20 ಸೆಂ.ಮೀ. ಗಾತ್ರದ ಫೈಬ್ರಾಯ್ಡ್ ನಡುವೆಯೂ ಆರೋಗ್ಯವಂತ ಮಗುವಿಗೆ ಜನ್ಮ ನೀಡಿದ 36 ವರ್ಷದ ಮಹಿಳೆ!

ಮಿಲಾನ್ ಫರ್ಟಿಲಿಟಿ ಆ್ಯಂಡ್ ಬರ್ತಿಂಗ್ ಆಸ್ಪತ್ರೆಯ ಪ್ರಸೂತಿ ಮತ್ತು ಸ್ತ್ರೀರೋಗ ವಿಭಾಗದ ಹಿರಿಯ ಸಲಹೆಗಾರ ಡಾ. ವರಿಣಿ ಎನ್. ಅವರ ನೇತೃತ್ವದಲ್ಲಿ ಈ ಪ್ರಕರಣವನ್ನು ನಿರ್ವಹಿಸಲಾಗಿದ್ದು, ಗರ್ಭಾವಸ್ಥೆಯುದ್ದಕ್ಕೂ ನಿರಂತರ ಆಂಟಿನೇಟಲ್ ಮಾನಿಟರಿಂಗ್ ಮತ್ತು ಪರಿಸ್ಥಿತಿಗೆ ಅನುಗುಣವಾಗಿ ಸಮಯೋಚಿತ ಕ್ಲಿನಿಕಲ್ ನಿರ್ಧಾರಗಳನ್ನು ಕೈಗೊಳ್ಳಲಾಗಿದೆ.

ಮದುವೆಯಾಗಿ ಒಂದೂವರೆ ವರ್ಷದ ಬಳಿಕ ಮಹಿಳೆ ಸಹಜವಾಗಿ ಗರ್ಭಧರಿಸಿದ್ದರು. ಗರ್ಭಾವಸ್ಥೆಯ 7 ವಾರಗಳು ಮತ್ತು 4 ದಿನಗಳಾಗಿದ್ದಾಗ ಅವರು ಮೊದಲ ಆಂಟಿನೇಟಲ್ ತಪಾಸಣೆಗೆ ಆಸ್ಪತ್ರೆಗೆ ಭೇಟಿ ನೀಡಿದ್ದರು. ಈ ಸಂದರ್ಭದಲ್ಲಿ ನಡೆಸಿದ ಅಲ್ಟ್ರಾಸೌಂಡ್ ಪರೀಕ್ಷೆಯಲ್ಲಿ ಒಂದು ಆರೋಗ್ಯಕರ ಭ್ರೂಣವಿರುವುದು ದೃಢಪಟ್ಟಿದ್ದಲ್ಲದೆ, ಗರ್ಭಕೋಶದ ಹೊರಭಾಗದಲ್ಲಿ ಬೆಳೆಯುವ ದೊಡ್ಡ ಗಾತ್ರದ ಸಬ್‌ಸೀರೋಸಲ್ ಫೈಬ್ರಾಯ್ಡ್ ಕೂಡ ಪತ್ತೆಯಾಗಿತ್ತು. ಅದು 16.3 × 11.6 ಸೆಂ.ಮೀ. ಗಾತ್ರದಲ್ಲಿದ್ದು, ಗರ್ಭಕೋಶದ ಮೇಲ್ಭಾಗವನ್ನು ಬಹುತೇಕ ಆವರಿಸಿಕೊಂಡಿತ್ತು. ವೈದ್ಯಕೀಯ ಪರೀಕ್ಷೆಯ ವೇಳೆ ಮಹಿಳೆಯ ಗರ್ಭಕೋಶದ ಗಾತ್ರವು ಸುಮಾರು 32 ವಾರಗಳ ಗರ್ಭಾವಸ್ಥೆಯಲ್ಲಿರುವಷ್ಟರ ಮಟ್ಟಿಗೆ ವೃದ್ಧಿಯಾಗಿರುವುದು ಕಂಡುಬಂದಿತ್ತು.

ಗರ್ಭಕೋಶದ ಫೈಬ್ರಾಯ್ಡ್‌ಗಳು ಸಾಮಾನ್ಯವಾಗಿ ಹಾನಿಕರವಲ್ಲದ ಬೆಳವಣಿಗೆಗಳಾಗಿದ್ದು, ಸುಮಾರು ಶೇ.10ರಷ್ಟು ಗರ್ಭಾವಸ್ಥೆಗಳಲ್ಲಿ ಕಂಡುಬರುತ್ತವೆ. ಫೈಬ್ರಾಯ್ಡ್‌ ಹೊಂದಿರುವ ಅನೇಕ ಮಹಿಳೆಯರು ಯಾವುದೇ ಪ್ರಮುಖ ತೊಂದರೆಗಳಿಲ್ಲದೆ ಗರ್ಭಾವಸ್ಥೆಯನ್ನು ಪೂರ್ಣಗೊಳಿಸುತ್ತಾರೆ. ಆದರೆ ಫೈಬ್ರಾಯ್ಡ್‌ ದೊಡ್ಡ ಗಾತ್ರದಲ್ಲಿದ್ದರೆ ನೋವು, ಭ್ರೂಣದ ಅಸಹಜ ಸ್ಥಾನ, ಅವಧಿಗೂ ಮುನ್ನ ಹೆರಿಗೆ ಹಾಗೂ ಸಿಸೇರಿಯನ್ ಹೆರಿಗೆ ಅಗತ್ಯವಾಗುವ ಸಾಧ್ಯತೆ ಹೆಚ್ಚಿರುತ್ತದೆ. ಈ ಪ್ರಕರಣದಲ್ಲಿ ಫೈಬ್ರಾಯ್ಡ್‌ನ ಅಸಾಮಾನ್ಯ ಗಾತ್ರ ಮತ್ತು ಅದರ ಸ್ಥಳವನ್ನು ಪರಿಗಣಿಸಿ, ಗರ್ಭಾವಸ್ಥೆಯುದ್ದಕ್ಕೂ ಅತ್ಯಂತ ನಿಕಟವಾದ ಆಂಟಿನೇಟಲ್ ಮೇಲ್ವಿಚಾರಣೆ ಅಗತ್ಯವಾಗಿತ್ತು.

ಫೈಬ್ರಾಯ್ಡ್‌ನಿಂದ ಉಂಟಾಗಬಹುದಾದ ಸಂಭವನೀಯ ತೊಡಕುಗಳ ಕುರಿತು ವೈದ್ಯರು ದಂಪತಿಗೆ ವಿವರವಾದ ಸಮಾಲೋಚನೆ ನೀಡಲಾಗಿತ್ತು. ಫೈಬ್ರಾಯ್ಡ್‌ನಲ್ಲಿ ನೋವಿನಿಂದ ಕೂಡಿದ ಬದಲಾವಣೆಗಳು ಉಂಟಾಗುವ ಸಾಧ್ಯತೆ, ಭ್ರೂಣದ ಅಸಹಜ ಸ್ಥಾನ, ಅವಧಿಗೂ ಮುನ್ನ ಹೆರಿಗೆ ಹಾಗೂ ಶಸ್ತ್ರಚಿಕಿತ್ಸೆಯ ಮೂಲಕ ಹೆರಿಗೆ ಮಾಡಬೇಕಾದ ಪರಿಸ್ಥಿತಿ ಎದುರಾಗುವ ಸಾಧ್ಯತೆಗಳ ಬಗ್ಗೆ ಅವರಿಗೆ ಮಾಹಿತಿ ನೀಡಲಾಗಿತ್ತು. ಆದರೆ ಫೈಬ್ರಾಯ್ಡ್‌ನಿಂದ ಯಾವುದೇ ತಕ್ಷಣದ ತೊಡಕು ಕಾಣಿಸದ ಹಿನ್ನೆಲೆಯಲ್ಲಿ, ವೈದ್ಯರು ಕನ್ಸರ್ವೇಟಿವ್ ಮ್ಯಾನೇಜ್‌ಮೆಂಟ್ ವಿಧಾನವನ್ನು ಅನುಸರಿಸಲು ನಿರ್ಧರಿಸಿದರು. ಅದರಂತೆ ನಿಯಮಿತ ಆಂಟಿನೇಟಲ್ ತಪಾಸಣೆ, ಸರಣಿ ಅಲ್ಟ್ರಾಸೌಂಡ್ ಸ್ಕ್ಯಾನ್‌ಗಳು ಹಾಗೂ ಭ್ರೂಣದ ಬೆಳವಣಿಗೆಯ ನಿರಂತರ ಮೇಲ್ವಿಚಾರಣೆ ನಡೆಸಲಾಯಿತು.

ಫೈಬ್ರಾಯ್ಡ್‌ನ ಗಾತ್ರವೊಂದೇ ಗರ್ಭಧಾರಣೆಯ ಫಲಿತಾಂಶ ನಿರ್ಧರಿಸುವುದಿಲ್ಲ

ಮಿಲಾನ್ ಫರ್ಟಿಲಿಟಿ ಆ್ಯಂಡ್ ಬರ್ತಿಂಗ್ ಆಸ್ಪತ್ರೆಯ ಪ್ರಸೂತಿ ಮತ್ತು ಸ್ತ್ರೀರೋಗ ವಿಭಾಗದ ಹಿರಿಯ ಸಲಹೆಗಾರ ಡಾ. ವಾರಿಣಿ ಎನ್. ಮಾತನಾಡಿ, “ದೈತ್ಯ ಗಾತ್ರದ ಫೈಬ್ರಾಯ್ಡ್‌ ಹೊಂದಿರುವ ಗರ್ಭಾವಸ್ಥೆಯನ್ನು ನಿರ್ವಹಿಸುವುದು ಸವಾಲಿನ ಪ್ರಕ್ರಿಯೆಯಾಗಿದ್ದು, ಪ್ರತಿಯೊಬ್ಬ ರೋಗಿಯ ಪರಿಸ್ಥಿತಿಗೆ ಅನುಗುಣವಾದ ನಿಖರ ಮೇಲ್ವಿಚಾರಣೆ ಮತ್ತು ವೈಯಕ್ತಿಕ ವೈದ್ಯಕೀಯ ನಿರ್ಧಾರಗಳ ಅಗತ್ಯವಿರುತ್ತದೆ. ಫೈಬ್ರಾಯ್ಡ್‌ನ ಗಾತ್ರವೊಂದೇ ಗರ್ಭಾವಸ್ಥೆಯ ಅಂತಿಮ ಫಲಿತಾಂಶವನ್ನು ನಿರ್ಧರಿಸುವುದಿಲ್ಲ. ಅದರ ಸ್ಥಳ, ಗರ್ಭಾವಸ್ಥೆಯ ಅವಧಿಯಲ್ಲಿ ಅದರಲ್ಲಾಗುವ ಬದಲಾವಣೆಗಳು ಹಾಗೂ ತಾಯಿ ಮತ್ತು ಮಗುವಿನ ಮೇಲೆ ಅದು ಬೀರುತ್ತಿರುವ ಪರಿಣಾಮವೂ ಅಷ್ಟೇ ಮಹತ್ವದ್ದಾಗಿದೆ. ನಿಯಮಿತ ಮೇಲ್ವಿಚಾರಣೆಯ ಮೂಲಕ ಪರಿಸ್ಥಿತಿಯಲ್ಲಿ ಉಂಟಾಗುವ ಬದಲಾವಣೆಗಳನ್ನು ಸೂಕ್ತ ಸಮಯದಲ್ಲಿ ಗುರುತಿಸಿ, ಅಗತ್ಯ ವೈದ್ಯಕೀಯ ಕ್ರಮಗಳನ್ನು ಕೈಗೊಳ್ಳಲು ಸಾಧ್ಯವಾಯಿತು” ಎಂದು ಹೇಳಿದರು.

ಗರ್ಭಾವಸ್ಥೆಯು ತಾಯಿ ಅಥವಾ ಭ್ರೂಣಕ್ಕೆ ಯಾವುದೇ ಪ್ರಮುಖ ತೊಡಕು ಉಂಟಾಗದಂತೆ ಸಹಜವಾಗಿ ಮುಂದುವರಿಯಿತು. ಮೊದಲ ತ್ರೈಮಾಸಿಕದ ಸ್ಕ್ರೀನಿಂಗ್ ಮತ್ತು ವಿವರವಾದ ಅನಾಮಲಿ ಸ್ಕ್ಯಾನ್‌ಗಳ ಫಲಿತಾಂಶಗಳು ಸಮಾಧಾನಕರವಾಗಿದ್ದವು. ಸರಣಿ ಅಲ್ಟ್ರಾಸೌಂಡ್ ಸ್ಕ್ಯಾನ್‌ಗಳಲ್ಲಿ ಭ್ರೂಣದ ಬೆಳವಣಿಗೆ ನಿರೀಕ್ಷಿತ ರೀತಿಯಲ್ಲೇ ಸಾಗುತ್ತಿರುವುದು ಕಂಡುಬಂದಿತು. ರಕ್ತದ ಹರಿವಿಗೆ ಸಂಬಂಧಿಸಿದ ಡಾಪ್ಲರ್ ಅಧ್ಯಯನಗಳ ಫಲಿತಾಂಶಗಳೂ ಸಾಮಾನ್ಯವಾಗಿದ್ದವು. ಗರ್ಭಕೋಶದ ಗಾತ್ರ ಮತ್ತು ಫೈಬ್ರಾಯ್ಡ್‌ನಿಂದ ಉಂಟಾಗಬಹುದಾದ ಒತ್ತಡದ ಪರಿಣಾಮವಾಗಿ ತಾಯಿಯ ಮೂತ್ರಪಿಂಡಗಳಿಗೆ ಯಾವುದೇ ತೊಂದರೆ ಉಂಟಾಗಿರುವ ಲಕ್ಷಣಗಳೂ ಕಂಡುಬಂದಿರಲಿಲ್ಲ.

ಗರ್ಭಾವಸ್ಥೆ ಮುಂದುವರಿದಂತೆ ಫೈಬ್ರಾಯ್ಡ್‌ನ ಗಾತ್ರವೂ ಕ್ರಮೇಣ ಹೆಚ್ಚಾಗುತ್ತಿತ್ತು. ಗರ್ಭಾವಸ್ಥೆಯ 35 ವಾರಗಳು ಮತ್ತು 6 ದಿನಗಳಾಗುವ ವೇಳೆಗೆ ಅದರ ಗಾತ್ರ 19.9 × 11.9 × 17 ಸೆಂ.ಮೀ.ಗೆ ಏರಿಕೆಯಾಗಿತ್ತು. ಇಷ್ಟೊಂದು ದೊಡ್ಡ ಗಾತ್ರಕ್ಕೆ ಬೆಳೆದಿದ್ದರೂ ಫೈಬ್ರಾಯ್ಡ್‌ನಲ್ಲಿ ನೋವಿನಿಂದ ಕೂಡಿದ ಡಿಜೆನರೇಷನ್‌ನ ಯಾವುದೇ ಲಕ್ಷಣಗಳು ಕಂಡುಬರಲಿಲ್ಲ. ಅದೇ ರೀತಿ, ಮೂತ್ರಪಿಂಡಗಳಿಗೆ ಸಂಬಂಧಿಸಿದ ತೊಡಕುಗಳು ಅಥವಾ ತಾಯಿ ಮತ್ತು ಭ್ರೂಣದ ಆರೋಗ್ಯದ ಮೇಲೆ ಗಮನಾರ್ಹ ಪರಿಣಾಮ ಬೀರುವ ಸಮಸ್ಯೆಗಳೂ ಎದುರಾಗಿರಲಿಲ್ಲ.

“ಫೈಬ್ರಾಯ್ಡ್‌ನ ಗಾತ್ರ ದೊಡ್ಡದಾಗಿರುವುದರ ಜೊತೆಗೆ ಅದರ ಬೇಸ್ ವಿಶಾಲವಾಗಿತ್ತು. ಗರ್ಭಾವಸ್ಥೆಯಲ್ಲಿ ಅದಕ್ಕೆ ರಕ್ತದ ಪೂರೈಕೆಯೂ ಹೆಚ್ಚಾಗಿದ್ದರಿಂದ ಸಿಸೇರಿಯನ್ ವೇಳೆ ಫೈಬ್ರಾಯ್ಡ್‌ ಅನ್ನು ತೆಗೆದುಹಾಕಲು ಮುಂದಾದರೆ ಹೆಚ್ಚಿನ ಪ್ರಮಾಣದ ರಕ್ತಸ್ರಾವವಾಗುವ ಅಪಾಯವಿತ್ತು. ಅಲ್ಲದೆ, ಅದನ್ನು ತೆಗೆದುಹಾಕಲು ದೊಡ್ಡ ಗಾತ್ರದ ಛೇದನದ ಅಗತ್ಯವೂ ಎದುರಾಗಬಹುದಿತ್ತು. ಫೈಬ್ರಾಯ್ಡ್‌ನಿಂದ ಆ ಸಂದರ್ಭದಲ್ಲಿ ಯಾವುದೇ ತಕ್ಷಣದ ತೊಡಕು ಉಂಟಾಗದ ಹಿನ್ನೆಲೆಯಲ್ಲಿ, ಅದನ್ನು ಹಾಗೆಯೇ ಉಳಿಸುವುದೇ ಸುರಕ್ಷಿತ ಆಯ್ಕೆ ಎಂದು ನಾವು ನಿರ್ಧರಿಸಿದೆವು” ಎಂದು ಡಾ. ವಾರಿಣಿ ಎನ್. ವಿವರಿಸಿದರು.

ಆದರೆ ಗರ್ಭಾವಸ್ಥೆಯ 39ನೇ ವಾರದಲ್ಲಿ ನಡೆಸಿದ ತಪಾಸಣೆಯಲ್ಲಿ ಭ್ರೂಣವು ಸಾಮಾನ್ಯವಾಗಿ ತಲೆಯ ಕೆಳಭಾಗದಲ್ಲಿ ಇರುವ ಬದಲು ಅಡ್ಡ-ಓರೆಯಾದ ಸ್ಥಿತಿಯಲ್ಲಿರುವುದು ಕಂಡುಬಂದಿತು. ವೈದ್ಯಕೀಯವಾಗಿ ಇದನ್ನು ‘ಆಬ್ಲೀಕ್ ಲೈ’ ಎಂದು ಕರೆಯಲಾಗುತ್ತದೆ. ಇದೇ ಸಂದರ್ಭದಲ್ಲಿ ನಡೆಸಿದ ಸ್ಕ್ಯಾನ್‌ನಲ್ಲಿ ಆಮ್ನಿಯೋಟಿಕ್ ದ್ರವದ ಪ್ರಮಾಣ ಗಡಿಭಾಗದಲ್ಲಿರುವುದು ಹಾಗೂ ಮಗುವಿನ ಕುತ್ತಿಗೆಯ ಸುತ್ತ ಹೊಕ್ಕುಳ ಬಳ್ಳಿ ಸುತ್ತಿಕೊಂಡಿರುವುದು ಕೂಡ ಕಂಡುಬಂದಿತು.

ಭ್ರೂಣದ ಅಸಹಜ ಸ್ಥಾನ ಮತ್ತು ಸುರಕ್ಷಿತವಾಗಿ ಸಾಮಾನ್ಯ ಹೆರಿಗೆ ನಡೆಯುವ ಸಾಧ್ಯತೆ ಕಡಿಮೆ ಇರುವುದನ್ನು ಪರಿಗಣಿಸಿ, ವೈದ್ಯರು ದಂಪತಿಗೆ ಯೋಜಿತ ಸಿಸೇರಿಯನ್ ಹೆರಿಗೆ ಕುರಿತು ಸಮಾಲೋಚನೆ ನೀಡಿದರು. ಬಳಿಕ ಎಲೆಕ್ಟಿವ್ ಲೋವರ್ ಸೆಗ್ಮೆಂಟ್ ಸಿಸೇರಿಯನ್ ನಡೆಸಲಾಗಿದ್ದು, 3.54 ಕೆ.ಜಿ. ತೂಕದ ಆರೋಗ್ಯವಂತ ಗಂಡು ಮಗು ಜನಿಸಿತು. ಮಗುವಿನ ಎಪ್ಗಾರ್ ಸ್ಕೋರ್ ಕೂಡ ಸಾಮಾನ್ಯವಾಗಿತ್ತು.

ಈ ಪ್ರಕರಣದಲ್ಲಿ ಸಿಸೇರಿಯನ್ ಹೆರಿಗೆಗೆ ನೇರ ಕಾರಣ ಫೈಬ್ರಾಯ್ಡ್ ಆಗಿರಲಿಲ್ಲ ಎಂಬುದು ಗಮನಾರ್ಹ. ಬದಲಾಗಿ, ಭ್ರೂಣದ ಅಸಹಜ ಸ್ಥಾನವೇ ಸುರಕ್ಷಿತ ಹೆರಿಗೆಗಾಗಿ ಸಿಸೇರಿಯನ್ ನಡೆಸಲು ಪ್ರಮುಖ ಕಾರಣವಾಗಿತ್ತು ಎಂದು ವೈದ್ಯರು ತಿಳಿಸಿದ್ದಾರೆ.

ಮಗುವಿನ ತಾಯಿ ಸಂತಸ ವ್ಯಕ್ತಪಡಿಸಿ , “ಫೈಬ್ರಾಯ್ಡ್‌ನ ಗಾತ್ರ ಮತ್ತು ಅದರಿಂದ ಉಂಟಾಗಬಹುದಾದ ಅಪಾಯಗಳ ಕುರಿತು ಮೊದಲ ಬಾರಿ ತಿಳಿದಾಗ ನಮಗೆ ಸಾಕಷ್ಟು ಆತಂಕವಾಗಿತ್ತು. ಆದರೆ ಗರ್ಭಾವಸ್ಥೆಯುದ್ದಕ್ಕೂ ನಡೆದ ನಿಯಮಿತ ಮೇಲ್ವಿಚಾರಣೆ ಮತ್ತು ಡಾ. ವರಿಣಿ ಅವರ ಮಾರ್ಗದರ್ಶನ ನಮಗೆ ಆತ್ಮವಿಶ್ವಾಸ ನೀಡಿತು. ಪ್ರತಿಯೊಂದು ಹಂತದಲ್ಲೂ ವೈದ್ಯರು ಪರಿಸ್ಥಿತಿಯನ್ನು ಗಮನಿಸುತ್ತಿದ್ದರಿಂದ ನಾವು ಧೈರ್ಯದಿಂದ ಗರ್ಭಾವಸ್ಥೆಯನ್ನು ಮುಂದುವರಿಸಲು ಸಾಧ್ಯವಾಯಿತು. ನಮ್ಮ ಮಗು ಆರೋಗ್ಯವಾಗಿ ಜನಿಸಿರುವುದಕ್ಕೆ ನಮಗೆ ಅತ್ಯಂತ ಸಂತೋಷವಾಗಿದೆ” ಎಂದು ಹೇಳಿದರು.

ಅಸಾಧಾರಣವಾಗಿ ದೊಡ್ಡ ಗಾತ್ರದ ಗರ್ಭಕೋಶದ ಫೈಬ್ರಾಯ್ಡ್‌ನಿಂದ ಸಂಕೀರ್ಣಗೊಂಡಿದ್ದರೂ, ಸೂಕ್ತ ವೈದ್ಯಕೀಯ ಮೇಲ್ವಿಚಾರಣೆ ಮತ್ತು ಸಮಯೋಚಿತ ನಿರ್ಧಾರಗಳ ಮೂಲಕ ಇಂತಹ ಗರ್ಭಾವಸ್ಥೆಯನ್ನೂ ಯಶಸ್ವಿಯಾಗಿ ನಿರ್ವಹಿಸಲು ಸಾಧ್ಯ ಎಂಬುದನ್ನು ಈ ಪ್ರಕರಣ ತೋರಿಸುತ್ತದೆ ಎಂದು ಆಸ್ಪತ್ರೆ ತಿಳಿಸಿದೆ.

ಗರ್ಭಾವಸ್ಥೆಯ ಆರಂಭಿಕ ಹಂತದಲ್ಲೇ ಫೈಬ್ರಾಯ್ಡ್‌ ಪತ್ತೆ ಹಚ್ಚುವುದು, ನಿಯಮಿತ ಆಂಟಿನೇಟಲ್ ಸರ್ವೇಲೆನ್ಸ್ ನಡೆಸುವುದು, ಸಂಭವನೀಯ ಅಪಾಯಗಳ ಕುರಿತು ಗರ್ಭಿಣಿ ಮತ್ತು ಕುಟುಂಬಕ್ಕೆ ಸೂಕ್ತ ಸಮಾಲೋಚನೆ ನೀಡುವುದು ಹಾಗೂ ಅಗತ್ಯವಿದ್ದಾಗ ಸಮಯೋಚಿತ ವೈದ್ಯಕೀಯ ಮಧ್ಯಪ್ರವೇಶ ಕೈಗೊಳ್ಳುವುದು ಇಂತಹ ಪ್ರಕರಣಗಳ ನಿರ್ವಹಣೆಯಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ. ಈ ಕ್ರಮಗಳ ಮೂಲಕ ಸಂಭವನೀಯ ತೊಡಕುಗಳನ್ನು ನಿಕಟವಾಗಿ ಗಮನಿಸುತ್ತಾ, ತಾಯಿ ಮತ್ತು ಮಗುವಿನ ಸುರಕ್ಷತೆಯನ್ನು ಕಾಪಾಡಿಕೊಂಡು ಗರ್ಭಾವಸ್ಥೆಯನ್ನು ಸಾಧ್ಯವಾದಷ್ಟು ಸುರಕ್ಷಿತವಾಗಿ ಮುಂದುವರಿಸಲು ನೆರವಾಗುತ್ತದೆ.