ನಿಂಬೆ ನೀರು ಕುಡಿದರೆ ದೇಹ 'ಡಿಟಾಕ್ಸ್' ಆಗುತ್ತಾ? ಇಲ್ಲಿದೆ ಅಸಲಿ ಮಾಹಿತಿ! | Detox

ವೈದ್ಯಕೀಯ ವಿಜ್ಞಾನದ ಪ್ರಕಾರ, ನಮ್ಮ ದೇಹವನ್ನು ಶುದ್ಧೀಕರಿಸಲು ನಮಗೆ ಯಾವುದೇ ಬಾಹ್ಯ ಪಾನೀಯದ ಅಗತ್ಯವಿಲ್ಲ. ನಮ್ಮ ದೇಹದಲ್ಲಿರುವ ಯಕೃತ್ತು (Liver) ಮತ್ತು ಮೂತ್ರಪಿಂಡಗಳು (Kidneys) ನೈಸರ್ಗಿಕವಾಗಿ ದಿನದ 24 ಗಂಟೆಯೂ ದೇಹವನ್ನು ಡಿಟಾಕ್ಸ್ ಮಾಡುತ್ತಲೇ ಇರುತ್ತವೆ. ನಾವು ಸೇವಿಸುವ ಆಹಾರ ಮತ್ತು ಉಸಿರಾಡುವ ಗಾಳಿಯಲ್ಲಿರುವ ವಿಷಕಾರಿ ಅಂಶಗಳನ್ನು ಹೊರಹಾಕಲು ಈ ಅಂಗಗಳು ಸಮರ್ಥವಾಗಿವೆ. ಯಾವುದೇ ನಿಂಬೆ ನೀರು ಅಥವಾ ಡಿಟಾಕ್ಸ್ ಪಾನೀಯವು ಈ ಪ್ರಕ್ರಿಯೆಯನ್ನು ರಾತ್ರೋರಾತ್ರಿ ಬದಲಾಯಿಸಲು ಸಾಧ್ಯವಿಲ್ಲ.

ನಿಂಬೆ ನೀರು ಕುಡಿಯುವುದರಿಂದ ಕೆಲವು ಪ್ರಯೋಜನಗಳಂತೂ ಖಂಡಿತ ಇವೆ.

ಹೈಡ್ರೇಶನ್: ನಿಂಬೆ ಹಣ್ಣಿನ ರುಚಿಯಿಂದಾಗಿ ಜನರು ಹೆಚ್ಚು ನೀರು ಕುಡಿಯುತ್ತಾರೆ, ಇದು ದೇಹವನ್ನು ಹೈಡ್ರೇಟೆಡ್ ಆಗಿಡಲು ಸಹಾಯ ಮಾಡುತ್ತದೆ.

ವಿಟಮಿನ್ ಸಿ: ಇದು ರೋಗನಿರೋಧಕ ಶಕ್ತಿಯನ್ನು ಹೆಚ್ಚಿಸಲು ಮತ್ತು ಚರ್ಮದ ಆರೋಗ್ಯಕ್ಕೆ ಉತ್ತಮ.

ಜೀರ್ಣಕ್ರಿಯೆ: ಕೆಲವರಲ್ಲಿ ಇದು ಜೀರ್ಣಕ್ರಿಯೆಗೆ ಮತ್ತು ಮಲಬದ್ಧತೆ ನಿವಾರಣೆಗೆ ಸಹಕಾರಿ.

ಅತಿಯಾದರೆ ಅಮೃತವೂ ವಿಷ ಎಂಬಂತೆ, ಹೆಚ್ಚು ನಿಂಬೆ ನೀರು ಕುಡಿಯುವುದು ಹಾನಿಕಾರಕವಾಗಬಹುದು.

ಹಲ್ಲಿನ ಎನಾಮೆಲ್ ನಾಶ: ನಿಂಬೆಯಲ್ಲಿರುವ ಆಮ್ಲೀಯತೆ (Citric Acid) ಹಲ್ಲಿನ ಮೇಲ್ಪದರವನ್ನು ಸವೆಯುವಂತೆ ಮಾಡುತ್ತದೆ.

ಆಸಿಡಿಟಿ: ಗ್ಯಾಸ್ಟ್ರಿಕ್ ಅಥವಾ ಎದೆಯುರಿ ಸಮಸ್ಯೆ ಇರುವವರಿಗೆ ಇದು ತೊಂದರೆಯನ್ನು ಹೆಚ್ಚಿಸಬಹುದು.

"ನಿಂಬೆ ನೀರು ಒಂದು ಆರೋಗ್ಯಕರ ಪಾನೀಯವೇ ಹೊರತು ಅದೊಂದು ಮ್ಯಾಜಿಕ್ ಅಲ್ಲ. ಕೇವಲ ನಿಂಬೆ ನೀರು ಕುಡಿದರೆ ತೂಕ ಇಳಿಯುವುದಿಲ್ಲ ಅಥವಾ ದೇಹದೊಳಗಿನ ಪಾಪವೆಲ್ಲಾ ತೊಳೆದು ಹೋಗುವುದಿಲ್ಲ. ಆರೋಗ್ಯಕರ ಆಹಾರ ಮತ್ತು ವ್ಯಾಯಾಮ ಮಾತ್ರ ದೇಹವನ್ನು ಫಿಟ್ ಆಗಿಡಬಲ್ಲದು," ಎಂದು ಪೌಷ್ಟಿಕಾಂಶ ತಜ್ಞರು ಎಚ್ಚರಿಸುತ್ತಾರೆ,(ಏಜೆನ್ಸೀಸ್).