ಮಳೆಗಾಲದಲ್ಲಿ ನಮ್ಮ ಜೀರ್ಣಶಕ್ತಿ ಬೇರೆ ಕಾಲಗಳಿಗಿಂತ ಕಡಿಮೆಯಾಗಿರುತ್ತದೆ. ಹಾಗಾಗಿ ಸುಲಭವಾಗಿ ಜೀರ್ಣವಾಗುವ ಆಹಾರಗಳನ್ನು ಮಾತ್ರ ಸೇವಿಸಬೇಕು. ವಾತಾವರಣ ತಂಪಾಗಿದೆ ಎಂದು ಕರಿದ ಪದಾರ್ಥಗಳನ್ನು ಸೇವಿಸುವುದು ತಪ್ಪು. ತೆರೆದು ಬೇಯಿಸಿ ನೀರು ಬಸಿದ ಮೆತ್ತಗಿನ ಅನ್ನ ಮತ್ತು ಹೆಸರುಬೇಳೆಯ ತಿಳಿಸಾರನ್ನು ಹೆಚ್ಚಾಗಿ ಬಳಸಬೇಕು ಎನ್ನುತ್ತದೆ ಆಯುರ್ವೆದ. ಕೊತ್ತಂಬರಿ, ಜೀರಿಗೆ, ಶುಂಠಿ, ಲವಂಗ, ಚಕ್ಕೆ, ಅರಿಶಿಣ, ಕಲ್ಲು ಹೂ, ಕಾಳುಮೆಣಸು, ಸಾಸಿವೆ ಇಂತಹ ಎಲ್ಲ ಸಾಂಬಾರಪದಾರ್ಥಗಳನ್ನು ಹೆಚ್ಚು ಬಳಸಬೇಕಾದ ಕಾಲ ಇದು. ಇವುಗಳ ಕಷಾಯ ಮಾಡಿ ಅದಕ್ಕೆ ಜೋನಿಬೆಲ್ಲ ಹಾಕಿ ನಿತ್ಯ ಕುಡಿದರೆ ಮಳೆಗಾಲದಲ್ಲಿ ಸಾಮಾನ್ಯವಾಗಿ ಕಾಡುವ ಬಹುತೇಕ ಸಮಸ್ಯೆಗಳಿಂದ ದೂರ ಇರಬಹುದು. ವಿಶೇಷವಾಗಿ ಅಸ್ತಮಾ, ಆಮವಾತ, ಅಲರ್ಜಿ, ಅಜೀರ್ಣದ ಸಮಸ್ಯೆ ಇರುವವರಿಗೆ ಈ ಕಷಾಯ ತುಂಬ ಪ್ರಯೋಜನಕಾರಿಯಾಗುತ್ತದೆ. ಇಂತಹ ಸಮಸ್ಯೆ ಇರುವವರಂತೂ ಮಳೆಗಾಲದಲ್ಲಿ ಯಾವುದೇ ಕಾರಣಕ್ಕೂ ಜೀರ್ಣಕ್ಕೆ ಸುಲಭವಲ್ಲದ ಆಹಾರ ಮತ್ತು ಅತಿಯಾದ ಪ್ರಮಾಣದಲ್ಲಿ ಆಹಾರವನ್ನು ಸೇವಿಸಬಾರದು. ಬೆಳ್ಳುಳ್ಳಿ, ಈರುಳ್ಳಿ, ಇಂಗು, ಕರಿಬೇವು, ಜೋನಿಬೆಲ್ಲ, ಬೆಣ್ಣೆಯನ್ನು ತೆಗೆದ ಮಜ್ಜಿಗೆ, ದೊಡ್ಡಪತ್ರೆ, ಪುದಿನ, ಮೇಲೆ ಹೇಳಿದ ಎಲ್ಲ ಸಾಂಬಾರ ಪದಾರ್ಥಗಳನ್ನು ಅಡುಗೆಯಲ್ಲಿ ಹೆಚ್ಚಾಗಿ ಬಳಸುವುದು ಒಳ್ಳೆಯದು.
