕಾಶ ತೆಗೆದುಕೊಳ್ಳುವುದು ಸೂಕ್ತ. ಈ ನಿಧಾನಗತಿಯ ಹಾದಿಗೆ ತಾಳ್ಮೆ ಅಗತ್ಯವಿದ್ದರೂ, ಇದು ಸ್ನಾಯುಗಳ ಬದಲಿಗೆ ದೇಹದಲ್ಲಿನ ಶುದ್ಧ ಕೊಬ್ಬನ್ನು ಮಾತ್ರ ಕರಗಿಸಲು ನೆರವಾಗುತ್ತದೆ. ಅಷ್ಟೇ ಅಲ್ಲದೆ, ಚರ್ಮ ಜೋತು ಬೀಳುವುದನ್ನು ಪಡೆದು ಜೀವನಪರ್ಯಂತ ಕಾಯ್ದುಕೊಳ್ಳಬಹುದಾದ ಉತ್ತಮ ಆಹಾರ ಅಭ್ಯಾಸವನ್ನು ಬೆಳೆಸುತ್ತದೆ (ಏಜೆನ್ಸೀಸ್​).
ಗಮನಿಸಿ: ಈ ಮಾಹಿತಿಯನ್ನು ಅಂತರ್ಜಾಲದಿಂದ ಸಂಗ್ರಹಿಸಲಾಗಿದೆ ಮತ್ತು ಮಾಹಿತಿ ಉದ್ದೇಶಗಳಿಗಾಗಿ ಮಾತ್ರ ಪ್ರಸ್ತುತ ಪಡಿಸಲಾಗಿದೆ. ಇದನ್ನು “ವಿಜಯವಾಣಿ ಡಾಟ್ ನೆಟ್” ದೃಢಪಡಿಸುವುದಿಲ್ಲ. ಯಾವುದೇ ಸಲಹೆಯನ್ನು ಅನುಸರಿಸುವ ಮೊದಲು ವೈದ್ಯರನ್ನು ಸಂಪರ್ಕಿಸುವುದು ಯಾವಾಗಲೂ ಉತ್ತಮ.
healthylifestyle
weightlossjourney
walkingforweightloss
viveksiddha
10ksteps
weightlossmotivation
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net